Uriaak ogwu orukan̄
Ìkup inyi ogwu òjeen̄ okwa. Okwa kè Debit.
41
Kpọ-nu uga ubelejit òkup inyi ogwuòkitap ubọk inyi ebi irek osikibe;
Okumugwem mônyan̄a ọmọ me mgbọ uyọrọlek.
2 Okumugwem môbem ọmọ,
mè isun̄ ọmọ ugwem;
Okumugwem môgbana ọmọ me linyọn̄;
ìkpojit ọmọ itele ibe ebi ochicha kan̄ ekpan̄ ọmọ.
3 Orukan̄ isitet ọmọ,
Okumugwem môtap ubọk inyi ọmọ
me inyọn̄ mkpilaak orukan̄ kan̄,
mè irọ ibe lek kan̄ inye.
4 Jei Okumugwem, ǹkitumu inyi owu ibe ke nrọ owu ilọ;
soso, to emi nsan,
mè rọ inyi lek n̄a inye.
5 Ebi ochicha n̄a esa njijọ ejit ikibe,
“Ìre kpa mgbọ ke ene yi obokwu mọnọ,
ufuna erieen̄ kan̄ ichep?”
6 Ema isinu inikpọ emi,
mîra ikifiaan̄ itumu ikọ òbokat emi ejit,
mè ikititen̄e ijo etip geelek ofolek n̄a;
ema isisibi ifon, mîra isa ikikpa ikana ere.
7 Otutuuk ebi oriara n̄a, ekije emen emen ikigbaan̄ ilo emi,
mè ikitọt ijo otitọt ibak emi.
8 Ema ekibe ke inu òtetet emi îtet isan̄a,
ke m̀kpayaka inan̄a ikeke
me inyọn̄ mkpilaak orukan̄ nlaakbe.
9 Achubọk unene ibot ejit n̄a gaalek,
ogwu ntoon̄be ejit me lek enenen,
ogwu ògọgọọk emi igbaan̄ irie inorie n̄a,
îben emi inyam ewe.
10 Okumugwem, kaan̄ nsan me lek n̄a,
mè rọ inyi lek n̄a inye,
ufuna m̀kpe ebi ochicha n̄a useen̄.
11 Ebi ochicha n̄a kpetim ikpan̄ emi;
eyi ke nsa iriọọn̄ ibe ke owu obele ejit me lek n̄a.
12 Owu obieen̄ emi ikaan̄, bak me lek unen eru n̄a,
mè itele ibe emi ǹkup me ere owu okupbe mgbọ geelek.
13 Ìtọn̄ Okumugwem, Awaji ebi Ijeren;
ìtọn̄ ọmọ mgbọ keyi ìre mgbọ geelek, mgbọ geelek!
Ikup ikeya, mè ikup si ikeya!