Okwa itọn̄
Okwa kè Debit. Ìkup inyi ogwu òjeen̄ okwa.
40
Nkat ejit ikup ikikpọ Okumugwem;inunu ininyan̄a emi.
2 Îtaba emi isibi me udọn̄ ufialek,
mè itaba emi isibi me emen utek arika;
îsa emi inito me inyọn̄ ewuuk,
mè irọ ukot n̄a inye me ijọn̄.
3 Îtap emi aya okwa me otu,
okwa òkinyi ọmọ Awaji kiji umin;
owuwa ene mêmun̄ ikwaan̄ îsibe,
mè itet ukpook,
mè itoon̄ ọmọ Okumugwem ejit me lek.
4 Kpọ-nu uga ubelejit òkup inyi ebi
ìtoon̄ Okumugwem ejit me lek,
mè ijit igọgọọk ebi ugumulek
isi iriaak awaji echi ikarege Awaji.
5 Okumugwem Awaji kiji, owu orọ owuwa uyeke inu inyi eji;
kpunu ogwu ebesa owu itọ me lek;
ata inu okaan̄be me nkeek kwun̄ ibak eji îwa enenen;
emi m̀kpakọt ikpa otutuuk isan̄a.
6 Owu onyi emi utọn̄ ibe ǹnọ ikọ;
owu òkaweek esese chieen̄ ngwugwa;
òkado ngwugwa ewọwọp iriọk,
òkado ngwugwa ijo inu.
7 Ikeya ke mbe, “Kpọ emi ire eyi, nnu.”
Mîge inu ofolek n̄a me ikpa ikan ibe,
8 “Jei Awaji n̄a, irọrọ nkeek kwun̄ ìkitotop emi me lek;
ikan kwun̄ ọmọ òwa me emen ejit n̄a nsun̄be.”
9 Ata etip unyan̄a ya eyi owu okinyan̄a ene,
m̀kpakpa iwele me isi ebi kwun̄
me emen uga ntitiin̄ kiban̄;
Okumugwem, owu oriọọn̄ ibe ǹkatet otu ìkaan̄;
ǹkitutumu isibi.
10 Ǹkatet ukpatu ata irọrọ kwun̄ ìkaan̄ me lek n̄a gaalek;
ǹkitutumu isibi ibe ke owu
ogbe ibe etoon̄ ejit me lek;
ke owu okinyan̄a ebi eyi kwun̄;
me emen uga ntitiin̄ ebi kwun̄,
ǹkitutumu isibi ibe
ke owu okimun̄ ene me chieen̄ mgbọ geelek,
ǹkalet otu.
11 Okumugwem, katele irọrọ emi nsan;
kibem emi mgbọ geelek, bak me lek orebe ogwu atikọ,
mè ogwu òkimun̄ ene me chieen̄ mgbọ geelek.
12 Mije, uyọrọlek îkana emi me ijọn̄ okokop,
ǹkayaka ìriọọn̄ otu ifuk;
ijo inu n̄a îkana emi ikwuun̄;
ǹkayaka ìmọọn̄ inu;
uyọrọlek n̄a îwa igak ijeek ibot n̄a;
ejit n̄a ìkayaka ìnye emi.
13 Soso, Okumugwem, nyan̄a emi sibi;
gwat lek na tap ubọk nyi emi.
14 Soso, rọ ebi ìkiweek ikpakpan̄ emi ekana welewele,
mè tap ema esip me isi;
rieen̄ ebi ìkiweek ibe uyọrọlek ikeme emi kpebe,
inyi ema eben esip me isi egwu ekom!
15 Ebi ìkigigaan̄ emi “Kpuwai! Kpuwai” cha,
rọ inyi esip itet ema,
ufuna lek kiban̄ igba.
16 Ire, tele ebi geelek ìkinu lek kwun̄ ebele ejit,
mè enwọọn̄ unwọọn̄ me lek inu orọbe inyi ema;
ikeya si, rọ ebi geelek ìmama
ibe owu òre ogwu unyan̄a kiban̄,
eketumu mgbọ geelek ibe, “Okumugwem îmin!”
17 Ire, emi ìre ogwu ugbọọn̄ mè ogwu una-lek;
owu okaan̄ nkeek ibak emi;
owu okitap ubọk inyi emi;
owu okinyan̄a emi.
Jei, Awaji n̄a,
gwat lek na na nyan̄a emi!