Uriaak ogwu ekirọ ikeme
Nteme òkup inyi ogwu òjeen̄ okwa: Igọọk me ida okwa “Lili.” Okwa kè Debit.
69
Jei Awaji, nyan̄a emi ma!Mun̄ îmeen̄ emi ire ebek.
2 Nnwaan̄ ikam me emen utek;
kpunu ijọn̄ ònyenye geege ere mbakeke;
nrọn̄ me emen irem;
ekoon̄ otọtọp ichit emi.
3 Efuuk îta emi me owot inyi itataan̄ ukpo igwen owu;
amọn îriaan̄ emi me ebek;
chieen̄ îyok emi inyi ikukup ikikpọ
ibe owu Awaji n̄a ònonyan̄a emi.
4 Ebi ìchacha emi me ikpak
mîwa igak otu ifuk ukut ijeek ibot n̄a;
ebi ìkiweek ikpakpan̄ emi ìre ebi unye ebi unye;
ema ebe emi ǹyaka inu ikarege ǹchichiin̄ ǹnyi ema.
5 Jei Awaji, owu oriọọn̄ ibe ke emi mbubut;
kpunu si inu nrọbe ilọ òlelet me lek kwun̄.
6 Jei, Ogwukaan̄-ene
Okumugwem Ogwukaan̄ Inyọn̄ mè Ijọn̄,
kachieek ibe ǹsa esip ǹtet ebi ìtoon̄ owu ejit me lek;
jei Awaji ebi Ijeren,
kachieek ibe ǹsa esip ǹtet ebi ìkitọbọ ebum inyi owu.
7 Mîrọ emi inu ochak bak me lek kwun̄,
esip îjot igak emi isi.
8 Ebi ngwan̄ n̄a emọnọ emi kire ogwu ichen;
bọn nga n̄a gaalek
eyaka inimọnọ emi kubọk ogwu ofifi ido.
9 Ulọk nkaan̄be me lek uwu kwun̄
ìkiyok emi me ejit kire ukan̄;
unyechieen̄ ekinye inyi owu
ìkinirurọn̄ọ itoon̄ emi me lek.
10 Nsikisiki lek me isi kwun̄, mè ijin otu,
ebi ene mîra ikisa eya si ikinye chieen̄ inyi emi.
11 Ìrere ekwut ufieejit ke nsa ibala lek,
ema ekichachak emi ochak si.
12 Ebi ìkup me lek oniin̄ ekilolo emi;
ebi usa-miin̄ si ekikọkọt emi me lek okwa.
13 Eyi n̄a, îre owu, Okumugwem,
ke nkiriaak uriaak ikpọ isi;
soso, Awaji, me mgbọ înenbe owu me lek,
rọ otu uriaak n̄a nyi emi,
bak me lek imumechieen̄ kwun̄ òkibia ene me lek;
mè use ochieekbe inyanyan̄a ene, eyi ìkakilọ.
14 Taba emi sibi, ufuna nkagwọt ìchep me utek;
nyan̄a emi me ubọk ebi ochicha n̄a,
mè nyan̄a emi sibi me emen irem.
15 Kachieek ibe ekoon̄ itọp ichit emi;
kachieek ibe ǹgen ǹchep me emen irem;
kachieek si ibe udọn̄ mkpa ikama otu imen emi.
16 Jei Okumugwem, rọ otu uriaak n̄a nyi emi,
mije, imumechieen̄ okikaan̄
me lek ene mgbọ geelek înwọn;
sa me ikpele ejit nsan kwun̄, yaka isi jeen̄ emi.
17 Kada isi kwun̄ ìsan̄a me lek gwun̄ ikwaan̄ kwun̄,
mije, uyọrọlek îtet emi enenen;
gwat lek rọ otu uriaak n̄a nyi emi.
18 Je gbet emi lek,
mè faka emi sibi;
nyan̄a emi sibi me ubọk ebi ochicha n̄a!
19 Owu oriọọn̄ unyechieen̄ nkibọkọ,
mè esip òkitet emi,
mè ulibi òtata emi me lek;
owu omọọn̄ otutuuk ebi ochicha n̄a.
20 Unyechieen̄ enyibe emi òkifuku emi owot,
mânigak iweek;
ntoon̄ ejit ibe ke mêto emi njijin,
ire, kpunu ogwu mmun̄be;
mkpọ chieen̄ ibe ke môkaan̄ ebi mêkatbe emi ejit,
ire, ǹkamun̄ ene geege.
21 Mgbọ uraafiọọn̄ otakabe emi,
ema enyi emi inorie òkijajat kubọk olulut;
mgbọ ebek orakbe emi,
ema enyi emi miin̄ agburu.
22 Tele mè inorie kiban̄ inwaan̄ ema me ebek;
tele si mè inorie ijọk ema ekirie
ire inu òboda ema ito.
23 Tele mè chieen̄ kiban̄ idun,
inyi ema ekayaka ìmọọn̄ inu;
rọ mè ebon kiban̄ ikwala,
mè iyiyeke mgbọ geelek.
24 Gbuku uga unaan̄-ejit kwun̄ gwook ema me lek,
mè kachieek ema elibi
enwọnọ uyok uyok unaan̄-ejit kwun̄.
25 Tele ebi ene eyat eta me ama kiban̄,
mè ene geege ikaluk me uwu kiban̄.
26 Mije, ema mîsisaak ebi owu osulube osusut,
mè ilo ebi owu otapbe unan me lek.
27 Fuk ikan ijo irọrọ kiban̄ tutọmọ ema me ibot,
mè kanyanyan̄a ema mgbọ geege.
28 Tuku erieen̄ kiban̄ san̄a me emen ikpa eyi ugwem;
kafuk ema ìtap me otu ifuk ebi ata irọrọ.
29 Ire, emi gwa ǹkibọkọ ukwook mè ujaralek;
jei Awaji, nyan̄a emi,
mè bene emi gwuun̄.
30 Mâkọt okwa isa itọn̄ erieen̄ Awaji;
mâbe ọmọ onirọ, mè isa me ikeya imin ọmọ.
31 Eyi môtọp Okumugwem me lek
igak inyinyi orie eriembuuk,
mè isasa orie eriembuuk
òmimin mè ikaan̄ iko me ibot,
mè ikpa me ukot, igwa ngwugwa inyi ọmọ.
32 Ebi ekirọ ikeme isimun̄ eyi,
ejit môbele ema;
ebi ìkitọbọ ebum inyi Awaji isimun̄ si,
ejit môtop ema.
33 Okumugwem ìkinọ uriaak ebi una;
ìkakiwuuk ebi eyi kan̄ ebi ìkup me mkpọn.
34 Inyọn̄ mè ijọn̄, mè okwaan̄,
mè inu geelek òkup me emen kiban̄,
ìtọn̄ Okumugwem.
35 Awaji mônyan̄a Sayọn,
mè ikpọk inama ama ebi Juda;
bọn ikwaan̄ kan̄ mêluk me ere ya,
mè ibọkọ ikaan̄.
36 Bọn ebi ikwaan̄ kan̄ mêbọkọ ere ya ikaan̄ si me ìrot;
ebi ìmama erieen̄ Okumugwem mêluk me ere ya.