Okwa Itọn̄ 67

Okwa itọn̄ mgbọ irọkọ uko

Ìkup inyi ogwu òjeen̄ okwa: Mêsa nkwukwak echi olik ikwak. Okwa. Ebekikọkọt.

Awaji, soso, rọ eji nsan, mè gbana eji;

sa ata ejit kpọ eji chieen̄ me lek,

2 ufuna otutuuk ebi linyọn̄ eriọọn̄ ubọk owu okirọ inu,

mè ido geelek si iriọọn̄ ibe

ke owu okaan̄ unye okisa inyan̄a ene.

3 Jei Awaji, tele ebi ido geelek etọn̄ owu;

tele otutuuk ife geelek etọn̄ owu.

4 Ebi ido geelek, ìbele ejit,

mè ìkọt okwa ìnwọọn̄ lek,

mije Awaji îsibi unen oyerebet inyi ebi ido geelek,

mè ikisa ido geelek me linyọn̄ ije me oniin̄ òtatat.

5 Jei Awaji, tele ebi ido geelek etọn̄ owu;

tele otutuuk ife geelek etọn̄ owu.

6 Awaji, ogwu òre Awaji kiji,

îgbana eji enenen;

îrọ inyi ijọn̄ isibi mfut owuwa owuwa.

7 Awaji îgbana eji;

ebi geelek me linyọn̄ emin ọmọ.