IKPA ÒSO IBA
Okwa 42–72
Imumun̄ Awaji ìkilọlọk ene
Ìkup inyi ogwu òjeen̄ okwa. Ijeen̄-inu bọn kè Kora.
42
Ike ogaan̄ okinya ikana iweek ògbugbuk mun̄ ìbonwọ,ikeya ke nkinya ikana si iweek owu, jei Awaji.
2 Îlọk emi imumun̄ owu Awaji,
owu Awaji òkup me ugwem;
ìre kpa mgbọ ke mbanimun̄ owu isi mè isi?
3 Eririeen̄ mè ikarek,
mun̄ ito n̄a gaalek ore inorie nkirie;
ebi ochicha ekido emi otu mgbọ geelek ibe,
“Sà Awaji kwun̄ ya ye?”
4 Ejit îkifieek emi enenen nsikikeek mgbọ òraraka,
mgbọ nkije me isi ikisa urum ebi ijọk
ije me onineen̄ isi Uwu Mbuban;
eji ekibele ejit itaan̄ ukpo
ikọt okwa itọn̄ Awaji.
5 Keke orọ ejit okifieek emi ikeyi?
Sà ìre keke orọ nkisisaak lek n̄a mọnọ?
Mâtoon̄ ejit me lek Awaji,
mije mâkpọk itọn̄ ọmọ,
ogwu unyan̄a n̄a mè Awaji n̄a.
6 Jei Awaji n̄a, ejit îfieek emi enenen;
eya ke nkup me inyọn̄ ogoon̄ Emọn,
ijọn̄ ere ibot okwaan̄ Jodan obenebe, mè ogoon̄ Misa,
ikikeek inu ofolek kwun̄.
7 Uyọrọlek ge ìkikpana ge isibi
kubọk mun̄ òkifan̄a me inyọn̄ ogoon̄ irọn̄,
mè isa otutuuk ekoon̄ kan̄
mè ogbururu kan̄ ifan̄a ikeme emi.
8 Ikarek, Okumugwem ìkijeen̄ emi
imumechieen̄ îkikaan̄ mgbọ geelek;
eririeen̄, nra ikikọt okwa itọn̄ Awaji
ogwu ònyi emi ugwem.
9 Ntumu inyi Awaji ogwu òre ewuuk n̄a ibe,
“Keke orọ owuukbe emi?
Keke orọ mâbiabe me lek ifefieek ejit
bak me lek ebi ochicha ìkisisaak emi?”
10 Ochak ebi ochicha n̄a ekichak emi
îre emi otu ukwuuk;
ema ekido emi otu egwe geelek ibe,
“Sà Awaji kwun̄ ya ye?”
11 Keke orọ ejit okifieek emi ikeyi?
Sà ìre keke orọ nkisisaak lek n̄a ni?
Mâtoon̄ Awaji ejit me lek,
mije mâkpọk itọn̄ ọmọ,
ogwu unyan̄a n̄a mè Awaji n̄a.