Okwa itọtọn̄ Awaji
Okwa itọn̄. Ebekikọt me Usen Mbuban.
92
Îjaan̄ ibe ekenyi owu Okumugwem itọn̄,mè ekekọt okwa esa emin owu Ogwu Òbebene Ichit.
2 Îjaan̄ ibe etumu esibi me otu ewelegwe geelek
ibe ke owu omun̄ ene me chieen̄,
mè eketumu si me otu ikakwun̄
ibe ke owu ogbe ogwu etoon̄be ejit me lek.
3 Îjaan̄ ibe ekekwak uneen̄ ija,
mè ekefit uneen̄ ile esa ekekọt utop okwa cha.
4 Jei Okumugwem,
ikpele ikwaan̄ owu okisi
okirọ ejit ibele emi;
bak me lek inu echi owu orọbe ke nkikọt okwa.
5 Jei Okumugwem, ekiket kwun̄ îdọk enenen;
ikwaan̄ kwun̄ ìkup uyeke uyeke!
6 Ebi burubut kpebekọt iriọọn̄;
ebi welewele kpebekọt igobo itet ibe,
7 ubọk geelek ebi òkpaka ibot ekitibi kubọk mbubet,
ebi ijo irọrọ si ekekibọọn̄ ubọọn̄,
ke owu môjijaka ema isan̄a ire mgbọ ikakaan̄ge itata.
8 Ire, owu Okumugwem, òkup me irek òbebene ichit
isi ire mgbọ geelek.
9 Kpọ, ebi ochicha kwun̄, jei Okumugwem,
kpọ, ebi ochicha kwun̄ mêkwaan̄ ita;
owu môyiyala si ebi ijo irọrọ.
10 Owu orọ lek n̄a ikon kubọk iko eriembuuk òkiweek ikọ;
owu otọkọ emi ayaya aran̄ me ibot
isa igobo emi isun̄ esese inyi lek kwun̄.
11 Nsa chieen̄ n̄a imun̄ ubọk otimbe ikpan̄ ebi ochicha n̄a;
nsa utọn̄ n̄a inọ ebi ijo ife ìkinu emi akọn̄ me lek ekito ito.
12 Ebi ata irọrọ mêjaan̄ lek kubọk uti asaak;
ema mêmiin̄ kubọk uti olik echi oron Lebanọn.
13 Ema ekup kubọk uti ewopbe
me oyet egep Uwu Mbuban Okumugwem;
inu geelek ìkekije ijaan̄ me lek kiban̄
me oyet egep Awaji kiji.
14 Ema mêkito mfut me ukan;
ema ebekpọkpọ ikisek,
mè ikikup njijoon̄ njijoon̄ mgbọ geelek.
15 Eyi ìkijeen̄ ibe ke Okumugwem
ìre ogwu òkirọ inu ònenen;
ọmọ ore ewuuk òkikput emi lek;
kpunu inu geege me emen kan̄ eyi ìkagọọk me ata irọrọ.