Okwa uriaak mè itọn̄
Ìkup inyi ogwu òjeen̄ okwa. Okwa. Ebekikọkọt.
66
Enyi otutuuk ebi linyọn̄,ìsa me unwọọn̄ ìtaan̄ ukpo ìtọn̄ Awaji!
2 Ìkọt okwa ìsa ìmin erieen̄ kan̄;
ìtọn̄ ọmọ ibe ke ọmọ mimin.
3 Ìtumu ìnyi Awaji ibe,
“Inu owu okirọ ìkup uyeke uyeke;
unye kwun̄ îmin enenen;
ebi ochicha kwun̄ ekigele igwook me isi kwun̄,
bak me lek ukpook kwun̄.
4 Otutuuk ebi linyọn̄ ekitọbọ ebum inyi owu;
ema ekikọt okwa itọn̄ owu;
ekikọt okwa itọn̄ erieen̄ kwun̄.”
5 Ìna, ìnikpọ inu Awaji orọbe;
inu îrọbe inyi bọn ebilene ìkup uyeke uyeke.
6 Îrọ okwaan̄ ikana nchat ijọn̄,
ebi nte nte kiji ejeje ukot ukot isaba;
ere ya ke eji enwọọn̄ unwọọn̄ bak me lek inu îrọbe.
7 Ìkisa unye kan̄ ikpulu ire mgbọ geelek,
mè ikiruk chieen̄ ikpọ ebi ido geelek,
inyi ebi ìfefieek inan̄a me lek kan̄ ekagumu lek.
8 Ebi ido geelek, ìtọn̄ Awaji kiji;
ìtọn̄ ọmọ mè ebi ene enọ.
9 Ọmọ osun̄ eji me ògat ugwem;
ìkachieek ibe eji ekwaak erọn̄.
10 Awaji, owu oroon̄ eji ikpọ;
owu okala eji
kubọk alata okuket ewọpbe iren̄e me ukan̄.
11 Owu otele ibe eji erọn̄ ufe,
mè iben akpan òlolobo ikeme eji me ibot.
12 Owu otele ibe ebi ochicha kiji eje me inyọn̄ kiji;
eji mîje itibi emen ukan̄ mè emen mun̄ ile;
ire, owu osa eji inito me ere inu geelek ojotbe.
13 Mâsa ngwugwa ewọwọp inu me uwu kwun̄;
mâninyi owu inu nchieekbe use.
14 Mânyi owu inu cha echi ntumube me otu,
mè echi nchieekbe use mgbọ uyọrọlek otetbe emi.
15 Anam òmimiin̄ ufuk ke mbasa igwa ngwugwa ewọwọp iriọk inyi owu;
mâsa owuwa orie eriembuuk
mè orie ebot igwa ngwugwa utop olu inyi owu.
16 Otutuuk kinyi ebi ìkitet ukpook Awaji, ìna ìnigban̄,
inyi m̀kpa inu Awaji orọbe inyi emi ǹnyi enyi.
17 Ntaan̄ ukpo igwen ọmọ ibe itap ubọk inyi emi,
mè isa otu alọm n̄a igolo okwa itọn̄ ọmọ.
18 Mebe nkaan̄ ekiket ijo inu me emen ejit n̄a,
Okumugwem kpomogban̄ uriaak n̄a.
19 Ire, me atikọ, Awaji înọ ida n̄a,
mè igban̄ uriaak n̄a.
20 Mâtọn̄ Awaji, bak me lek, ìkajit uriaak n̄a;
ìkatele si imumun̄ emi me chieen̄ mgbọ geelek.