Uriaak ibebe Awaji isulu ebi òkpaka ibot osusut
Ìkup inyi ogwu òjeen̄ okwa: Igọọk me ida Kajijaka. Okwa kè Debit. Ekikọt ususuk.
58
Enyi ebi ibot mkpulu, ìre enyi mîkifieek ikọ òtatat?Ìre enyi mîkisibi oyerebet ònenen inyi bọn ebilene?
2 In̄-in̄, irọrọ ijo inu ke enyi ekikeek,
mè ikirọ inu afa me lek ijọn̄.
3 Ebi ijo irọrọ ebene karake mgbọ
ema ekupbe me emen owot ije ilọ;
ema ebene me usen emanbe ema ikirọ ilọ,
mè ikikan̄ ataak.
4 Ikọ otu kiban̄ ìkup kubọk iwot ulu ibot iba;
ubọk ulu ibot iba ìkakinọ ikọ,
ikeya si, utọn̄ ife chi ìchichit.
5 Ulu ibot iba ìkakinọ ugwun̄ ebi ifit ulu me lek;
ubọk geelek ebi ifit ulu eriọọn̄be ugwun̄ ire,
kpekikọt irọ inyi ulu ibot iba igban̄ utọn̄ inyi ema.
6 Jei Awaji, faan̄ ema ejeek san̄a me otu;
soso, Okumugwem,
gọ ejeek bọn egbe àtat cha ekisa iriak ìre gwook.
7 Tele ema eniniin̄ echieen̄ kubọk mun̄ okininiin̄ ichep me ijọn̄;
faan̄ oraan̄ geelek ema esookbe fiin̄.
8 Rọ ema egwat lek ekwaan̄ kubọk egwuuk òtọtọk ikana nkọọk;
rọ ema ekamun̄ utoon̄ ura,
kubọk gwun̄ aya emanbe nkwukwu.
9 Ike iye ukpak okigwat lek itaka ita sabum otin̄ oyok,
ikeya si, gwat lek kwọkọ ema san̄a kpai.
10 Ebi ata irọrọ mêbele ejit
mgbọ ema isimun̄ Awaji
okikpe ebi ijo ife useen̄ inu ema erọbe;
ebi ata irọrọ mêwook me emen eje ebi òkpaka ibot.
11 Ebi ene mêtumu ibe, “Me atikọ,
mkpukpe ọmọ òwa inyi ebi ata irọrọ;
îsibi utoon̄ ibe ke Awaji
ogwu òkisibi oyerebet inyi linyọn̄
ọmọ òwa.”