Awaji ore ubọọn̄ òmimin ichit
99
Okumugwem ore ubọọn̄;kè ebi ido geelek efieek owot mè ekeran;
ogboon̄ ubọọn̄ îkupbe me inyọn̄,
ebi mbem emen inyọn̄ ebeme ikaan̄;
kè otutuuk linyọn̄ isisik.
2 Okumugwem okaan̄ unye ichit me Sayọn;
ọmọ okikpulu ebi ido geelek me linyọn̄.
3 Ebi geelek mêtọn̄ ọmọ,
mije erieen̄ kan̄ òmimin enenen
mè ikup nriki nriki;
erieen̄ kan̄ ìkup me mbuban.
4 Awaji, owu ìre ubọọn̄ òkaan̄ ikpele unye;
owu oma ikekirọ inu ònenen;
owu onyi ikan òkijeen̄ ubọk ebekirọ inu inen;
owu osun̄ ata irọrọ mè unen oyerebet
me etete bọn kè Jekọp.
5 Ìrọ Okumugwem Awaji kiji ìmin;
ìtọbọ ebum ìnyi ọmọ me isi inu ọmọ osabe ibene ukot,
mije ọmọ îkup me mbuban.
6 Mosis melek Erọn me otu ifuk ebi ngwugwa kan̄;
Samien si me otu ifuk ebi ìrariaak ọmọ;
ema mîriaak uriaak igwen Okumugwem;
ifọfọọk ema otu.
7 Awaji ìkup me emen ujọn̄ọ efit oduku inyọn̄
itumu ikọ inyi ema,
ema esusun̄ otutuuk nteme mè ikan înyibe ema.
8 Okumugwem Awaji kiji, owu ofọọk otu uriaak kiban̄;
owu ojeen̄ ema ibe ke owu ìre Awaji òkitele ijo kiban̄;
ire, owu okekisulu ema osusut
me inu geelek ema erọbe owu ilọ.
9 Ìrọ Okumugwem Awaji kiji ìmin;
ìtọbọ ebum ìnyi ọmọ me ogoon̄ îgobobe inyi lek kan̄,
mije Okumugwem Awaji kiji ìre ogwu òkup mbuban.