Nteme ofolek burubut
6
Gwun̄ n̄a, ire obọkọ ogwu melek kwun̄ me ata-ikọ,ire ochieek ikpekpe urieek me ibot ogwu okariọọn̄ge isi,
2 ikọ otu kwun̄ îtet owu kubọk ufe;
inu otumube îtap owu ikam.
3 Gwun̄ n̄a, owu orọn̄ inin̄
me emen ubọk ogwu melek kwun̄.
Inu owu oborọ mè inwọnọ ìre ikeyi:
Je si lek ogwu melek kwun̄ ya, mè gele lek siki,
mè riaak ọmọ enenen.
4 Kachieek ibe ilaak inin̄ owu chieen̄ me irọrọ inu yi,
kachieek ibe uga ilaak ikeme owu, îtata òrọrọ.
5 Nyan̄a lek kwun̄ kubọk òsô me ubọk ogwu ota;
nyan̄a lek kubọk ofut me ubọk ogwu òtip-ufe.
6 Owu ogwu ugbek, je si lek ebi kè atat,
kpọ ubọk ema ekirọ inu, mè sa kween̄ inu nyi lek kwun̄.
7 Ema kpekaan̄ ogwu isi, kpekaan̄ ogwu òkikpọ ikwaan̄,
kpekakaan̄ si ogwu mkpulu.
8 Ire, ema ekisa mgbọ ura ibọm inorie igwook,
mè ikisa mgbọ ekirọkọ uko ititiin̄ inu irerie kiban̄ isun̄.
9 Jei, ogwu ugbek, kpa mgbọ ke owu obolaak inyana ire?
Ìre kpa mgbọ ke obobolo chieen̄ me ilaak okilaak?
10 Owu môkup me lek ilalaak-nu sọnja,
mè inyenyieen̄-nu sọnja,
mè igbagba-nu ubọk ikat isiki efuuk sọnja,
11 ugbọọri môkakana isibi owu me uwuuk-lek
kubọk ogwu ije;
una ubọk mônunu
kubọk ogwu inọ afa inichan owu irak.
12 Ene ikike, ogwu ufialek,
ìkije ikana ere ikikan̄ ataak ataak;
13 ìkisa chieen̄ chieen̄ ifiik ene,
mè ikisa ukot ukot ikitumu ikọ inyi ene,
mè ikisa ubọk ubọk itọ ijeen̄ ene.
14 Ofiaan̄ ofiaan̄ ke îkaan̄ me ejit;
ijo inu ijo inu ke îkitọt mgbọ geelek,
mè ikitap yalayala.
15 Eya orọ, ufialek kan̄ ìbonu me nriki;
môkpukpuku ọmọ igwook me ekakpọge chieen̄;
kpunu ogwu òbokọt inyan̄a ọmọ isibi.
16 Inu gweregwen okup, echi Okumugwem ochabe;
in̄-in̄, inu jaaba ore mbuban inu me lek kan̄,
inu cha ìre:
17 Chieen̄ òkikpọ ene isiki,
otu alọm òkikan̄ ataak,
ubọk òkifiat eje ogwu ǹkalọ,
18 ejit òkitọt otitọt ijo inu,
ukot òkifet ililibi inin̄ emen ijo inu,
19 ogwu ata-ikọ òkikan̄ ataak ataak igwook,
mè ogwu òkitap yalayala me etete bọn ulọk.
Nteme ofolek igagan nwa ofifi ene
20 Gwun̄ n̄a, kirọ ikọ nte kwun̄ otọbe inyi owu,
mè kakpọ inu nga kwun̄ ojeen̄be owu ìlọ chieen̄.
21 Bọp ema kaan̄ me ejit kwun̄ mgbọ geelek;
tobo ema jeen̄ me ebek kwun̄.
22 Mgbọ osikije me oyet, ema mêkijeen̄ owu oniin̄;
osikilaak, ema mêkibem owu;
osinan̄a ikeke me ilaak, ema mêkinyi owu nteme.
23 Mije, ikọ etọbe cha,
ọmọ ore mkpukan̄ owu obosa imọọn̄ oniin̄;
ijejeen̄ ejeen̄be owu,
ọmọ ore utoon̄ obosa iriọọn̄ agan̄ okije inin̄;
osusut esabe ikan̄-inu inyi owu,
ọmọ ore oniin̄ eyi ugwem.
24 Echichi môda owu isan̄a me lek ijo enenwaan̄,
mè unin̄i otu ikọ ogwu enenwaan̄
ikarege nwa kwun̄.
25 Kachieek ibe uja kan̄ itap owu ulọk me ejit;
kachieek ibe chieen̄ kan̄ ileke owu ifiin̄.
26 Mije, mkpukpe ogwu òje oyet
ìre ìkike melek otu ewe okpọkọ fituru ge;
ire, irọrọ ugan-nwa melek enenwaan̄
òkaan̄ olom ìkisa mkpa ijet ene.
27 Ìre ene môlọbọ ukan̄ igwook me inyọn̄ owut-ukot kan̄,
eyi ukan̄ ya kpotakabe ekwut ene ya?
28 Sà ìre ene môkọt ije me inyọn̄ mbubuuk ukan̄,
eyi ukan̄ ìkpotakabe ene ya ukot?
29 Ikeya ke ikup inyi ogwu òsi ìgọọk nwa ofifi ene ilaak;
ogwu geelek òchachak nwa ene ubọk me lek
igọọk ilaak,
ìkponwọnọ osusut.
30 Ogwu inọ òsi ìchiin̄ inu ene mije uraafiọọn̄,
kpekimalek ifieek ikọ.
31 Ire, ire itet, mônyi inu îchiin̄be ya irek jaaba;
ikerere ibe otutuuk inu ubọọn̄ îkaan̄be me uwu kan̄
ìtata inọọn̄.
32 Ene geelek òsi ìgan nwa ene ìkakaan̄ ngobo-ntet;
ogwu òrọrọ inu òkup ikeya, ìjijaka lek kan̄ gaalek.
33 Orukan̄ mè esip ke ìbokaan̄;
esip kan̄, kpekọt ituku isan̄a me isi kan̄.
34 Mije, chieen̄ ile môbene ogwu olom uga unaan̄-ejit;
ikeya orọ, usen ogwu olom môborọ useen̄,
ìkpokaan̄ ejit nsan.
35 Ìkpobọkọ ikpoko òsi-ugan geelek mêkpebe inyi;
inu geelek mêkpebe inyi, ike geelek îwawa, ìkpobọkọ.