Urọk echi Solomọn otobe
10
Echichi ìre urọk Solomọn otobe:Gwun̄ òriọọn̄ inu ìkinyi ogwu ute ubelejit,
ire, gwun̄ burubut ìkinyi ogwu uga ufieejit.
2 Ubọọn̄ ebọọn̄be me ijo ubọk ìkakaan̄ oruru,
ire, ata irọrọ ìkinyan̄a ene isibi me mkpa.
3 Okumugwem ìkpotele ibe ogwu ata irọrọ iran̄ ọfiọọn̄,
ire, ìkponyi ebi ikpak inu òkilọk ema.
4 Ogwu ugbek ìkinin̄ ugbọọn̄,
ire, ogwu òkaan̄ efuuk ikwaan̄ môbọọn̄ ubọọn̄.
5 Gwun̄ òriọọn̄ lek ìkirọkọ uko me ibot mgbọ kan̄,
ire, gwun̄ òkilalaak mgbọ ekirọkọ uko
ìkisa esip itet ene.
6 Ugbana ìkigwook me ibot ebi ata irọrọ,
ire, afa afa okijot otu ebi ikpak.
7 Ikekeek ebi ata irọrọ ìre inu ugbana,
ire, erieen̄ ebi ikpak ìbojọjọ igọk.
8 Ebi iriọọn̄-inu okupbe me ejit ekibọkọ ikọ etọbe itap,
ire, ogwu mbubut òkikpukpat otu, ìbonin̄ me ichep.
9 Ukot ogwu unen eru ìkinyenye me ijọn̄,
ire, eru ogwu ofiaan̄ ìkabolet.
10 Ogwu òfiik ene ijo chieen̄, ìkitap ufialek;
ire, ogwu mbubut òkikpukpat otu, ìbonin̄ me ichep.
11 Ikọ otu ogwu ata irọrọ ìre ogbuuruk ugwem,
ire, afa afa okijot otu ebi ikpak.
12 Ochicha ìkitap yalayala,
ire, imumechieen̄ ìkichichit nrọ-nlọ geelek.
13 Ikọ ogwu òkaan̄ ngobo-ntet
ìkikaan̄ iriọọn̄-inu me emen,
ire, ogwu una ngobo-ntet, ebesasa uti isut udun̄ ibak.
14 Ebi ìriọọn̄ inu, ema ekikaan̄ ifuk-ibot,
ire, ikọ ogwu mbubut ìkisa uyọrọlek inu.
15 Ogwu òbọbọọn̄ ubọọn̄ ìkisa inu ubọọn̄ kan̄ itọm lek,
ire, una ubọk, ọmọ okitap ogwu ugbọọn̄ ifin me otu.
16 Ubọk ikwaan̄ ogwu ata irọrọ
ìkisa ugwem ijet ogwukaan̄,
ire, mkpukpe ikwaan̄ ogwu ikpak
ìre osusut ijo inu òkinu inyi ogwukaan̄.
17 Ogwu òbọbọkọ ikween̄-inu itap ìkijeen̄ oniin̄ ugwem;
ire, ogwu òjijit ikan̄-inu ìkisa ene ije ilọ oniin̄.
18 Ogwu òchit ochicha me ejit kan̄ ìre ogwu ataak;
ogwu òkikpa ene ìre ogwu burubut.
19 Ikọ isikiwa ifiat, ìkakilọlọ nlilọ inu okikup me emen,
ire, ogwu òkitet otu kan̄ ikaan̄, ìre ogwu òkaan̄ iriọọn̄-lek.
20 Ikọ ogwu ata irọrọ ìre unye otu ewe alata okuket,
ire, ekiket ejit ogwu ikpak ìkakaan̄ oruru.
21 Ikọ ogwu ata irọrọ ìkikpukpo owuwa ene,
ire, ebi una ngobo-ntet
ekikwaan̄ mije una ngobo-ntet.
22 Ugbana Okumugwem ìkitap ene ubọọn̄,
ubọọn̄ keya ìkakaan̄ ufieejit me lek.
23 Irọrọ inu ikpak ìkitotop me lek ogwu mbubut,
ire, ogwu okaan̄ ngobo-ntet ìkima iriọọn̄-inu.
24 Inu ogwu ikpak okifieek owot me lek
môkana ikweek ọmọ me isi,
ire, inu geelek òlọlọk ebi ata irọrọ, ema mêkaan̄.
25 Ike egwijo okiraka, ìkayaka ìkup,
ikeya si ke ebi ikpak ekiraka,
ire, ebi ata irọrọ ìre ọdọ
òkikeke ikam ire mgbọ geelek.
26 Ike agburu miin̄ okitap ene ajiji me ebon ejeek,
mè ike oduku okiyok ene chieen̄,
ikeya ke ogwu ugbek ore ufialek
inyi ebi ìria ọmọ ikwaan̄.
27 Itetet ukpook me lek Okumugwem
ìkitap usen isọkọ ugwem ene,
ire, acha ebi ikpak, ebesọsọp igele.
28 Ikpọchieen̄ ogwu ata irọrọ ìre unwọọn̄,
ire, utoon̄-ejit ogwu ikpak ìbochep me ikike.
29 Oniin̄ Okumugwem ìre ikput-lek ebi ata irọrọ,
ire, îre mfufiat inyi ebi ìkirọ ijo inu.
30 Kpebesan̄a ogwu ata irọrọ me irek kan̄,
ire, ogwu ikpak ìkpoluk ibia me linyọn̄.
31 Ikọ iriọọn̄-inu okisibi me otu ogwu ata irọrọ,
ire, otu ogwu ofiaan̄, ebechichit.
32 Ogwu ata irọrọ ìkitumu ikọ ògbegbe,
ire, ogwu ikpak ìkitumu ikọ ofiaan̄ ofiaan̄.