14
Enenwaan̄ òrọriọọn̄ inu okinama uwu kan̄,ire, enenwaan̄ mbubut ìkisa ubọk kan̄
gaalek igbugbọ uwu kan̄ igwook.
2 Ogwu òtatat me ugwem kan̄ okilibi Okumugwem,
ire, ogwu òkije nlilọ nlilọ ìkikpọkpọ ọmọ isiki chieen̄.
3 Ikọ ogwu mbubut ìkire ikọ ugumulek
òkisa osusut ijet ọmọ,
ire, ikọ ogwu òriọọn̄ inu ìkisan̄a ọmọ me ufialek.
4 Ire kpunu eriembuuk òkisi ikwaan̄,
okwa inorie anam ìkilaak ukpọk,
ire, îre sa me unye eriembuuk
ke ekikaan̄ inu owuwa owuwa me uko.
5 Ogwu ata-ikọ ògbegbe utoon̄-ejit ìkakikan̄ ataak,
ire, ogwu ata-ikọ ataak okigwook ataak.
6 Ogwu òkirọ ene ochak iweek iriọọn̄-inu, ìkakikaan̄;
ire, ifuk-ibot ìre mfufet inu inyi ogwu òkakaan̄ ngobo-ntet.
7 Je nan̄a me lek ogwu mbubut,
mije, owu òkpomun̄ ifuk-ibot ge me lek ikọ kan̄.
8 Iriọọn̄-inu ogwu òriọọn̄ lek
ìre igogobo inu òkinu inyi ọmọ itet,
ire, burubut ogwu mbubut
ìkifiaan̄ ogwukaan̄ lek ifiin̄.
9 Irọrọ ijo inu ìkirọ ibe ebi mbubut echak imọm;
ire, ebi ìkirọ inu òtatat ke îkiyọt me lek.
10 Ejit ene gaalek oriọọn̄ ikeke ọmọ ojatbe ire,
ikeya si, kpunu ogwu òkigọọk ọmọ inwọọn̄ unwọọn̄ kan̄.
11 Uwu ebi ikpak, ebejijijaka igwook,
ire, uwu ọfọ ebi ìkirọ inu òtatat ìbonyenye me ijọn̄.
12 Îkaan̄ oniin̄ ene okimọnọ ibe ke îtat me lek kan̄,
ire, okputut oniin̄ ya ìkire mkpa.
13 Imọm ìkakigwa ufieejit,
unwọọn̄ ìkekikana ufieejit.
14 Ogwu ijo ene ìborie oruru ijo inu kan̄ ijot owot,
ire, ogwu ata ene môrie oruru ata ikwaan̄ kan̄ ijot owot.
15 Ogwu wewe, ìkichechieek inu geelek etumube inyi ọmọ,
ire, ogwu òriọọn̄ lek ìkigwugwuun̄
chieen̄ ikpọ ijọn̄, sabum ònotap ukot.
16 Ogwu òriọọn̄ inu ìkifefieek owot,
mè ikida lek ibọkọ me lek ijo inu,
ire, ogwu mbubut ìkichachat chieen̄
iraka isi ge inin̄ emen ijo inu.
17 Ogwu uyok-ejit ìkirọ inu ebot ebot,
ogwu ifiọk ìre ogwu ekichacha.
18 Ìrot ogwu una ekiket ìkire burubut,
ire, ogwu òriọọn̄ lek okikaan̄ ogbogbo ifuk-ibot.
19 Ebi ijo ife mêtọbọ ibot inyi ebi ata ife;
ebi ikpak mêtọbọ ibot me otunchit ebi ata irọrọ.
20 Ogwu ugbọọn̄, ebi melek kan̄ si ekichacha,
ire, ebi ìkima ogwu ubọọn̄ ìre ogbogbo ene.
21 Ogwu òkpọkpọ ogwu melek kan̄ chieen̄ isiki, îrọ ijo inu,
ire, uga ubelejit môkup inyi
ogwu òkaan̄ ata ejit me lek ogwu una.
22 Ogwu òtọt ijo inu, ìkpolọlọ ijeje ilọ oniin̄,
ire, ogwu òtọt ata inu, môbọkọ ata ejit mè atikọ.
23 Unye ikwaan̄ geelek ìkekisibi oruru,
ire, ikukup ikilo otu, ìkirọ ene inin̄ ugbọọn̄.
24 Inu ubọọn̄, ọmọ ore mkpukpe ebi ìriọọn̄ inu,
ire, mkpukpe ogwu mbubut ìre burubut.
25 Ogwu ata-ikọ òtutumu atikọ me ibot ene, înyan̄a ugwem ene,
ire, ogwu ata-ikọ òkakan̄ ataak ikeme ene, ìre ogwu ofiaan̄.
26 Ogwu òkitet ukpook me lek Okumugwem
îkaan̄ okwukwek ònyenye,
eya môre ere ilet-lek inyi bọn kan̄.
27 Itetet ukpook me lek Okumugwem
ìkinyi ene ugwem;
ìkida ene isan̄a me otu ufe mkpa.
28 Uwa ene ore umin ogwu ubọọn̄,
ire, ogwu ubọọn̄ ogwu kpunu ene me udun̄
ìkakup me lek inu geege.
29 Ogwu òkaan̄ ukarajit îkaan̄ ikpele ngobo-ntet,
ire, ogwu uyok-ejit ìkiben mbubut kan̄ iwele.
30 Emen ejit ene ikup me esuuk, ene òkaan̄ ata lek;
ire, ogwu ikaan̄ chieen̄ ile,
emen kan̄ okpukpuku ogwook.
31 Ogwu òfeen̄ ogwu ugbọọn̄, ìnye chieen̄ inyi Òrom kan̄,
ire, ogwu òtap ubọk inyi ogwu una, ìnyi Awaji umin.
32 Inu ikpak ogwu ikpak, ọmọ ke mêsa ida ogwu ikpak ito,
ire, ogwu ata irọrọ îkaan̄ ere nlet mgbọ ọmọ isikwu.
33 Iriọọn̄-inu ìkikup me emen ejit ogwu òkaan̄ ngobo-ntet,
ire, ìkekijeen̄ lek si,
ikerere me etete ebi mbubut, mîriọọn̄.
34 Ata irọrọ okirọ inyi ido ikaan̄ umin,
ire, ijo inu ìkisa ochak ijet ido.
35 Gwun̄ ikwaan̄ òriọọn̄ lek ìre inu ubelejit inyi ogwu ubọọn̄,
ire, gwun̄ ikwaan̄ òkisa esip itet ọmọ
ìkibọkọ unaan̄-ejit kan̄.