19
Ogwu ugbọọn̄ òkakaan̄ ulibi inyi lek kan̄,înwọn igak ogwu mbubut
òkitumu ikọ bukubukubuku.
2 Ikeya si, ene ikukup ìkakaan̄ ifuk-ibot, ìkanwọn;
mfufet ukot ije ìkisa ene itap me ijo inu.
3 Ene isisa burubut ijijaka ugwem kan̄ isan̄a,
ìyaka inikinaan̄ ejit inyi Okumugwem.
4 Inu ubọọn̄ ìkitaba owuwa unene inu,
ire, ugbọọri ìkilililaba unene isan̄a.
5 Ogwu ata-ikọ ataak ìkponwọnọ osusut,
ogwu òkigwook ataak ìkpoje ikike ifo.
6 Owuwa ene ekisi iweek nnwọn me ubọk ogwu ilile;
ene geelek ìre unene ogwu òkiche uche inyi ene.
7 Otutuuk bọn ulọk ogwu ugbọọn̄ ekigwegwen ọmọ urieek;
keke ke ebi unene kan̄ eberọ
igak ijeje agba agba me lek kan̄?
Ọmọ ikelilibi igọọk ema ikiriaak,
ema ekichechieen̄ ita kpai.
8 Ogwu òkakaan̄ iriọọn̄-inu, ìma lek kan̄;
ogwu òkakaan̄ ngobo-ntet, inu môje ijaan̄ me lek.
9 Ogwu ata-ikọ ataak ìkponwọnọ osusut;
ogwu òkigwook ataak ìbokwukwu.
10 Ìkagbe ibe ogwu mbubut ikirie utop otu,
ikeya si, ìkatat ibe ogwu usun̄ ikikpulu bọn ebi ubọọn̄.
11 Iriọọn̄-inu ìkakichieek ibe ene inaan̄ ejit gbei,
ene isasan̄a chieen̄ me lek ijo inu erọbe ọmọ,
ìre umin inyi ene ya.
12 Unaan̄-ejit ogwu ubọọn̄ ìkup kubọk egbe àtat okigbin,
ire, nnwọn kan̄ ìkiso ere
kubọk mbat ògwook me lek mbubet.
13 Gwun̄ burubut ìkijijaka ogwu ute,
nwa òkibaak ibaak ìkikup ene me lek ifi ifi,
kubọk ibot òkirọn̄ọ sọi sọi sọi.
14 Uwu mè inu ubọọn̄ ìre ìrot ònan̄a me ubọk ute mè uga,
ire, nwa òkaan̄ iriọọn̄-lek, Okumugwem okinyi ene.
15 Uga ilaak ìkikeme ogwu una efuuk;
uraafiọọn̄ ìkitaka ogwu ugbek.
16 Ogwu òsusun̄ ikan ìkisun̄ ugwem kan̄,
ire, ogwu òkpọkpọ ugwem kan̄ ilọ chieen̄ môkwu.
17 Ogwu òkaan̄ ata ejit me lek ogwu ugbọọn̄,
ìfọọk inu inyi Okumugwem,
Okumugwem môkpe ene ya
mkpukpe ubọk ikwaan̄ kan̄.
18 Sulu gwun̄ kwun̄, mgbọ mgbọ ìkalọlọ-nu,
kakpọkpọ ìmọnọ me ejit kwun̄ ibe, ibokwu, ikwu ma!
19 Ogwu uga uyok-ejit môbọkọ osusut uyok-ejit kan̄,
ire onyan̄a ọmọ isibi,
owu òbokpọkpọ ikinyan̄a ọmọ ikeya.
20 Gban̄ nteme, mè bọkọ ikween̄-inu,
inyi owu môre ogwu òriọọn̄ inu me mgburudun̄.
21 Ene môkọt itọt owuwa inu ìborọ me emen ejit kan̄,
ire, nkeek Okumugwem, eya oborọ.
22 Inu ekiweek me emen ene ìre ikakaan̄ ata ejit,
ogwu ugbọọn̄ înwọn igak ogwu ataak.
23 Ogwu òkakaan̄ ukpook Okumugwem me emen kan̄ môkaan̄ ugwem,
môrie ijot owot, mè itap efuuk,
ufialek ìkpore ọmọ lek.
24 Ubọk ogwu ugbek ìkibia me emen alala inorie,
imọmọnọ inorie ya itap me otu ìre ugak me lek kan̄.
25 Sulu ogwu òkirọ ene ochak osusut,
ogwu una ekiket môkween̄ iriọọn̄-lek;
kan̄ inu nyi ogwu òkaan̄ ngobo-ntet,
môgobo ifuk-ibot itet.
26 Gwun̄ òrọ ogwu ute nnaan̄, mè ilap ogwu uga isibi,
ọmọ ìre gwun̄ òkisa esip mè ochak inu.
27 Gwun̄ n̄a, ire òkayaka ìgban̄ utọn̄ me lek ikween̄-inu,
owu môje itele ikọ òkinyi ene ifuk-ibot.
28 Bukubuku ata-ikọ ìre ichachak unen oyerebet ochak;
otu ogwu ikpak ìkimeen̄ ijo inu.
29 Itip-oyerebet ìkup inyi ebi ìkirọ ene ochak,
sà njijan̄ okup inyi udun̄ ebi mbubut.