11
Itọtọ inu ifeen̄ ene ìre mbuban inu me lek Okumugwem,ire, itọtọ inu inwọn ene, eya okibele ọmọ ejit.
2 Ugumulek isinu, esip îra igọọk,
ire, isiki-lek okije melek iriọọn̄-inu.
3 Unen eru ebi ìkirọ inu òtatat ìkijeen̄ ema oniin̄,
ire, ugwem ofiaan̄ ebi mfufiọk okifiat ema.
4 Inu ubọọn̄ ìkponyan̄a ene me usen unaan̄-ejit Awaji,
ire, ata irọrọ mônyan̄a ene isibi me mkpa.
5 Ata irọrọ ogwu ǹkalọ okirọ, ìkirọ oniin̄ kan̄ itat,
ire, inu ikpak ogwu ikpak okirọ, ọmọ oboda ọmọ ito.
6 Ata irọrọ ebi ìkirọ inu òtatat mônyan̄a ema isibi,
ire, ijo ebek ìre ufe inyi ebi mfufiọk.
7 Ogwu ikpak isikwu, ikpọchieen̄ kan̄ îra ichep,
inu îtoon̄be ejit isasa unye kan̄ ikaan̄ îra ilọ.
8 Awaji isisan̄a ogwu ata irọrọ isibi me uyọrọlek,
ìkiyaka ogwu ikpak itap me useen̄.
9 Ogwu ijo ene ìkisa otu ifiat ogwu melek kan̄,
ire, ogwu ata irọrọ môsa ifuk-ibot inwọnọ.
10 Inu ije ijaan̄ me lek ogwu ata ene, ama obele ejit;
ogwu ikpak ikwu, unwọọn̄ odimi me ama.
11 Inu ije ijaan̄ me lek ebi ìkirọ inu òtatat, ama ojibi òbene,
ire, ebi ikpak itumu ikọ, ama òchep.
12 Ogwu una ngobo-ntet okikpọ
ogwu melek kan̄ chieen̄ isiki,
ire, ogwu òkaan̄ ngobo-ntet ìkakisan̄a amọn.
13 Ogwu mbia ìkikpọk mbum nlelet ikọ,
ire, ogwu ògbe utoon̄-ejit okiban̄a mbum ikọ.
14 Ido ònan nteme, ìborọrọn̄,
ire, ido òkaan̄ owuwa ebi nteme,
ntim-mkpan̄ ìkakilọ.
15 Ogwu òbọbọkọ ogwu ichen me ata-ikọ, ìnyam lek kan̄,
ire, ogwu òjijit ibọbọkọ ene me ata-ikọ,
ìkakaan̄ uyọrọlek.
16 Enenwaan̄ ata ejit okikaan̄ ulibi,
ire, enerieen̄ ònye ejit okibọọn̄ ubọọn̄.
17 Ogwu ata ejit ìkirọ nnwọn inyi ugwem kan̄,
ire, ogwu nnaan̄ ìkitap ufialek inyi akpalek kan̄.
18 Ogwu ikpak ìkibọkọ ofiaan̄ ofiaan̄ mkpukpe,
ire, ogwu ata irọrọ ìkibọkọ ata mkpukpe.
19 Atalek ata irọrọ ìkisa ugwem inu,
ire, irọrọ ijo inu ìkisa mkpa inu.
20 Ogwu òkaan̄ ejit ofiaan̄
ìre mbuban inu me lek Okumugwem,
ire, ogwu òtatana me ugwem ìre inu ubelejit inyi ọmọ.
21 Sulu emi ata kpọ, ogwu ijo ene ìkponwọnọ osusut,
ire, bọn ebi ata irọrọ ebefon me utelelek.
22 Uja enenwaan̄ ikakaan̄ge ifuk-ibot
ìkup kubọk asi inwọm alata araran̄
esabe inwaan̄ me otu inwọm okodi.
23 Inu òkilọk ogwu ata irọrọ ìre gaalek ata inu,
ire, ikpọchieen̄ ogwu ikpak ìre gaalek unaan̄-ejit Awaji.
24 Ogwu òkichili ubọk iche inu inyi ene, ọmọ okibọọn̄ ubọọn̄,
ogwu òkifaak afaak, ọmọ okigbọọn̄.
25 Ogwu òkinyi me ata ejit, ọmọ okibọọn̄;
ogwu òkitap ene efuuk me emen,
mêtap si ọmọ efuuk me emen.
26 Ogbo môkup inyi ogwu òchichit inorie ònanan isun̄
ikinyam me unye otu ewe,
ire, ugbana môkup inyi ogwu òchichili eyi kan̄ ikinyam.
27 Ogwu òweek ata inu mômun̄ nnwọn,
ire, ogwu òweek ijo inu, ijo inu môgọọk ọmọ.
28 Ogwu òtoon̄ ejit me lek inu ubọọn̄ kan̄, ìborọrọn̄;
ire, ogwu ata irọrọ ìbokisesek kubọk inwan̄ oron.
29 Ogwu òto ufialek me uwu kan̄ gaalek, ìkpokaan̄ inu geege;
ogwu mbubut ìbore usun̄ inyi ogwu òriọọn̄ inu.
30 Ubọk ikwaan̄ ogwu ata irọrọ ìkinyi ebi ene ugwem;
ogwu òkpukpulu ebi ene iriaak me lek kan̄
ìre ogwu òriọọn̄ inu.a
31 Ire ebi ata irọrọ ibọkọ mkpukpe
inu ema erọbe me linyọn̄ keyi,
ebi ikpak mè ebi ìkirọ ijo inu
kpebelọlọ ibọbọkọ si mkpukpe kiban̄.