IKPA ÒSO ITA
Okwa 73–89
Ata oyerebet Awaji
Okwa kè Asafu.
73
Me atikọ, Awaji înwọn enenen inyi ebi Ijeren;înwọn inyi ebi ejit otanabe me lek kan̄.
2 Sọntiik osik emi kpamayaka itoon̄ ejit me lek kan̄;
kpamayaka ichieek si me lek kan̄.
3 Mije, mmin ejit me lek ebi ugumulek,
mè ikaan̄ chieen̄ ile
mgbọ inu okije ijaan̄ me lek ebi òkpaka ibot.
4 Ema kpekikaan̄ ufiak;
lek kiban̄ ìkinyenye, mè òtibi ufuk òjot.
5 Ema kpekibọkọ ukwook kubọk otutuuk ebilene ekibọkọ;
uyọrọlek ìkakitet ema kubọk îkitet otutuuk ebilene.
6 Eya orọ, ema ekigumu lek kubọk etap akalari me ebek,
mè èkerọ inu afa afa mgbọ geelek.
7 Ema mîmiin̄ ufuk mege ufuk osisibi ema me chieen̄,
ire, ijo otitọt ojot ema ejit.
8 Ema ekirọ ebi ofifi ife ochak,
mè ikitumu ijo inu ema eberọ;
ema ekigumu lek ikitọt irọrọ ikeme ebi ofifi ife.
9 Ema ekitumu Awaji òkup me inyọn̄ ifiat,
mè ikitọ ikọ inyi ebilene me linyọn̄.
10 Eya orọ, ebi eyi Awaji ekakana igọọk ema,
mè ikichieek inu geelek ema ekitumu.
11 Ema ebi òkpaka ibot cha, ekitumu ibe, “Awaji ìbojeje iriọọn̄ ni?
Ogwu Òbebene Ichit ìbojeje iweek imun̄ ni?”
12 Ubọk ebi òkpaka ibot ekupbe ire eya,
kpekimun̄ ufialek geege;
ema mîbọọn̄ ubọọn̄,
mè ikpọkpọ ikibọọn̄ si itoon̄ urot.
13 Ǹkifafiat mgbọ ichep ikiluk ugwem òtatana;
me ikike ke nkikaak ubọk ijeen̄ Awaji ibe ǹkalọ.
14 Uyọrọlek ìkatele emi usen geege;
ewelegwe geelek ǹkibọbọkọ osusut.
15 Ire ntumu inu òkup ikecha,
ǹkifiaan̄ nsabọn ebi eyi kwun̄
ebi ìbenu me mgbọ òkup me isi.
16 Nsa ikọkọt ikeek inu yi itet,
ire, îyọt me lek n̄a enenen.
17 Ire, mgbọ nnin̄be Uwu Mbuban Awaji,
mgbọ ya ke nnigobo itet
inu òborọ ebi òkpaka ibot
me okputut ugwem kiban̄.
18 Me atikọ, Awaji ìbosun̄ ema me ere òkikwakwaak,
mè irọ ema erurọn̄ọ ekwaan̄ esan̄a kpai.
19 Mgbọ yaage ke mêfiat ema isan̄a kpai;
ikpele ukpook mônin̄ inyi ema
me okputut ugwem kiban̄.
20 Okumugwem, owu ositọbọ ijibi,
ebi òkpaka ibot mêniniin̄ ichieen̄
kubọk ene okinan̄a ilaak ewelegwe,
mè iwuuk ilaak îmun̄be mè eririeen̄.
21 Mgbọ ejit oyokbe emi me lek kiban̄,
owot si ofukube emi,
22 nkana mbubut kubọk anam oron;
kpunu inu geege nkọtbe igobo itet ofolek kwun̄.
23 Ire, ǹkanan̄a ìtele owu mgbọ geege;
owu òtetet emi me ubọk n̄a agan̄ ulom ikaan̄.
24 Nteme kwun̄ ke osa ikijeen̄ emi oniin̄;
òta kan̄, owu môto emi me irek umin.
25 Ekene ke nkaan̄ me emen inyọn̄, ilọ me lek kwun̄ Awaji?
Kpunu si inu geege mweekbe me linyọn̄ igak owu.
26 Akpalek n̄a mè ejit n̄a môwọ,
ire, Awaji ore unye n̄a;
ọmọ gaalek ore ogwu mâweekbe
ire mgbọ geelek.
27 Me atikọ, ebi ìkpekpebe owu lek me lek
kpebelọlọ ichechieen̄ ita;
ebi kpegwuun̄ isi ikeke inye me lek kwun̄,
owu môjijaka.
28 Ire, me lek n̄a, înwọn ikukup iriaak Awaji me lek,
mè inwọn si itatap ibot me ubọk Okumugwem,
inyi mâkikpa inu echi
Ogwukaan̄-ene orọbe isibi.