Itotoon̄ Awaji gaalek ejit me lek
Ìkup inyi ogwu òjeen̄ okwa: Ìkup inyi Jedutun. Okwa kè Debit.
62
Îre Awaji gaalek ke ngele lek ikikup ikpọ;ọmọ ore ogwu òkinyan̄a emi.
2 Ọmọ gaalek ore ewuuk òkikput emi lek;
ọmọ okinyan̄a emi;
ọmọ ore uwu mgban akọn̄ nkinin̄ ilet lek;
kpunu inu òbosisik emi ukot me ijọn̄.
3 Kpa mgbọ ke otutuuk kinyi ebetama ichit emi ire?
Enyi mîmun̄ ibe ke emi ǹnikup wekewekeweke
kubọk agba uwu òbebeke,
mè ikup kire ogọ òkijeje.
4 Me atikọ, inu enyi ekitọt
ìre isasan̄a emi me irek umin n̄a ito;
ikakan̄ ataak okitop enyi me lek;
enyi ekigbana ene me otu otu,
ire, me emen ejit kinyi, enyi ekigbogbo ene.
5 Îre Awaji gaalek ke ngele lek ikikpọ;
ọmọ ke ntoon̄ ejit me lek.
6 Ọmọ gaalek ore ewuuk òkikput emi lek;
ọmọ okinyan̄a emi;
ọmọ ore uwu mgban akọn̄ nkinin̄ ilet lek;
kpunu inu òbosisik emi ukot me ijọn̄.
7 Awaji okinyan̄a emi,
mè ikirọ emi imin;
ọmọ ore unye ewuuk òkikput emi lek;
Awaji ore ere nkilibi inin̄ ilet lek.
8 Ebi n̄a, ìtoon̄ Awaji ejit me lek mgbọ geelek;
ìkpa ufialek kinyi ìnyi ọmọ;
ọmọ ore ogwu òkilet eji lek.
9 Ebilene ekup kubọk oruk òkininiin̄ ichep;
ebi ilile mè ebi ijija ìre ubọk yaage;
ema kpekup me lek inu geege;
kpebekọt itoon̄ ema ejit me lek;
ire iroon̄ ema ikpọ,
ema kpekaan̄ ulobo ge ikeyi me lek.
10 Kasa inu obọkọbe ene me afa mè unye-ubọk ìbene ibot;
katoon̄ ejit me lek inu ochiin̄be me inọ;
ikerere inu ubọọn̄ kwun̄ ìkiwawa inyi isi,
kasa ìbieen̄ lek.
11 Nnọ Awaji otumube mgbọ ge mè itumu iso mgbọ iba
ibe ke unye ìre eyi kan̄;
12 ke ọmọ si ìkimun̄ ene me chieen̄ mgbọ geelek.
Jei Okumugwem, îre owu me lek kwun̄
okikpe ene geelek mkpukpe
ikpọ me lek ikwaan̄ îrọbe.