Iriọọn̄-inu ìkigwen ebi ene
8
Ìre iriọọn̄-inu ìkataan̄ ukpo?Sà ngobo-ntet ìkabene ida unye unye?
2 Iriọọn̄-inu ìkeke me inyọn̄ ibot ogoon̄ òbebene,
mè agba lek oniin̄, ere owuwa ugwaka oniin̄ onichichini.
3 Me otunchit, me ere ekije inin̄ ama,
me otu isotu ke îkup mè ikibọn̄ ukpo itumu ibe,
4 “Enyi ebilene ke nkigwen,
enyi bọn ebilene ke ida n̄a okirọn̄ inyi.
5 Enyi ebi una ekiket, ìkaan̄ ekiket,
enyi ebi burubut, ìkaan̄ ejit òkigobo inu itet.
6 Ìgban̄ utọn̄, mije, m̀batumu inu òkaan̄ oruru me lek,
m̀bakama otu itumu inu ònenen.
7 Atikọ okisibi emi me otu;
ikọ ikpak ìre mbuban inu me otu n̄a.
8 Otutuuk ikọ otu n̄a, ìnenen,
kpunu eyi òkọkọọn̄, mè ìre eyi ofiaan̄ me lek.
9 Ikọ chi ìre ikọ ònenen me lek ebi ìkigobo inu itet,
mè ikọ òlilibi itat me lek ebi ìkaan̄ ifuk-ibot.
10 Ìbọkọ nteme n̄a kpan̄asi alata okuket,
mè ìbọkọ ngobo-ntet kpan̄asi atalek alata araran̄.
11 Mije, iriọọn̄-inu înwọn
igak atalek ewuuk unye otu ewe rubi;
kpunu inu geege ene okiweek,
eyi mêkọtbe isa itọ me lek kan̄.
12 “Emi, iriọọn̄-inu, melek iriọọn̄-lek egbaan̄ iluk;
ifuk-ibot mè ata nkeek, îre emi nkaan̄.
13 Itetet ukpook me lek Okumugwem ìre ichacha ijo inu;
emi ncha ugumulek mè ubene lek, mè ijo eru,
mè otu òkitumu ikọ ofiaan̄.
14 Nteme mè ata ifuk-ibot, îre emi nkaan̄;
îre emi nkaan̄ ngobo-ntet, mè ikaan̄ unye.
15 Îre emi ke ebi ubọọn̄ esa ikọt ikida ubọọn̄;
emi ke ebi mkpulu esa ikọt ikidọmọ ikan ònenen.
16 Îre emi ke ebi ibot mkpulu esa ikikup me ibot;
emi ke ebi ilile mè ebi oyerebet
ìkisibi unen oyerebet esa ikirọ inu.
17 Emi ǹkima ebi ìma emi;
ebi igwuun̄ chieen̄ iweek emi, mêweek emi imun̄.
18 Ubọọn̄ mè ulibi ìkup me ubọk n̄a;
inu ubọọn̄ òkifufuk mè ata irọrọ ìkup si me ubọk n̄a.
19 Mfut n̄a îmin igak alata araran̄,
iin̄, îmin igak atalek alata araran̄;
inu nkisan̄a isibi îmin igak alata okuket
ònwọnwọn ichit.
20 Ǹkije me lek oniin̄ eyi ata irọrọ,
mè lek oniin̄ eyi unen oyerebet,
21 mè ikinyi ebi ìmama emi inu ubọọn̄,
mè ikitap uwu ikpoko kiban̄ ijot.
22 “Okumugwem ìdadasi irom emi
sabum înibebene ikwaan̄ kan̄,
emi nre adasi inu îsan̄abe isibi bene me atalek ibebene.
23 Ǹkukup bene me karake akat,
bene me ibebene, sabum enirorom linyọn̄.
24 Mgbọ ugwuuk okwaan̄ ìkakukup-nu,
ke eman emi isibi,
me mgbọ ogbuuruk geege òkisibi mun̄ ìkakukup-nu;
25 sabum enigwugwuun̄ ebi kè ogoon̄ ikam me irek kiban̄,
sabum ebi kè orioon̄ enisisibi, mîmaman emi;
26 me mgbọ Okumugwem ìkarorom-nu ijọn̄ mè ìre oron;
me mgbọ ìkarorom-nu adasi mfuun̄ me linyọn̄.
27 Mgbọ îsun̄be akpabin inyọn̄ me irek, emi òwa me ere ya;
mgbọ îsabe okwuun̄ inyọn̄
iwak ikana okwaan̄ okokop,
28 mgbọ îsun̄be oduku inyọn̄ ikam me akpabin inyọn̄,
me mgbọ îsun̄be ogbuuruk
echi ugwuuk okwaan̄ inye me irek;
29 mgbọ înyibe okwaan̄ okike ere eyi kan̄,
ufuna okwaan̄ ikaraka okike îtọbe inyi;
mgbọ îtọbe okike ere ọdọ eyi linyọn̄ oyakabe,
30 mgbọ ya, emi òwa me agba lek kan̄
nkupbe kubọk ogwu usọ.
Emi nkinyi ọmọ ubelejit usen geelek,
mè ikijop okwa inwọọn̄ lek me isi kan̄ mgbọ geelek,
31 mè ikinwọọn̄ unwọọn̄ me linyọn̄ kan̄ ere ebilene ekiluk,
mè ikibele ejit melek bọn ebilene.
32 “Eya orọ, mgbọ keyi, bọn n̄a, ìgban̄ utọn̄ ìnyi emi;
uga ubelejit òwa inyi ebi ìkije me oniin̄ n̄a.
33 Ìgban̄ utọn̄ me lek ikween̄-inu n̄a, mè ìsa ìriọọn̄ inu;
ikakpọ ìlọ chieen̄.
34 Uga ubelejit okup inyi ogwu òkinọ nteme n̄a,
mè ikikup usen geelek me otu isotu n̄a ikibem,
mè ikikup iban emi me agba ubọk afọn̄ uwu n̄a.
35 Mije, ogwu òweweek emi imun̄, ìweek ugwem imun̄,
ogwa si obokaan̄ nnwọn-isi
inan̄a me ubọk Okumugwem.
36 Ire, ogwu ìkaweek emi ìmun̄, ene ya ìtap unan me lek kan̄;
ebi geelek ìchacha emi, ema mkpa.”