Itataba ubọk me utọn̄ ofolek ugan-nwa
5
Gwun̄ n̄a, riọọn̄ ubọk gban̄ iriọọn̄-inu n̄a;siki utọn̄ nọ ngobo-ntet n̄a,
2 inyi owu môkọt isun̄ ata nkeek;
ufuna otu alọm kwun̄ ikọt itet ifuk-ibot ikaan̄.
3 Mije, usem òkisibi me otu alọm enenwaan̄ barabat
ìkirọn̄ọ kubọk aran̄ akwọọk;
ikọ òkisibi me otu kan̄ ìkikup eriook eriook.
4 Ire, me òta kan̄, ọmọ ìkijat kubọk olulut,
mè ireke kubọk oge isi iba.
5 Ukot kan̄ ìkisa ene ije ijet mkpa;
ukot ije kan̄ ìbosa ene isi itap me udọn̄.
6 Ọmọ ìkakikpọ chieen̄ me lek oniin̄ eyi ugwem;
oniin̄ kan̄ ìre kọnọkọnọ, ire, ọmọ ìkariọọn̄.
7 Eya orọ, mgbọ keyi, bọn n̄a, ìgban̄ utọn̄;
ikayaka ikọ otu n̄a ìto.
8 Ìje ìjọn̄ọ ere ìda ìbọkọ me lek enenwaan̄ òkup ikeya;
ikajeje ìriaak me otu isotu uwu kan̄,
9 inyi enyi ekayaka umin kinyi ìnyi ofifi ene,
mè ìkana inu enyi ebọmbe otutuuk
acha ugwem kinyi ìnyi ogwu nnaan̄,
10 ufuna ebi ofifi ene ekasa inu ubọọn̄ kinyi ìrie ijọk,
mè inu enyi ekwookbe ikaan̄
ikasi ìtap uwu ofifi ene ìjot,
11 mè enyi etolek enefieek ejit me mgburudun̄,
mgbọ ufuk kinyi mè akpalek kinyi
môtakabe igwak ita kpai.
12 Owu mônenikibe, “Jei,
ǹjeje icha ikan̄-inu ekikan̄ inyi emi?
Ejit n̄a ìkpọkpọ ijit osusut
ekisulu emi isa ikineen̄ emi isun̄!
13 Ǹkagban̄ utọn̄ ìnyi ebi ìkijeen̄ emi inu,
ǹkanyi utọn̄ me lek ebi ìkinyi emi nteme.
14 Sọntiik osik mârọn̄ inin̄ me emen ichep me isi ene,
eya monitap emi uga esip me isi
me ogbo oyet ere ebi ene etitiin̄be.”
15 Nwọ mun̄ eyi ònan̄a me emen eba mun̄ kwun̄ gaalek;
nwọ ògbugbuk mun̄ eyi ònan̄a
me emen udọn̄ mun̄ kwun̄ gaalek.
16 Ìre mun̄ ogbuuruk kwun̄ ìbokigbọọk me eden̄ oyet,
me emen agbugbuk me oyet ama?
17 Tele mè ire eyi kwun̄ gaalek,
kasa ìrọ eyi mgba-ubọk
melek ogwu ichen òkup melek kwun̄.
18 Tele mè ogbuuruk kwun̄ ire inu egbanabe,
mè bele ejit me lek nwa mgbọ nsabọn̄ irieen̄ kwun̄.
19 Ọmọ ìbet lek uman ogaan̄ ekimama,
mè uman ebot oron òjajaan̄ uja;
eya orọ, tele mè ebe kan̄ ikinyi owu ubelejit mgbọ geelek;
mè imumechieen̄ kan̄ ikisa owu kubọk miin̄ mgbọ geelek.
20 Gwun̄ n̄a, keke môrọ ibe owu òje òlọ oniin̄
ògọọk enenwaan̄ barabat,
mè òsi òkokat ogwu enenwaan̄ ikarege nwa kwun̄?
21 Inu geelek ene okirọ ìlaak obook me chieen̄ Okumugwem,
ọmọ ìkiruruk chieen̄ ikpọ
oniin̄ geelek ogwu ebilene okije.
22 Ijo irọrọ ogwu ikpak okirọ môtet ogwukaan̄ gaalek kubọk ufe;
ijo inu kan̄ gaalek môbọp ọmọ ikam kubọk olik igbọ.
23 Ọmọ môkwu mkpa, mije, ìkakima ikan̄-inu,
ikpele mbubut kan̄ môsa ọmọ ije ilọ oniin̄.