Uriaak mgbọ ùrioon̄ onin̄be me ido
Ijeen̄-inu kè Asafu.
74
Jei Awaji, ìre òbojijit eji ire mgbọ geelek?Keke orọ unaan̄-ejit kwun̄ oyokbe me lek kiji
ebi ìrere arọọn̄ owu okiriọọn̄ ubọk ikpukpo?
2 Kawuuk ebi eyi kwun̄;
ebi owu ogobobe karake akat isun̄ inyi lek kwun̄;
ebi owu onyan̄abe isibi ibe ere otoko eyi kwun̄;
kawuuk si ogoon̄ Sayọn, ere mgbọ owu okiluk.
3 Sibi na je kana kpọ ere ejijakabe isan̄a;
ebi ochicha kiji mîfiat inu geelek
òkup me Uwu Mbuban isan̄a kpai.
4 Ebi ochicha kwun̄ mîkput okput unwọọn̄ ntim-mkpan̄
me emen Uwu Mbuban;
ema mîgwuun̄ egop kiban̄
kire inu ijejeen̄ ibe ke ema mîtim ikpan̄.
5 Ema mîgbugbọ ere igwook
kubọk ebi ìcho uti ekibene otuban ichon uti me oron.
6 Otutuuk uti ekọbe lek ijaan̄ cha,
ema mîsa otuban òkup esese esese
ibọn̄ ikpukpuku isan̄a kpai.
7 Ema mîjijaka Uwu Mbuban kwun̄,
mè ichim ukan̄ itap me lek;
ema mîchaka mbuban me ere ekitọbọ ebum inyi owu.
8 Ema ekibe ke ema mêjijaka eji isan̄a isi ge,
mè iwọp otutuuk ere mbuban me ama kiji itaka iriọk.
9 Owu òkayaka ìrọ uyeke inu cha geege okirọ inyi eji;
eji kpeyaka ikaan̄ ebi nriran geege;
ene kiji geege ìkariọọn̄ mgbọ inu chi obokup ire.
10 Jei Awaji, kpa mgbọ ke ogwu ochicha obochak owu ire?
Ìre ema ebechim owu ubọk me chieen̄ ibia
ire mgbọ geelek ni?
11 Keke orọ okpọkpọ ikat ubọk me lek ikikpọ,
òkasut ema osusut?
Keke orọ obenbe ubọk kwun̄ itap me agbagba ukot,
mè ikikpọ ife chi chieen̄ chieen̄?
12 Awaji kiji, owu ore ubọọn̄ karake akat;
owu okinyan̄a eji owuwa mgbọ me lek ijọn̄ yi.
13 Owu osa ikpele unye kwun̄ iche okwaan̄ okpọkọ iba,
mè ikpukpuku ibot mgbugbo anam ejit okwaan̄.
14 Owu okpan̄ mgbugbo anam ejit okwaan̄ ya,
mè isa ufuk kan̄ inyi ebi kè anam oron
ìluk me emen èwê esa erọ inorie.
15 Owu orom ogbuuruk mè agbugbuk ibe ikigbuk;
owu oyaka irọ mè okwaan̄ òkigbugbuk ichiaak ita.
16 Owu orom eririeen̄ mè irom egwe;
owu osun̄ ura mè inu geelek òkinyi utoon̄
me irek kiban̄.
17 Owu osun̄ okike eyi linyọn̄,
mè irom mgbọ ura mè mgbọ ibot.
18 Jei Okumugwem, kawuuk ibe ke ebi ochicha mêkichak owu,
ke ebi kperiọọn̄ owu mêkikpọ owu isiki chieen̄.
19 Ebi eyi kwun̄ kpekọt inyan̄a lek kiban̄;
eya orọ, kayaka ema ìtap me ubọk ebi ochicha;
kawuuk ebek ugwem ebi eyi kwun̄
ebi ekisisaak ìre mgbọ geelek.
20 Keek inyan̄a-ibot kwun̄ melek kiji;
kpọ, inu afa òkirọ me ndudun ere geelek me inyọn̄ ijọn̄ yi.
21 Kachieek ibe esip itet ebi ekitutuku;
rọ mè ebi ugbọọn̄ mè ebi una etọn̄ owu.
22 Jei Awaji, nan̄a keke, na gbini ikọ ibot kwun̄;
kawuuk ibe ke ebi kperiọọn̄ owu
ekichak owu ochak otutuuk usen.
23 Kawuuk ukpo unaan̄-ejit ebi ochicha kwun̄ ekitaan̄;
kawuuk okput ebi oriara kwun̄ ekikput mgbọ geelek.