Awaji milọk emi
Okwa kè Debit mgbọ îkupbe me èwê agan̄ Juda.
63
Jei Awaji, owu ore Awaji n̄a;owu olọk emi enenen;
lek îwọ emi inyi iweweek owu;
ǹkiweek owu kubọk ebi ene ekiweek mun̄
me mgbọ ura.
2 Ntaak chieen̄ me Uwu Mbuban,
mè imun̄ ibe ke owu ìre ogwu unye,
mè ogwu òmimin.
3 Imumechieen̄ kwun̄ òkikup ire mgbọ geelek
înwọn igak igagat ugwem;
eya orọ nkisa otu n̄a itọn̄ owu.
4 Mâbe owu onirọ otutuuk usen ugwem n̄a;
mâbene ubọk iriaak uriaak ikigwen erieen̄ kwun̄.
5 Owu onyi emi atalek inorie ijọk eyi òsoso emi;
eya orọ nkikọt okwa ibele ejit itọn̄ owu.
6 Nsilaak me inyọn̄ mkpilaak,
ǹkakitele ikekeek inu ofolek kwun̄;
otutuuk eririeen̄ owu okikup emi me ejit,
7 bak me lek, îre owu okitap ubọk inyi emi mgbọ geelek;
eya orọ nkupbe me irak uwop kwun̄ ikinwọọn̄ unwọọn̄.
8 Ǹgọgọbọ owu ikam;
ubọk ulom kwun̄ si otetet emi inye.
9 Ebi geelek ìkiweek isasan̄a ugwem n̄a mêfon udọn̄-ufuun̄,
ere ebi ìkwakwaan̄ ekifon.
10 Ema mênin̄ me akọn̄;
ibo oron afa môtaka nkwukwu kiban̄.
11 Ire, ogwu ubọọn̄ mônwọọn̄ unwọọn̄ mije inu Awaji orọbe;
otutuuk ebi ìsa Awaji inyan̄a ibot mêtọn̄ Awaji,
mije, ọmọ môrọ otu ebi ataak ichit.