12
Ogwu òma ikween̄-inu ìma ifuk-ibot,ire, ogwu òcha ikan̄-inu ìre ndide.
2 Okumugwem ìkirọ nnwọn inyi ogwu ata ene;
ire, ìkitip ogwu mfufiọk oyerebet.
3 Inu ikpak ìkakichieek ene ikeke inye me irek,
ire, ogwu ata irọrọ, kpebekọt ijibi isan̄a me akpat.
4 Òjot òjot nwa ìre umin inyi ogwu olom,
ire, nwa ikariọọn̄ge esip ìkitap ogwu olom uwọ-lek.
5 Ogwu ata irọrọ ìkikeek ekiket òtatat,
ire, ogwu ikpak ìkinyi nteme ofiaan̄.
6 Ikọ ogwu ikpak ìkup kubọk ufe òbokpan̄ ene,
ire, ikọ ogwu ugwem òtatat ìkinyan̄a ene isibi me mkpa.
7 Ogwu ikpak ìbokwukwu ichep dìp dìp,
ire, uwu ogwu ata irọrọ ìbokekeke inye.
8 Ekitọn̄ ene ikpọ me lek iriọọn̄-inu kan̄,
ire, ogwu ifuk-ibot kan̄ ìkakitat,
ekikpọkpọ chieen̄ isiki.
9 Ogwu ikakupge me lek inu, ire, îkaan̄ gwun̄ uwu,
înwọn igak ogwu òkimin lek kan̄, ire, ìkakaan̄ inorie.
10 Ogwu ata irọrọ îkaan̄ ulibi inyi ugwem anam kan̄,
ire, ata ejit ogwu ikpak okaan̄be ìre oma kè ikpi.
11 Ogwu ògbọgbọ ijọn̄ kan̄ iwop uko oborie ijot owot,
ire, ogwu òkifiat mgbọ kan̄ me lek
inu ikakaan̄ge ibot ìkakaan̄ nden̄.
12 Ebi ikpak ekimin ebek me lek inu ubọọn̄ ebi ijo ife ekaan̄be,
ire, Awaji ìkinyi ebi ata irọrọ oniin̄ ebesa ikaan̄ inu.
13 Ijo ikọ ogwu ikpak môtap ọmọ me ufialek,
ire, ogwu ata irọrọ mônwọnọ ufialek kecha.
14 Ata usem òkinan̄a ene me otu ìkirọ ata inu ijot ene owot,
ikeya si ke ubọk ikwaan̄ ene okinyi ene mkpukpe.
15 Inu ogwu mbubut okirọ ìkitatat me chieen̄ ogwukaan̄,
ire, ogwu ògban̄ nteme ìre ogwu òriọọn̄ inu.
16 Ogwu mbubut ìkinaan̄ ejit ebi ekpuk,
ire, ogwu òme unyechieen̄ ìre ogwu òriọọn̄ inu.
17 Ata ogwu ata-ikọ atikọ ìkitumu atikọ,
ire, ogwu ata-ikọ ataak ìkitumu ikọ ataak.
18 Ikọ etumube me una ekiket ìkifieek ene nkat me owot,
ire, ikọ ogwu òriọọn̄ inu ìkigwagwa ene.
19 Ikọ atikọ ìkibabia ire mgbọ geelek,
ire, ikọ ataak ìkikup sọnja mgbọ gaalek.
20 Ofiaan̄ okijot ejit ebi ìkitọt ijo inu,
ire, unwọọn̄ okijot ejit ebi ìkitọt esuuk.
21 Ufialek ìkakirọn̄ ìkeme ogwu ata irọrọ,
ire, uyọrọlek ìkikakana ichit ogwu ikpak.
22 Ebi ataak ìre mbuban inu me lek Okumugwem,
ire, ebi ìkitumu atikọ ìre inu ubelejit inyi ọmọ.
23 Ogwu òriọọn̄ lek ìkakiwele ifuk-ibot kan̄ me oyet,
ire, ogwu mbubut ìkibeben mbubut kan̄ isibi ewe.
24 Ogwu òkaan̄ efuuk ikwaan̄, ọmọ obore ogwu ibot,
ire, ogwu ugbek ìbore ogwu usun̄.
25 Saasaak ejit ìkinwun ene ekpuk me udun̄,
ire, ata ikọ ìkinyi ene ubelejit.
26 Ogwu ata irọrọ ìkisa ogwu melek kan̄ ijeen̄ oniin̄,
ire, oniin̄ ogwu ikpak ìkisa ene ije ichep.
27 Ogwu ugbek ìkakigbala chieen̄
me lek inu îkwookbe ukwook ikaan̄,
ire, ogwu òkaan̄ efuuk ikwaan̄
okigbala chieen̄ me lek inu kan̄.
28 Ata irọrọ ìkisa ene itap me ugwem,
mkpa kpunu me oniin̄ kan̄.