Awaji okilet emi
Ìkup inyi ogwu òjeen̄ okwa: Mêsa nkwukwak echi olik ikwak. Okwa kè Debit.
61
Jei Awaji, soso, nọ ida ito n̄a,mè gban̄ utọn̄ me lek uriaak nkiriaak.
2 Ǹkup me okputut linyọn̄ ikigwen owu;
ǹkayaka ìkaan̄ utoon̄-ejit;
soso bene emi toon̄ me inyọn̄ ewuuk òbebene igak emi;
ere unan ìkpore emi lek.
3 Mije owu ore ere nlet n̄a;
owu ore uwu-oket ònyenye,
eyi òkikput emi lek me ubọk ebi ochicha n̄a.
4 Tele emi ǹluk me Uwu Mbuban kwun̄ ǹre mgbọ geelek;
chit emi me irak uwop kwun̄
kubọk unọn okichit ebi bọn.
5 Jei Awaji, owu onọ use nchieekbe owu;
owu onyi emi ìrot osun̄be inyi ebi ìkimin erieen̄ kwun̄.
6 Nyi ogwu ubọọn̄ ujọn̄ọ ugwem;
rọ inyi ọmọ ikup owuwa acha ikpulu me owuwa ukot.
7 Awaji tele ọmọ ikup me irak ubọk kwun̄
ikikpulu ijọn̄ọ mgbọ;
soso, kput ọmọ lek,
mije owu òkima ene mgbọ geelek,
mè igbe ogwu etoon̄be ejit me lek.
8 Sa me ikeya, mâkikọt okwa itọn̄ owu mgbọ geelek,
mè ikirọ use nchieekbe owu me usen me usen.