17
Itataka okpọkọ fituru òchachiaak iruk, me esuuk,înwọn igak ikukup me ere ekirie uga ijọk, me etim.
2 Ogwu usun̄ òriọọn̄ inu môkpulu gwun̄ nte uwu kan̄
ogwu òkisa esip itet ogwu ute,
mè igọọk ebi ngwan̄ gwun̄ ya ikaan̄ ìrot.
3 Ekisa uchieen̄ mè unye ukan̄
itọ alata okuket mè alata araran̄ eyi atata;
ire, Okumugwem okiroon̄ ejit ebilene ikpọ.
4 Ijo ene ìkigban̄ ijo ikọ,
ogwu ataak ìkigban̄ ikọ ikpak.
5 Ogwu òchak ogwu ugbọọn̄ ochak, ìkido Òrom ene ya erieen̄;
ogwu òbebele ejit me lek ùrioon̄ òtotoon̄ ene,
môbọkọ osusut.
6 Ikakan isoon̄ bọn bọn ene ìre okpibot ubọọn̄ eyi umin,
umin eyi bọn ìre nte kiban̄ mè nga kiban̄.
7 Ikọ òtotop, ogwu mbubut ìkakima,
ikọ ataak, ìbojeje itat me lek ogwu mkpulu?
8 Ikpoko udun̄ ìre ugwun̄ atisi me chieen̄ ogwu ònyinyi,
ere geelek îtapbe isi, inu ìkijeje ijaan̄ me lek kan̄.
9 Ogwu òtele nrọ-nlọ ene, ìkirọ imumechieen̄ ije inyi isi,
ire, ogwu òkikpa ijo inu ya ikana,
ìkigwak unene ibot ejit.
10 Ikakan̄ inu inyi ogwu òriọọn̄ lek,
îsi ikwaan̄ igak efit otu njijan̄ esulube ogwu mbubut.
11 Inyenye ibot inyi mkpulu ke ogwu ijo ene okiweek,
mêria ogwu ikwaan̄ òkirọ ikpak ibe isi isulu ọmọ osusut.
12 Ijeje ichichini ibo nriọk etetbe bọn kan̄ isan̄a me lek,
înwọn igak ijeje ichichini ogwu
mbubut me emen mbubut kan̄.
13 Ogwu òsa ijo inu ikpe ewe ata inu ene orọbe ọmọ,
uyọrọlek ìkpota me uwu ene ya.
14 Ibebene gọlọgọlọ ìkup kubọk
esan̄a usiik me chieen̄ uji òtitibi;
sabum okana etim, yat ubọk san̄a me lek.
15 Ogwu òsibi oyerebet inwọn ogwu ikpak,
mè ogwu òtip ogwu ata irọrọ oyerebet,
ema ene iba cha ìre mbuban inu me lek Okumugwem.
16 Ikpoko isasa ilep iriọọn̄-inu
ìkirọ keke me ubọk ogwu mbubut,
me ere ikakaan̄ge nden̄ isasa itap iriọọn̄-inu?
17 Unene ìkima ene mgbọ geelek,
ire, ekiriọọn̄ ngwan̄ me mgbọ uyọrọlek.
18 Ogwu una ngobo-ntet ìkibọkọ ene me ata-ikọ,
mè ochieek use me ibot ogwu melek kan̄.
19 Ogwu òma ijo inu, ìma uyọrọlek;
ogwu òkitumu otu ile, ìkigwen unan inyi lek kan̄.
20 Ogwu mfufiọk ejit ìkakimun̄ nnwọn,
ogwu ijo otu ikọ, ìborọn̄ inin̄ uyọrọlek.
21 Ute òbon gwun̄ burubut, ìbon ufieejit inyi lek kan̄,
nte ogwu mbubut ìkakikaan̄ ubelejit.
22 Ogwu òkaan̄ ubelejit me ejit, îkaan̄ ata igwagwa,
ufieejit ìkiwọ ene otu ukwuuk.
23 Ogwu ikpak ìkibọkọ ikpoko udun̄ me nlelet,
isa inwunween̄ unen oyerebet.
24 Ogwu òkaan̄ ngobo-ntet
ìkigwuun̄ chieen̄ me lek iriọọn̄-inu,
ire, ogwu mbubut
ìkibubat chieen̄ isi igwook me okputut linyọn̄.
25 Gwun̄ burubut ìkisa unaan̄-ejit inyi ogwu ute,
mè ikirọ ugwem ogwu uga ijat.
26 Ìkanwọn ibe etet ogwu ìkarọ ìlọ ibe ikpe mkpukpe,
ìkanwọn si ibe esulu ebi ibot njijan̄,
mije unen eru ema ekaan̄be.
27 Ogwu òkaan̄ ifuk-ibot ìkiteten̄ ikọ kan̄;
ogwu òkaan̄ ngobo-ntet ìkakikaan̄ fukufuku ejit.
28 Ikerere ogwu mbubut, emọnọ ibe ke îriọọn̄ inu,
me mgbọ îriaan̄be ere;
ogwu òchichit otu kan̄, ìkasan̄a amọn,
ene ya îkaan̄ ngobo-ntet.