18
Ogwu òkije ọmọ gaalek ìkiweek nnwọn eyi lek kan̄ gaalek,ìkinanaan̄ ejit ikeme ubọk ògbegbe ibe ekerọ inu.
2 Igogobo inu ekitumu itet ìkakitop me lek ogwu mbubut,
ire, inyinyi nket eyi kan̄, eya ke îkinwọọn̄.
3 Ogwu ikpak isinu, ikpọkpọ ene chieen̄ isiki îra inu;
esip isinu, ochak îra igọọk inu.
4 Ikọ otu ene ìdọk kubọk mun̄ emen irem;
ogbuuruk iriọọn̄-inu ìkup kubọk ògbugbuk mun̄ emen okolo.
5 Ìkanwọn ibe efieek oyerebet enwọn ogwu òlọlọ ikan,
ìkajaan̄ ibe ejit ogwu ìkalọ ikan unen oyerebet.
6 Otu alọm ogwu mbubut okisa ibaak ijet ọmọ,
otu usem kan̄ okirọ egoon̄ ọmọ akpọ.
7 Otu usem ogwu mbubut okifiat ọmọ,
otu alọm kan̄ okitap ọmọ me uyọrọlek.
8 Ikọ ogwu òkpa ene ìkitop kubọk atalek inorie òtotop,
ìkiraraka irọn̄ me irak irak owot ene.
9 Ogwu ugbek me lek ikwaan̄ kan̄,
mè ogwu òkifiat inu,
ema ene iba ìre ngwan̄.
10 Erieen̄ Okumugwem ìre ikput-lek ònyenye,
ebi ata irọrọ ekitap ibot me ubọk kan̄,
mè èkup me utelelek.
11 Ogwu ubọọn̄ ìkisa inu ubọọn̄ kan̄ irọ mgban ikwek lek,
mè ikimọnọ ke îre ogọ ikput lek òbebene.
12 Igugumu lek ìkida ene ito,
isisiki lek okinyi ene umin.
13 Idadasi ifọọk otu ikọ sabum eninọ ibot ikọ,
eya ìre inu burubut mè inu esip.
14 Ekwukwu ene obotet ene ikaan̄ me emen orukan̄,
ire, ire ekwukwu ya ìkanye, ekene môkọt ibeme?
15 Ejit ogwu òkaan̄ ngobo-ntet okikaan̄ ifuk-ibot,
utọn̄ ogwu òriọọn̄ inu ìkiweek inọnọ ikọ òkaan̄ ifuk-ibot.
16 Uche echebe inyi ene ìkichili oniin̄ inyi ogwu òcheche,
mè orọ ene ya ikaan̄ isi me ere ebi ilile ekupbe.
17 Oyerebet ìkikup kubọk înwọn
ogwu òdadasi ikpa otu ikọ,
mege ogwu agan̄ keyilọ isinido ọmọ idodo.
18 Nriroon̄ ìkirọ inyi ifan̄a iwọ,
mè ikiteek nteek me etete ebi unye.
19 Itutumu ikọ ita melek ngwan̄ erọbe ilọ
îyọt igak ibọbọkọ ama ònyenye;
gọlọgọlọ ìkitap ukput me etete ngwan̄
kubọk otunchit ama mgban akọn̄.
20 Ata ikọ ònan̄a me otu ene ìkijot ogwukaan̄ lek owot;
inu òsibi ọmọ me otu alọm môjot ọmọ owot.
21 Ugwem mè mkpa ìkup ene me otu alọm,
ebi ìmama ikọ otu alọm kiban̄
mêbọkọ mfut ònan̄a me lek.
22 Ogwu òweweek nwa imun̄, îweek ata inu imun̄;
ọmọ îbọkọ nnwọn-isi me ubọk Okumugwem.
23 Ogwu ugbọọn̄ ìkibebeek nsan,
ire, ogwu ubọọn̄ ìkifọọk ikọ otu unye unye.
24 Owuwa unene ìkitap ene me ichep,
ire, îkaan̄ unene òkigba iriaak ene me lek igak ngwan̄.