13
Gwun̄ iriọọn̄ inu, ìnan̄a me ikan̄-inu ogwu ute,ire, ogwu òkirọ ene ochak, ìkabọkọ ikan̄-inu.
2 Ata otu usem ìkinyi ene ata inu,
ire, inu òkilọk ogwu mfufiọk ìre afa.
3 Ogwu òkitet otu kan̄ ikaan̄ ìkibọọk ugwem kan̄,
ire, ogwu òkitumu ikọ kpoo ìbonin̄ me ichep.
4 Ogwu ugbek òkiweek ibọbọọn̄ ubọọn̄ ìkpokaan̄ inu geege,
ire, ogwu òkaan̄ efuuk ikwaan̄
môkaan̄ inu îweekbe òjot òjot.
5 Ogwu ata irọrọ ìkakima ataak,
ire, ogwu ikpak môrie esip mè ochak.
6 Ata irọrọ ìkikput lek ogwu ìkarọ ìlọ,
ire, inu ikpak ìkida ogwu ijo ene ito.
7 Îkaan̄ ebi ìkirọ lek kiban̄ ubọọn̄ ubọọn̄,
ire, kpekaan̄ inu geege,
mè ikaan̄ ebi ìkirọ lek kiban̄ ugbọọri ugbọọri,
ire, mîbọọn̄ atalek ubọọn̄.
8 Ene môkọt isa inu ubọọn̄ kan̄ inwene ibot,
ire, ogwu una ìkakinọ ikan̄-inu.
9 Mkpukan̄ ebi ata irọrọ ìkilolomo itoon̄ ere,
ire, mkpukan̄ ebi ikpak ìboniniin̄.
10 Ugumulek ìkisa gaalek ibaak inu,
ire, ebi ìkibọkọ nteme ekaan̄ iriọọn̄-inu.
11 Ikpoko ekaan̄be me ngan ìbotọtọk ita,
ire, ogwu òkibọm ikpoko sọnja sọnja môkaan̄ iwa.
12 Inu etoon̄be ejit ibe môrọ isilọ, ìkifieek ene ejit,
ire, ikpọchieen̄ isirọ iso, ìkire unwọọn̄ mè ugwem.
13 Ogwu òkpọkpọ nteme ilọ chieen̄, môtuku ilaka,
ire, ogwu òkakaan̄ ulibi me lek ikọ etọbe, mêwaak ubọk.
14 Ijeen̄-inu ogwu òriọọn̄ inu ìre ogbuuruk ugwem,
ìkida ene isan̄a me otu ufe mkpa.
15 Ogwu òriọọn̄ lek ìkibọkọ nnwọn-isi,
ire, oniin̄ ogwu mfufiọk ìkikup uyọt uyọt.
16 Ogwu òriọọn̄ lek ìkirọ inu me ifuk-ibot,
ire, ogwu mbubut ìkiben burubut kan̄ iwele.
17 Gwun̄ ikwaan̄ òrere ogwu ikpak ìkirọn̄ inin̄ me ufialek,
ire, gwun̄ ikwaan̄ ogwu etoon̄be ejit me lek
ìkisa igwagwa ijet ene.
18 Ugbọọri mè esip okup inyi ogwu òjijit ikween̄-inu,
ire, ogwu osa ikan̄-inu igwen inu môkaan̄ ulibi.
19 Inu eweekbe isire ene ubọk, ìkibele ene ejit,
ire, isisibi itele ijo inu
ìre mbuban inu me lek ogwu mbubut.
20 Ogwu ògọọk ebi ìriọọn̄ inu ije, môriọọn̄ inu,
ire, ogwu ògọọk ebi mbubut ije mônin̄ me ufialek.
21 Ijo inu ìkililaba ebi ijo ife,
ire, ata mkpukpe okup inyi ebi ata irọrọ.
22 Ata ìrot ogwu ata ene otelebe môje ire lek bọn ebi bọn,
ire, inu ubọọn̄ ogwu ijo ene,
ekititiin̄ isun̄ inyi ebi ata irọrọ.
23 Ijọn̄ uko ogwu ugbọọn̄ môkọt isibi inorie ogbogbo,
ire, mêsa ijo oyerebet inikpulu ije.
24 Ogwu òyayaka njijan̄ ito ìkama gwun̄ kan̄,
ire, ogwu òmama gwun̄
ìkisulu gwun̄ ya mgbọ yaage îrọbe ilọ.
25 Ogwu ata irọrọ ìkirie inorie ike ejit kan̄ otọbe,
ire, owot ogwu ikpak ìkire ukpọk ukpọk.