Uriaak eriaakbe inyi ogwu ubọọn̄
Okwa kè Solomọn.
72
Jei Awaji, jeen̄ ogwu ubọọn̄ ubọk owu okisibi unen oyerebet kwun̄,mè rọ ọmọ iriọọn̄ ata irọrọ kwun̄.
2 Kè ọmọ isa ata irọrọ ikpulu ebi eyi kwun̄,
mè ikisibi oyerebet ònenen inyi ebi ekitutuku.
3 Kè ijọn̄ isibi inu ubọọn̄ bene me lek ogoon̄ re lek orioon̄;
kè ebi eyi kwun̄ ekerọ ata irọrọ.
4 Kè ogwu ubọọn̄ isibi unen oyerebet
inyi ebi ugbọọn̄ me etete ebi kwun̄,
mè inyan̄a ebi una isibi,
mè ikpukpuku ebi ìkirọ ikeme ene.
5 Jei Awaji, kè ebi eyi kwun̄
etọbọ ebum enyi owu me ukot geelek,
kubọk ura mè onyan̄ ebekup ire mgbọ geelek
me akpa isinyọn̄.
6 Kè ukot mgbọ eyi ogwu ubọọn̄
ire ata mgbọ inyi ebi eyi kan̄,
kubọk ibot okirọ mbubet egbọbe itibi ijaan̄;
kubọk ibot otu ile okirep imem ijọn̄.
7 Kè ata irọrọ iso ere me ukot eyi kan̄,
mè esuuk ikup ire mgbọ geelek, mgbọ geelek.
8 Kè ama ubọọn̄ kan̄ iwele
inan̄a me okwaan̄ ge ichak me ofifi okwaan̄,
mè inan̄a me okwaan̄ Yuferetis
iwele ichak me ntutun̄ ere geelek me linyọn̄.
9 Kè ebi ìluk me emen èwê etọbọ ibot enyi ọmọ,
mè ebi ochicha kan̄ erurọn̄ọ me achiaan̄!
10 Kè ebi ubọọn̄ Tasis mè ebi ubọọn̄ lek achọ
ekpe mkpukpe enyi ọmọ;
kè ebi ubọọn̄ Sieba mè ebi ubọọn̄ Seba
esa mkpukpe ejet ọmọ.
11 Kè otutuuk ebi ubọọn̄ erurọn̄ọ me isi kan̄,
mè otutuuk ido ekesi ikwaan̄ enyi ọmọ.
12 Ọmọ okinyan̄a ebi ugbọọn̄
ìkigwen ọmọ ibe ininyan̄a ema,
mè ebi una, mè ebi kpekaan̄
ogwu òkitap ubọk inyi ema.
13 Ọmọ okito ebi ijo irek mè ebi ugbọọn̄ njijin,
mè ikinyan̄a ebek ugwem ebi una.
14 Ọmọ okinyan̄a ema me ubọk ebi ìkitutuku ema,
mè ebi ìkirọ ema inu me lek afa afa;
ugwem kiban̄ îkup me unye otu ewe me lek kan̄.
15 Kè ogwu ubọọn̄ iluk ujọn̄ọ ugwem;
kè ebi Sieba esa alata araran̄ ekpe mkpukpe enyi ọmọ;
kè ebi ene eriaak uriaak mgbọ geelek me ibot kan̄,
mè ebeek usen geelek ibe Awaji igbana ọmọ!
16 Kè akpa iwa ijot ama gboi,
mè inu ewopbe itibi ichit inyọn̄ ogoon̄ gbak;
kè ito mfut igak lek
kubọk echi òkito me lek ogoon̄ ido Lebanọn;
mè ebilene emumana ejot ama gbak
kubọk inwan̄ okitibi ijot oron.
17 Kachieek ibe erieen̄ kan̄ ichep;
kè etip kan̄ itaan̄ ijọn̄ọ mgbọ enenen;
kè otutuuk ido ekebeek ibe Awaji igbana ema
kubọk îgbanabe ogwu ubọọn̄.
18 Itọn̄ ikup inyi Okumugwem, Awaji ebi Ijeren;
ọmọ gaalek ore ogwu òkirọ uyeke inu.
19 Ìtọn̄ erieen̄ kan̄ òmimin ìre mgbọ geelek;
kè otutuuk linyọn̄ etọn̄ ọmọ;
Ikup ikeya! Ikup ikeya!
20 Ere keyi ke uriaak kè Debit gwun̄ kè Jesi ota.