Uriaak ibebeek Awaji mbem
Ìkup inyi ogwu òjeen̄ okwa: Igọọk me ida Kajijaka. Okwa kè Debit mgbọ Sọọlu oriabe ene ibe esi ebem uwu kè Debit, inyi ọmọ ikpan̄ Debit. Ekikọt ususuk.
59
Jei Awaji n̄a, nyan̄a emi sibi me ubọk ebi ochicha n̄a;bene emi saba ubọk ebi ìkije ikeme emi!
2 Nyan̄a emi me ubọk ebi ijo irọrọ,
mè san̄a emi me ubọk ebi ìkpan̄ ene.
3 Jei Okumugwem, kpọ,
ema mîlileek ikikpọ emi ikpakpan̄;
ebi ujat ejit mîgbaan̄ lek ibọp irọrọ ikeme emi;
ǹkarọ ema ijo inu geege;
ǹkajajak gwun̄ unọn kiban̄ ìkpan̄.
4 Me nkarọge ema inu geege ìlọ,
ema mîliin̄ ekot ikibem lek ikpọ emi
ibenitim emi etim me lek.
Soso, nan̄a keke na tap ubọk nyi emi;
owu gaalek kpọ ma!
5 Jei Okumugwem Awaji Ogwukaan̄ Inyọn̄ mè Ijọn̄,
owu ore Awaji ebi Ijeren;
nan̄a keke sulu ebi ofifi ido osusut;
kakaan̄ ejit nsan me lek ebi ìkitọt ijo otitọt.
6 Ikakwun̄ geelek ema ekabe,
ekigbin kubọk ibo,
mè ikinya ikana ama.
7 Gban̄ inu ema ekigọkọ me otu isibi;
alọm òkup ema me otu ìbet lek oge akọn̄;
ema ekibe ke ene geege ìkakinọ inu ema ekitumu.
8 Ire, Okumugwem, owu ochak ema ichep,
mè inwe nkwọọk inyi otutuuk ido cha.
9 Awaji n̄a, owu ore unye n̄a;
owu ke mbakup ikpọ,
mije, owu Awaji ore uwu mgban akọn̄
òkikput emi lek.
10 Awaji n̄a, ogwu òmun̄ emi me chieen̄ mgbọ geelek,
mônu ininyan̄a emi,
mè irọ m̀mun̄ ibe ke ọmọ îtim ikpan̄ ebi ochicha n̄a.
11 Jei Okumugwem, agbọ òkikput eji lek,
kakpakpan̄ ema, inyi ebi n̄a ekawuuk;
kpan̄asi ikeya, sa unye kwun̄ yiyala ema,
mè ben ema tọbọ me ijọn̄.
12 Mije ijo inu ema esabe otu kiban̄ irọ,
mè otutuuk ikọ ema etumube,
rọ mè ugumulek kiban̄ ibọp ema kubọk ufe;
mije ogbo ema ekigbo mè ataak ema ekikan̄ cha,
13 naan̄ ejit jijaka ema.
Soso, jijaka ema san̄a kpai, mè ene geege kiban̄ ikasik,
ufuna ntutun̄ ere geelek me linyọn̄
eriọọn̄ ibe ke Awaji òwa me Ijeren okikpulu.
14 Ikakwun̄ geelek, ema ekabe,
ema ekigbin kubọk ibo,
mè ikinya ikana ama.
15 Ema ekijijen̄e ikana iweek inorie;
ire kpemun̄ irie ijot owot, mîra ikigọt.
16 Ire, ewelegwe geelek, mâkọt me okwa ibe ke owu okaan̄ unye;
mâtaan̄ ukpo ikọt okwa ibe
ke owu òkimumun̄ ene me chieen̄ mgbọ geelek;
owu ore uwu mgban akọn̄ òlet emi lek,
owu ochit emi mgbọ uyọrọlek otetbe emi.
17 Jei Awaji, ogwu unye n̄a,
mâkọt okwa itọn̄ owu,
mije, owu ore uwu mgban akọn̄ òkikput emi lek;
owu ore Awaji ogwu òkimun̄ emi me chieen̄.