Nteme ofolek nwa òkisi ugan
7
Gwun̄ n̄a, sun̄ ikọ n̄a,mè tet ikọ ntọbe kaan̄ me ejit kwun̄.
2 Sun̄ ikọ ntọbe, mè gat ugwem;
gbala chieen̄ me lek ijejeen̄ n̄a
kubọk ìre ukwuuk chieen̄ kwun̄.
3 Bọp ema kam me otubọk kwun̄,
mè ge ema sun̄ me emen emen ejit kwun̄.
4 Sa iriọọn̄-inu rọ ngwan̄ kwun̄ enenwaan̄,
mè gwen ngobo-ntet ibe ìre ogwu ulọk kwun̄.
5 Ema mêbem owu,
inyi okanin̄ ubọk ogwu enenwaan̄ barabat,
mè ubọk enenwaan̄ ikarege nwa kwun̄,
mè unin̄i otu ikọ kan̄.
6 Usen ge, nkupbe me agba otu nruruk uwu n̄a,
mè ikpọ itibi agbagba otu nruruk ya,
7 mkpọ me etete ebi ikike,
me ogbo ebi nsabọn irieen̄,
mè imun̄ ogwu nsabọn irieen̄ ge ikakaan̄ge nden̄,
8 okije me lek oniin̄ iriaak
me lek uwu ogwu enenwaan̄ barabat ge,
mè ikije ifo agan̄ uwu ogwu enenwaan̄ ya,
9 me lek ufit-egwe ya, me ikakwun̄,
me lek udun eririeen̄ ya egwe ofitbe.
10 Ogwu enenwaan̄ ge, òkeken nken ogwu òje oyet,
osisibi inu ifiọk ifiọk, inichichini ọmọ.
11 Enenwaan̄ ya ìre ogwu otu kpamkpam,
mè ogwu òkiweek ikọ;
ukot kan̄ ìkakikeke me uwu.
12 Sọnja mgbọ ọmọ me oyet, sọnja mgbọ ọmọ me eden̄ ama;
ìkilileek ikana ntutun̄ ere geelek ikiweek ebirieen̄.
13 Ogwu enenwaan̄ yi okakana ogwu
enerieen̄ ya itet gwam, mè ifip otu,
mè ita esip me isi itumu inyi ibe,
14 “Me uwu na, nkaan̄ inu ngwugwa esuuk ngwabe;
chereyi ke nrọ inyan̄a-ibot n̄a iso.
15 Eya ke nsibi inu inenichichini owu;
mweek owu enenen, mè iweek owu imun̄.
16 Mwele ujuja ekwut mkpilaak me inyọn̄ mkpilaak n̄a,
ekwut lilin̄ kpa chieen̄ kpa chieen̄
ònan̄a me Ijipiti ke mwele.
17 Nnyan aran̄ òkibubaan̄ olu eyi uti mâa,
mè uti alò, mè uti sinamọn me lek mkpilaak n̄a.
18 Na, mè eji elaak ejot, mege ere ewelegwe;
eji ebele lek kiji ejit me ima.
19 Nlom n̄a kpunu me uwu;
îkọp uran̄ isi ujọn̄ọ ere.
20 Îben akpa ikpoko kan̄ isa igbaalek ije,
ikaka kan̄ ìbore me etete onyan̄.”
21 Isasa ogbogbo unin̄i otu ikọ irọ gwun̄ enerieen̄ ya ichieek,
mè isa otu ofiaan̄ kan̄ ileke ọmọ.
22 Mgbọ yaage igọgọọk ọmọ ije
kubọk eriembuuk ebesa isi ikpan̄,
mè ije kubọk ogwu welewele okije
melek mkpọn me ukot ifo uwu mkpọn.
23 Môgọọk ikeya, mege oraan̄ ofuun̄ ònin̄ ọmọ ejit,
kubọk unọn okiwuwele isi inin̄ me otu ufe,
ìkariọọn̄ ibe ke ugwem kan̄ môje igọọk.
24 Eya orọ, nsabọn n̄a, mgbọ keyi, ìgban̄ utọn̄ ìnyi emi;
ìriọọn̄ ubọk ìgban̄ ikọ otu n̄a.
25 Ikachieek ibe ejit kinyi ifo lek ogwu enenwaan̄ ya;
ikaje ìlọ oniin̄ ìsi ìnin̄ me oniin̄ kan̄.
26 Mije, îrọ owuwa ene ekwaan̄ erurọn̄ọ;
ebi îkpan̄be, kpebekọt ifuk otu ifuk.
27 Uwu kan̄ ìre oniin̄ ekije isi ama ekwukwu,
oniin̄ òkisa ene isi itap me udọn̄ mkpa.