Itọtọn̄ Awaji
Ìkup inyi ogwu òjeen̄ okwa. Okwa kè Debit. Ebekikọkọt.
65
Jei Awaji, îgbe ibe etọn̄ owu me ama Sayọn,mè erọ use echieekbe owu eso.
2 Otutuuk ebilene mênu me lek kwun̄,
bak me lek, owu okinọ uriaak.
3 Mgbọ ijo inu kiji isitiik ibene eji me ibot,
îre owu okitele inyi eji.
4 Kpọ uga ubelejit òkup inyi ebi owu ogobobe,
mè itaba iriaak ibe eneluk
me emen Uwu Mbuban kwun̄;
ata inu òkinan̄a me uwu kwun̄ môjot eji owot.
5 Owu onọ ida kiji,
mè isi ikwaan̄ ukpook isa inyan̄a eji;
Awaji ogwu òkinyan̄a eji,
ebi ìluk me ntutun̄ ere geelek me linyọn̄,
mè ebi ìluk me isi okwaan̄ òkup me ujọn̄ọ ere,
etoon̄ owu ejit me lek.
6 Owu osa unye kwun̄ isun̄ ebi kè ogoon̄ me irek kiban̄,
ikisa ijeen̄ ibe ke owu okaan̄ unye.
7 Owu orọ ogbururu isibi me okwaan̄,
mè irọ ekoon̄ kan̄ iwọ,
mè isiki si okput ebi ido geelek me linyọn̄ ekitap.
8 Ebi ìluk me ntutun̄ ere geelek me linyọn̄
ekup me ukpook
bak me lek ikpele uyeke inu echi orọbe;
bene me agan̄ mbum-ura si re agan̄ ichep-ura,
inu orọbe îrọ ebi ene etaan̄ ukpo enwọọn̄ unwọọn̄.
9 Owu okikpọ linyọn̄ chieen̄ me lek
sa me ikekirọ ibot irep igwook me ijọn̄;
owu okirọ ijọn̄ inwọn isasa iwop inu;
mun̄ òjojot okwaan̄ kwun̄ okirọ ijọn̄ itibi mfut;
ikeya ke owu odọmọ isun̄ ibe ikup.
10 Owu okirọ ibot irep igwook me uko,
mè inisiki ijọn̄;
owu okisa unye otu ibot irọ ijọn̄ imem,
mè igbana mfut, ibe itibi.
11 Bak me lek ke owu onwọn,
owu okirọ irọrọkọ uko me acha geelek inwọn;
ere geelek ukot kwun̄ ojakbe,
inu ìkpọkpọ ikisibi.
12 Mbubet îgwook ichit emen èwê inyi anam ikitaka;
unwọọn̄ ìjojot agba ogoon̄ geelek.
13 Ebi kè arọọn̄ mîgwook ichit inyọn̄ mbubet gbak;
akpa îtibi ijot emen iteke gboi;
inu geelek ìnikitataan̄ ukpo ikọt okwa itọn̄ Awaji,
mè ikinwọọn̄ unwọọn̄.