Uriaak ibebe Awaji ibem ene
Ìkup inyi ogwu òjeen̄ okwa. Okwa kè Debit.
64
Jei Awaji, gban̄ uyọrọlek n̄a nkikpa inyi owu;owot mifieek emi me lek ebi ochicha n̄a;
soso, bem emi.
2 Let emi san̄a me lek otitọt ebi ikpak ekilet itọt ibak emi,
mè ijo ekiket urum ebi ijo irọrọ ekikeek ofolek n̄a.
3 Ikọ otu kiban̄ ìkikpan̄ ene kubọk oge akọn̄;
usem kiban̄ ìkiriak inin̄ ene lek
kubọk oraan̄ ugwun̄ okupbe me otu.
4 Ema ekilileek isook ebi ata ife me uwuuk-lek;
kpetet ukpook.
5 Ge ìkirọ ge inye irọrọ ijo inu ema etọtbe;
ema ekikpa ubọk mênween̄be lek ikọọk ufe kiban̄;
ema ekibe, “Ìre ekene obomun̄ eji?”
6 Ema ekitọt ijo otitọt mè ikibe,
“Eji mîra itọt otitọt òtetet mun̄.”
Ekiket mè emen ejit ebilene midọk.
7 Ire, Awaji môsa oraan̄ eyi kan̄ isook ema me uwuuk-lek,
mè isak ema unan me ekakpọge chieen̄.
8 Môsa otu alọm kiban̄ gaalek itap ema me ichep;
ebi geelek ìmumun̄ ema mêkekitọp ibot.
9 Mgbọ ya, ebi ene mêkaan̄ ukpook;
ema mêkikpa ikwaan̄ Awaji osibe,
mè ikikeek inu îrọbe.
10 Ebi ata irọrọ, mênwọọn̄ unwọọn̄,
bak me lek inu Okumugwem orọbe;
ema mêtoon̄ ejit me lek kan̄;
ebi ata ife, mêtọn̄ ọmọ.