Awaji ogwu mbem kiji
91
Ogwu òtap ibot me ere nlet eyi Awaji Ogwu Òbebene Ichit,ìbokup me irak okwukwek
eyi Awaji Ogwu Òkaan̄ Unye Geelek.
2 Ene ya môkọt itumu inyi Okumugwem ibe,
“Owu ore ere nlet n̄a
mè uwu mgban akọn̄ òkikput emi lek;
owu ore Awaji n̄a;
owu ke ntoon̄ ejit me lek.”
3 Awaji môsan̄a owu isibi me otu ufe ogwu òtip ufe,
mè inyan̄a owu me ubọk orukan̄ òkikpan̄ ene.
4 Awaji môsa akukọ uwop kan̄ iwele ichit owu lek;
owu môlelet lek kwun̄ me irak uwop kan̄;
atikọ Awaji obokwek owu lek
kubọk agbọ mè mgban akọn̄.
5 Owu òkpofieek owot me lek inu ukpook òkitet ene me eririeen̄,
mè ìre oraan̄ mkpa ekisook ikana me ikarek,
6 mè ìre inu òkikpan̄ ene me emen ekpuk udun,
mè ìyaka ire mfiat òkisa mkpa inu me ejit ikarek.
7 Obop ene mêrurọn̄ọ ikwaan̄ mè agba lek kwun̄;
akọp obop ene mêrurọn̄ọ ikwaan̄ me agan̄ ulom kwun̄;
ire, unan ge ikeyi ìkposak owu me lek.
8 Ire, owu môsa chieen̄ kwun̄ gaalek ikpọ,
mè imun̄ osusut Awaji okinyi ebi òkpaka ibot.
9 Bak me lek ke owu osa
Okumugwem ogwu òkilet emi lek,
òrere Ogwu Òbebene Ichit, irọ ere iluluk kwun̄,
10 ijo inu geege ìkabore owu lek;
kpunu si mfiat geege òboje igbet ere owu olukbe.
11 Mije Awaji môto ebi osat kan̄ ibe ekpọ owu chieen̄ me lek;
ema mêkibem owu me ere geelek ojebe inin̄.
12 Ema mêben owu ikaan̄ me ubọk kiban̄,
ufuna ukot kwun̄ ikatọbọ me lek ewuuk.
13 Owu môtim ikpan̄ ebi ochicha kwun̄,
ema ikenyenye lek kubọk egbe àtat,
mè imin iwot me lek kubọk ulu,
owu òbojajak ema ikpan̄ isan̄a kpai.
14 Awaji ìbe, “Eyi omumun̄ emi me chieen̄,
mânyan̄a owu;
mije owu oriọọn̄be erieen̄ n̄a,
mâbene owu isaba ibot ebi ochicha kwun̄.
15 Osigwen emi ibe ǹnyan̄a owu,
emi mânyan̄a owu;
ufialek itet owu,
mâkup me agba lek kwun̄;
mânyan̄a owu isibi,
mè inyi owu umin.
16 Mânyi owu ujọn̄ọ ugwem, isasa ikpe owu mkpukpe,
mè inyan̄a owu,
inyi owu òmun̄ ubọk nkinyan̄a ene.”