Iriọọn̄-inu mè burubut ekigween̄ ene
9
Iriọọn̄-inu înama uwu kan̄,mè ikọ atà ewuuk jaaba isa ibene uwu ya.
2 Îkpan̄ anam kan̄, mè iwọlọ miin̄ kan̄ isun̄,
mè ibala ikasi inorie kan̄ isan̄a.
3 Îria nsabọn ibaan̄ kan̄ isibi ibe esi egween̄ ene,
mè ikup me ere òbebene ichit
me emen ama ikibọn̄ ukpo igween̄ ene ibe,
4 “Ogwu geelek ikakaan̄ge ekiket, igwaka igba ere keyi!”
Îtumu inyi ebi kpekaan̄ ngobo-ntet ibe,
5 “Ìna, ìnirie inorie n̄a,
mè ìnwọ miin̄ mwọlọbe isun̄.
6 Ìtele burubut, mè ìgat ugwem,
mè ìje ìnyi isi me oniin̄ eyi ngobo-ntet.
7 “Ogwu òsi ìteme ogwu òkirọ ene ochak nteme,
ìboben esip;
ogwu òsi ìkan̄ inu inyi ogwu ikpak, ìboben unan.
8 Kateme ogwu òkirọ ene ochak nteme, inyi ikacha owu;
kan̄ inu nyi ogwu òriọọn̄ inu, môma owu.
9 Teme ogwu òriọọn̄ inu nteme,
ìborọriọọn̄ inu igak ubọk îriọọn̄be;
jeen̄ ogwu ata irọrọ inu, môkween̄ inu isọkọ lek.
10 “Iriọọn̄-inu ìbene me lek
itetet ukpook me lek Okumugwem;
irọriọọn̄ Ogwu Òkup Mbuban,
ọmọ ore ngobo-ntet.
11 Emi, iriọọn̄-inu, mârọ ibe usen ugwem kwun̄ iwa,
mè itap acha isọkọ lek acha kwun̄.
12 Ire oriọọn̄ inu, òriọọn̄ inyi lek kwun̄;
ire okirọ ene ochak,
owu gaalek obobeme ufialek kan̄.”
13 Enenwaan̄ burubut ìre ogwu otu kpamkpam,
mè ogwu una ekiket,
mè ogwu ìkakaan̄ nden̄ geege.
14 Ọmọ ìkikup me otu isotu uwu kan̄,
me inyọn̄ ikasi me ere
òbebene ichit me emen ama,
15 mè ikigwen ebi ìkije iraka,
ebi ìtetet isi itat me oniin̄ ije kiban̄,
16 mè ikibe, “Ogwu geelek ikakaan̄ge ekiket,
igwaka igba ere keyi!”
Îtumu inyi ebi kpekaan̄ ngobo-ntet ibe,
17 “Mun̄ echichiin̄ inwọ, ọmọ okisiki ene lek;
inorie enwenween̄ lek ilet irie, ọmọ okitop.”
18 Ire, ife cha kperiọọn̄ ibe
ke ere ya ke ebi ìkwakwaan̄ ekup;
ke ebi ichen kan̄ cha ekup
me emen udọn̄ ama ekwukwu.