Ikwaan̄ unyan̄a eyi Awaji osibe
111
Ìtọn̄ Okumugwem!Emi mâtọn̄ Okumugwem me otutuuk ejit n̄a;
mâtọn̄ ọmọ me ere ebi kan̄, ebi ata irọrọ, etitiin̄be.
2 Inu Okumugwem orọbe, mimin;
otutuuk ebi inu cha otopbe me lek
ekikeek ekiket ofolek.
3 Otutuuk ikwaan̄ kan̄ ìkijeen̄ ibe
ke ọmọ îkaan̄ umin ubọọn̄ mè òrirọ;
ọmọ ìbokirọrọ ata inu inyi ebilene ire mgbọ geelek.
4 Okumugwem îrọ inyi ebilene ekekeek
ikwaan̄ ukechieen̄ ọmọ osibe mgbọ geelek;
ọmọ ìre ogwu ata ejit mè ogwu ejit nsan.
5 Înyi ebi ìkimin ọmọ inorie;
ìkakisa inyan̄a-ibot kan̄ ìfit ifit mgbọ geege.
6 Îbọkọ ijọn̄ ebi ofifi ido isa inyi ebi eyi kan̄ me ìrot,
mè isa me ikeya irọ inyi ebi eyi kan̄ eriọọn̄ unye kan̄.
7 Inu geelek îkirọ ìkitatat mè onen;
owu môkọt itoon̄ ejit me lek inu geelek îtọbe ibe erọ.
8 Inu cha si môkup ire mgbọ geelek;
îre me atikọ mè oniin̄ òtatat ke îtọ ibe erọ inu cha.
9 Ọmọ îfaka ebi eyi kan̄ isibi.
Inyan̄a-ibot înyan̄abe melek kiban̄
môkup ire mgbọ geelek;
erieen̄ kan̄ îkup mbuban mè ikaan̄ nnyirinya me lek.
10 Ogwu òtet ukpook me lek Okumugwem,
ene ya îbene ikaan̄ iriọọn̄-inu;
otutuuk ebi ìkirọ inu îtọbe ibe erọ,
ebiba ekikaan̄ ata ngobo-ntet;
ebilene ebekitọtọn̄ Okumugwem
ire mgbọ geelek.