15
Ata otu ifọọk-ikọ ìkisiki unaan̄-ejit,ire, ijo otu ikọ ìkiribi unaan̄-ejit.
2 Ikọ ogwu òriọọn̄ inu ìkirọ ifuk-ibot itop,
ire, ogwu mbubut ìkitumu ikọ mbubut mbubut.
3 Chieen̄ Okumugwem ìsoso otutuuk ere,
ikikpọ ebi ijo mè ebi ata.
4 Ata otu ikọ ìkitap ene ugwem me emen,
ire, ijo otu ikọ ìkiwọ ekwukwu ene.
5 Ogwu mbubut okikpọ ikan̄-inu ogwu ute isiki chieen̄,
ire, ogwu ògbagban̄ utọn̄ me lek ikan̄-inu, ọmọ oriọọn̄ lek.
6 Inu ubọọn̄ ìkijojot uwu ogwu ata ene,
ire, mkpukpe ogwu ikpak ìkije melek ufialek.
7 Ifuk-ibot ìkinan̄a me otu ogwu òriọọn̄ inu isibi,
ire, ejit ogwu mbubut ìkakup ikeya.
8 Ngwugwa ebi ikpak ìre mbuban inu me lek Okumugwem,
ire, uriaak ebi ìkirọ inu òtatat ìre inu ubelejit inyi ọmọ.
9 Ugwem ebi ikpak ìre mbuban inu me lek Okumugwem,
ire, ọmọ ìkima ogwu òkirọ ata irọrọ.
10 Ikpele osusut ọmọ òwa
inyi ogwu òtetele irọrọ inu òtatat;
ogwu ìkakima ikan̄-inu, môkwu.
11 Ama ekwukwu mè inu geelek òkup me emen kan̄
ìkup obook me chieen̄ Okumugwem.
Ire ikeya, emen ejit ogwu ebilene
ìkpokọt ilet me chieen̄ kan̄ kubọk ge.
12 Ogwu òkichak ene ochak
ìkakima ibe ekan̄ inu enyi ọmọ,
ìkposisi si lek ogwu òriọọn̄ inu isi iweek nteme.
13 Ejit isibele ene, isi ene îra itọn̄ọ,
ire, ejit isifieek ene, ekwukwu ene îra iwọ.
14 Ogwu òkaan̄ ejit òkigobo inu itet okiweek ifuk-ibot,
ire, otu ogwu mbubut ìkima ikọ burubut.
15 Me lek ogwu òkup me tukutuku,
usen geelek ìre ijo usen,
ire, me lek ogwu ejit obelebe, usen geelek ìre usen ijọk.
16 Ikakaan̄ sọntiik inu melek ukpook Okumugwem,
înwọn igak ikakaan̄ owuwa inu ubọọn̄ melek ufialek.
17 Usun̄ inwan̄ inwan̄ eriebe me imumechieen̄,
înwọn igak usun̄ ufuk ufuk anam
eriebe me ochicha ejit.
18 Ogwu uyok-ejit ìkito ibaak,
ire, ogwu m̀memem ejit ìkirọ gọlọgọlọ ifo.
19 Oniin̄ ogwu ugbek, esa ukpak iwak igọm,
ire, oniin̄ ogwu òtatat ìre uga oniin̄ òwowook.
20 Gwun̄ òriọọn̄ inu ìkirọ ejit ogwu ute ibele,
ire, gwun̄ òrere mbubut ìkikpọ ogwu uga isiki chieen̄.
21 Mbubut ìkitotop me lek ogwu una ngobo-ntet,
ire, ogwu òkaan̄ ngobo-ntet ìkije me oniin̄ òtatat.
22 Ere kpunube nteme, otitọt ìkigbugbuku,
ire, ebi nteme isiwa, otitọt îra ikeke inye ebon.
23 Ikọ ene ofọọkbe ijaan̄ ìkinyi ene ya unwọọn̄;
itutumu ikọ me mgbọ îgbebe, ìnwọnwọn ijaan̄ lek.
24 Oniin̄ ugwem ìkisa ogwu òriọọn̄ lek ifo inyọn̄,
ufuna ọmọ ikakwala ìsiki ifo ama ekwukwu.
25 Okumugwem môgbugbọ uwu ogwu ugumulek igwook,
ire, môgwuun̄ okike ijọn̄ ogwu nwakpa inye.
26 Ekiket ebi ikpak ìre mbuban inu me lek Okumugwem,
ire, ikọ ata ejit ìre ikọ òtatana me lek kan̄.
27 Ogwu òkima nlilọ oruru ìkisa ufialek itap me uwu kan̄,
ire, ogwu òchacha irerie udun̄ môgat ugwem.
28 Ogwu ata irọrọ ìkigegen ibot sabum ònofọọk ikọ,
ire, ogwu ikpak ìkigbọgbọ ijo ikọ me otu igwook.
29 Okumugwem îjọn̄ọ ere me lek ebi ikpak,
ire, ìkinọ uriaak ebi ata irọrọ.
30 Isi imọm imọm ìkinyi ene ubelejit;
ata etip ìkinye ene otu ukwuuk.
31 Ogwu òbọbọkọ ikan̄-inu òkinyi ene ugwem,
ene ya môkọt ikup me etete ebi ìriọọn̄ inu.
32 Ogwu òjijit ikan̄-inu, ìgwen lek kan̄ urieek,
ire, ogwu ògbagban̄ utọn̄ me lek ikan̄-inu
okaan̄ ngobo-ntet.
33 Itetet ukpook me lek Okumugwem
okijeen̄ ene iriọọn̄-inu,
isisiki lek okisa umin ijet ene.