16
Ogwu ebilene môkọt itọt otitọt geelek me ejit kan̄,ire, òta ufọọk-otu ìbonan̄a me ubọk Okumugwem.
2 Otutuuk inu geelek ene okirọ ìkitatat me chieen̄ kan̄,
ire, Okumugwem okiwọlọ inu
òkup me emen ekwukwu ene ikpọ.
3 Yaka ikwaan̄ kwun̄ geelek tap me ubọk Okumugwem,
ke inu geelek otọtbe môkaan̄ ibot.
4 Inu geelek Okumugwem orọbe, ìrọ inyi nkeek kan̄;
ikerere ebi ikpak, ìrom ema isun̄ ikpọ usen mfufiat.
5 Ogwu ugumulek geelek
ìre mbuban inu me lek Okumugwem;
sulu emi ata kpọ, ema kpebenwọnọ osusut.
6 Sa me atata nnwọn mè igbegbe utoon̄-ejit
ke ekichit ijo inu;
sa me itetet ukpook me lek
Okumugwem ke ekitele ijo inu.
7 Ene isikirọ inu itop Okumugwem me lek,
îra irọ ikerere ebi ochicha ene ya
ekup me esuuk melek ene ya.
8 Irere ugbọọn̄ mè ikaan̄ ata irọrọ,
înwọn igak ininin̄ ubọọn̄ me ngan.
9 Ene ìkisa ejit kan̄ itọt inu ọmọ oborọ,
ire, îre Okumugwem okidọmọ ubọk îborọ.
10 Ikọ ogwu ubọọn̄ ìre ikọ òkup mbuban,
ọmọ ikalọ otu ìfieek ijo oyerebet.
11 Okumugwem ìkima ibe eketọ inu
mè ekeroon̄ inu me kpunube mfeen̄;
otutuuk inu ekisa itọ inu ìre ubọk ikwaan̄ kan̄.
12 Ebi ubọọn̄ echacha ijo irọrọ,
mije, ata irọrọ okirọ mkpulu ikeke inye.
13 Ebi ubọọn̄ ekinwọọn̄ otu òkitumu atikọ;
ema ekima ogwu òkitumu inu òtatat.
14 Mkpa okup inyi ogwu òrọ ogwu ubọọn̄ inu unaan̄-ejit,
ire, ogwu òriọọn̄ inu môkọt isiki ọmọ ejit.
15 Isi ogwu ubọọn̄ isitọn̄ọ, ugwem ire eya;
nnwọn kan̄ ìkisiki ene lek kubọk ibot aya otu ibot.
16 Ikakaan̄ iriọọn̄-inu înwọn igak ikakaan̄ alata araran̄;
ikakaan̄ ngobo-ntet înwọn igak ikakaan̄ alata okuket.
17 Ogwu òtatat ìkije agba agba me lek ijo inu;
ogwu òkibem oniin̄ kan̄ ìkibem ebek ugwem kan̄.
18 Ugumulek ìkijijaka ene;
ubenelek ìkida ene ito.
19 Isisiki lek mè ire ugbọọn̄,
înwọn igak igọgọọk ebi ugumulek
isi iche inu efumbe.
20 Ogwu òkibọkọ nteme, inu môje ijaan̄ me lek;
ogwu òtoon̄ ejit me lek Okumugwem,
uga ubelejit okup inyi.
21 Ogwu òriọọn̄ inu ke egwen ibe ìre ogwu òkaan̄ ngobo-ntet;
ata otu ikọ ìkinyi ene ikween̄-inu isọkọ.
22 Iriọọn̄-inu ìre ugwem inyi ogwu òkakaan̄,
ire, ikakan̄ inu inyi ebi mbubut ìre inu burubut.
23 Ejit ogwu òriọọn̄ inu ke ikọ iriọọn̄-inu okinan̄a isibi,
mè ikitap ikween̄-inu isọkọ me otu ikọ kan̄.
24 Ikọ ata ejit ìbet lek aran̄ akwọọk,
ìkininin̄i me ibot ejit ene,
mè ikirọ otu ukwuuk ene inye.
25 Îkaan̄ oniin̄ ene okimọnọ ibe ke îtat me lek kan̄,
ire, okputut oniin̄ ya ìre mkpa.
26 Ogwu òsi ikwaan̄, ìsi inyi ebek kan̄,
uraafiọọn̄ kan̄ okibieen̄ ọmọ ije.
27 Ogwu ene ikike òkifuku ijo inu isibi,
ikọ kan̄ ìre ukan̄ ekirika.
28 Ogwu mfufiọk ìkitap yalayala,
ogwu mbia ìkigwak unene ibot ejit.
29 Ogwu afa ìkileke ogwu melek kan̄,
mè ikisa itap me ijo oniin̄.
30 Ogwu òsa chieen̄ ifiik ene, ìkitọt ijo otitọt;
ogwu òban̄a otu, ìben ijo inu me ejit.
31 Isọọn̄ ìre okpibot ubọọn̄ eyi umin;
îre ebi ìluluk ugwem ata irọrọ ekikaan̄.
32 Ikakaan̄ ukarajit înwọn igak irere ogwu usọ akọn̄;
itetet lek ikaan̄ înwọn igak ititim akọn̄ ibọkọ ama.
33 Mêkọt itọp inu ekisa iroon̄ nriroon̄,
ire, îre Okumugwem okitumu ifieek agan̄ ìbonwọn.