Iriọọn̄-inu ochit
4
Bọn n̄a, ìgban̄ utọn̄ me lek ikan̄-inu nte kinyi,ìgbala utọn̄ ìgban̄, inyi enyi mêkaan̄ ngobo-ntet.
2 Mije, îre ata nteme ke nkinyi enyi,
ikakpọ ijejeen̄ n̄a ìlọ chieen̄.
3 Mgbọ nrebe sọn̄ gwun̄ me ubọk nte n̄a,
mgbọ nkupbe nsek nsek,
mè ire si gwun̄ ibot ge me ubọk nga n̄a,
4 nte n̄a îjeen̄ emi inu, mè ibe emi,
“Tet ikọ n̄a kaan̄ me ejit kwun̄;
kirọ ikọ ntọbe, inyi owu ògat ugwem.
5 Kaan̄ iriọọn̄-inu, mè kaan̄ ngobo-ntet;
kawuuk ikọ otu n̄a, kajeje ìkwala ìnan̄a me lek.
6 Kakpọ iriọọn̄-inu ìlọ chieen̄,
ọmọ môkpọ owu chieen̄ me lek;
ma ọmọ, ke ọmọ mônyan̄a owu isibi.
7 Iriọọn̄-inu, ọmọ omin ichit;
eya orọ, week kaan̄.
Inu geelek omama lek ikaan̄, kaan̄ si ngobo-ntet gbaalek.
8 Bene ọmọ fo inyọn̄, ke ọmọ môjibi owu ibene;
ire okana ọmọ ikat, ọmọ môrọ mè owu òkaan̄ umin.
9 Ọmọ môkwuun̄ owu okpibot ubọọn̄ eyi umin me ibot;
mè ikwuun̄ owu okpibot ubọọn̄ òkup òrirọ òrirọ.”
10 Gwun̄ n̄a, gban̄ utọn̄, mè bọkọ inu nkitumu tap;
inu chi môrọ mè usen ugwem kwun̄ iwa.
11 Nra isa oniin̄ eyi iriọọn̄-inu ijeen̄ owu inu,
mè isa owu ije me oniin̄ ònenen.
12 Osikije ije, kpunu inu òbokwek ibe owu okato ukot kwun̄,
osikilibi ekot, kpunu inu òbotọbọ owu ukot.
13 Tet ikween̄-inu kaan̄ nye, kayat ubọk ìsan̄a me lek;
gbala chieen̄ me lek, mije, ọmọ ore ugwem kwun̄.
14 Katap ukot me oniin̄ ebi ikpak,
kagọọk ebi ijo ife ìgbaan̄ ìje me oniin̄ kiban̄.
15 Kasi lek oniin̄ ya, kalululuk ìje me lek;
gwu kom, mè je nan̄a me lek oniin̄ ya.
16 Ilaak ìkakinin̄ ebi ijo ife chieen̄, îtata ema erọrọ ijo inu;
chieen̄ kiban̄ ìkigwọgwọk ikup,
mege ema isisan̄a ene ge ibọn̄ me ijọn̄.
17 Ema ekisa inu ikpak irie ijot owot,
mè ikisa afa inwọ ijot owot.
18 Oniin̄ ebi ata irọrọ ìkup kubọk egwe òkitotoon̄ inu,
eyi òkpọkpọ ikitoon̄ ifo isi, mege egwe òwele ònye.
19 Ire, oniin̄ ebi ikpak ìkup kubọk uga udun;
ema kpekikọt iriọọn̄ lek inu òtọtọbọ ema ukot.
20 Gwun̄ n̄a, riọọn̄ ubọk gban̄ ikọ n̄a;
siki utọn̄ nọ inu nkitumu.
21 Kachieek ibe ikọ chi ilọ owu chieen̄;
Sun̄ ema me emen emen ejit kwun̄.
22 Mije, ema ìre ugwem isa inyi ebi ìweweek ema imun̄,
mè ire igwagwa inyi otutuuk akpalek kiban̄.
23 Gbala chieen̄ kpọ ejit kwun̄ gak inu geelek,
mije, îre emen kan̄ ke inu òkinyi ene ugwem okigbuk isibi.
24 Kachechieek ibe ikọ ofiaan̄ inan̄a me otu kwun̄ isibi,
kasasa otu alọm kwun̄ ìtumu ikọ ataak.
25 Tet chieen̄ kwun̄ tat me enen isi kwun̄,
mè gwuun̄ chieen̄ kikpọ ere òtatat owu me isi.
26 Rọ oniin̄ otapbe ukot ilibi ìkike,
ke owu môkaan̄ utelelek me oniin̄ ugwem kwun̄.
27 Kagwaka ìnyi agan̄ ulom mè ìre agan̄ ujit,
san̄a ukot kwun̄ me emen ijo inu.