Okwa ogwu oka ugane
71
Jei Okumugwem, ǹtap ibot n̄a me lek kwun̄ ibe owu òbem emi;mege ire mgbọ geelek, kachieek ibe esip itet emi!
2 Sa me ata irọrọ kwun̄ tap ubọk nyi emi,
mè nyan̄a emi sibi;
nọ ida n̄a,
mè nyan̄a emi!
3 Re ewuuk òkikput emi lek,
inyi ǹkennu me lek kwun̄ mgbọ geelek
nyi ida ibe enyan̄a emi,
mije, owu ore ewuuk òkikput emi lek,
mè uwu mgban akọn̄ òkilet emi lek.
4 Jei Awaji n̄a, taba emi sibi me ubọk ebi òkpaka ibot;
san̄a emi me irak unye ebi ijo irọrọ,
mè ebi kpekaan̄ ejit nsan.
5 Mije, owu, Ogwukaan̄-ene Okumugwem
ke ntoon̄ ejit me lek;
owu ke mbieen̄ ejit me lek karake nrebe sọn̄ gwun̄.
6 Owu ke mbieen̄ lek me lek karake emanbe emi;
îre owu osan̄a emi me owot nga n̄a isibi;
eya orọ, ǹkitọn̄ owu mgbọ geelek.
7 Ugwem n̄a ìre inu ukechieen̄ inyi owuwa ene,
ire, owu ore ikput-lek ònyenye inyi emi.
8 Otu n̄a îjot me itọtọn̄ owu,
mè itutumu umin kwun̄ isibi usen geelek.
9 Karieen̄ emi ìto mgbọ keyi ukan orebe emi lek;
kakpọ emi ìlọ chieen̄ mgbọ keyi unye otabe emi me lek.
10 Kpọ, ebi ochicha n̄a mêkitumu ikọ ikeme emi;
ebi ìkiweek ikpakpan̄ emi mêkinin̄ oru ikana emi.
11 Ema ekibe, “Awaji îkpọ ọmọ ilọ chieen̄;
eji egọọk ọmọ, mè etet,
ke kpunu ogwu òboninyan̄a ọmọ isibi.”
12 Jei Awaji, kakup ìjọn̄ọ ere me lek n̄a;
jei Awaji n̄a, gwat lek na, na tap ubọk nyi emi!
13 Tim kpan̄ ebi ìchacha emi,
mè fiat ema;
sa esip ògak esip tet ebi ìkiweek ifafiat emi,
mè san̄a ema ulibi me lek.
14 Eyi n̄a, mâtoon̄ owu ejit me lek mgbọ geelek,
mè ikpọkpọ owu ikitọn̄.
15 Otu n̄a môtumu ata inu okirọ inyi emi,
usen geelek, mâkikpa si ikwaan̄ unyan̄a okisi;
ikwaan̄ chi îwa igak emi irọriọọn̄ otu ifuk kiban̄.
16 Mâje me unye eyi kwun̄,
Ogwukaan̄-ene Okumugwem;
mâtumu ata inu eyi okirọ isibi;
ata inu eyi owu gaalek okirọ.
17 Jei Awaji, karake nrebe nsabọn irieen̄,
owu okijeen̄ emi uyeke ikwaan̄ okisi;
ikeya si ke nkikpa inyi ebi ene abayaage ire mgbọ keyi.
18 Mgbọ keyi si ukan orebe emi lek,
isọọn̄ ogbakabe emi ibot,
jei Awaji, kakpọ emi ìlọ chieen̄,
mege mâkpabe unye okaan̄be inyi ebi ukot keyi,
mè ikpa si inyi ebi ukot òkinu.
19 Jei Awaji, ata irọrọ kwun̄ îmin ire akpabin inyọn̄;
owu orọ ikpele inu;
kpunu ogwu òbet lek kwun̄.
20 Owu orọ ibe m̀mun̄ ikpele ufialek,
mè m̀bọkọ uga kwulukwulu;
ire, owu môgwu emi ikom;
owu môkpọk inyi emi efuuk;
òkpochieek ibe ǹkwu ǹnin̄ udọn̄.
21 Soso, kat emi ejit me agan̄ geelek,
mè rọ emi m̀min ǹgak ike nkupbe.
22 Emi mâfit uneen̄ ile isa itọn̄ owu,
mije ke owu ogbe utoon̄-ejit;
jei Awaji n̄a, mâfit si uneen̄ ija
isa itọn̄ owu ogwu òkup me mbuban;
owu ogwu ebi Ijeren ekitọbọ ebum inyi.
23 Mâtaan̄ ukpo inwọọn̄ unwọọn̄,
mè ikọt okwa itọn̄ owu;
otutuuk akpalek n̄a eyi owu onyan̄abe isibi
môtọn̄ owu si.
24 Otutuuk egwe usen,
otu alọm n̄a môtumu ibe owu okirọ inu ònenen,
mije, esip îtet ebi ìkiweek ifafiat emi;
ulibi si îta me lek kiban̄.