Nteme òkup inyi nsabọn
3
Gwun̄ n̄a, kawuuk ijejeen̄ n̄a,ire, sun̄ ikọ ntọbe me ejit kwun̄.
2 Mije, ema mêrọ usen ugwem kwun̄ ijọn̄ọ,
mè isa esuuk ijet owu.
3 Tet ata ejit mè igbegbe utoon̄-ejit nye me ubọk;
tobo ema kam me ebek kwun̄,
ge ema sun̄ me emen emen ejit kwun̄.
4 Sa me ikeya ke owu môkaan̄ nnwọn-isi mè ata erieen̄
me isi Awaji mè isi ebilene.
5 Sa otutuuk ejit kwun̄ toon̄ me lek Okumugwem;
kasa ngobo-ntet eyi akpalek kwun̄
ìbieen̄ me lek.
6 Riọọn̄ Okumugwem me oniin̄ kwun̄ geelek,
ke ọmọ môrọ mè oniin̄ kwun̄ ije itat.
7 Kare ogwu òriọọn̄ inu me chieen̄ kwun̄ gaalek;
tet Okumugwem ukpook me lek,
mè da lek san̄a me lek ijọ inu.
8 Eyi môre igwagwa isa inyi otutuuk akpalek kwun̄,
mè irọ inyi otu ukwuuk kwun̄ isiki efuuk.
9 Sa inu ubọọn̄ kwun̄ min Okumugwem;
sa otutuuk adasi mfut uko kwun̄ geelek min ọmọ.
10 Mgbọ ya, uwu isun̄-inorie kwun̄ môjot dum,
aya miin̄ môkekiriak ifin
me otu otutuuk ogbokot kwun̄.
11 Gwun̄ n̄a, kakpọ osusut Okumugwem ìsiki chieen̄,
kacha ikan̄-inu kan̄.
12 Mije, Okumugwem ìkikan̄ inu inyi ogwu îmabe,
kubọk ute okikan̄ inu inyi gwun̄ kan̄
ogwu ejit kan̄ obelebe me lek.
13 Uga ubelejit okweek inyi ogwu òweweek iriọọn̄-inu imun̄,
mè ogwu òkakaan̄ ngobo-ntet.
14 Mije, iriọọn̄-inu îkaan̄ oruru igak alata okuket,
otu ewe kan̄ îgak echi atalek alata araran̄.
15 Ọmọ înye otu ewe igak atalek ewuuk unye otu ewe rubi,
inu geelek òkilọk owu ikakaan̄,
kpebesa itọ me lek.
16 Me ubọk agan̄ ulom kan̄, ujọn̄ọ ugwem okup,
me ubọk agan̄ ujit kan̄, ubọọn̄ mè umin okup.
17 Oniin̄ kan̄ ìre oniin̄ eyi utop,
otutuuk oniin̄ kan̄ ìre esuuk esuuk.
18 Uti òkinyi ene ugwem ke ọmọ ore
inyi ebi ìtetet ọmọ ikaan̄ inye,
ebi ìgọgọbọ ọmọ ikam mêkaan̄ uga ubelejit.
19 Okumugwem ìsa iriọọn̄-inu itọbọ ọdọ linyọn̄,
mè isa ngobo-ntet isun̄ akpabin inyọn̄ ikam me irek.
20 Ifuk-ibot kan̄ ke îsa itọọn̄ okwaan̄ ibak;
sa me ifuk-ibot kan̄ ke oduku inyọn̄ orọn̄ọ mbat igwook.
21 Gwun̄ n̄a, tet ata iriọọn̄-inu mè ata nkeek nye me ubọk,
kachieek ibe chieen̄ kwun̄ ilọ me lek kiban̄ mgbọ geege.
22 Ema mêre ugwem isa inyi owu,
mè ire nnwọn-isi eyi owu obokikwaan̄ me ebek.
23 Mgbọ ya, owu môkije me oniin̄ kwun̄ me utelelek,
ukot kwun̄ ìkpotọbọ me lek ekpuk uti geege.
24 Osiyaka lek imaan̄ ibolaak, òkpofieek owot;
osiyaka lek imaan̄, ata ilaak òtotop mônin̄ owu chieen̄.
25 Kafieek owot me lek ùrioon̄ òkinu me nriki,
mè ìre me lek uyọrọlek ebi ikpak mêsabe inu.a
26 Mije, Okumugwem môkup me agba lek kwun̄;
ọmọ ìkpochieek ibe ukot kwun̄ inin̄ me ufe.
27 Kajit irọrọ ata inu inyi ebi îgbebe,
me mgbọ îrebe irek kwun̄ irọrọ.
28 Kabe ogwu melek kwun̄,
“Je, mè yaka na. Iyakwut, mânyi owu,”
me mgbọ inu ya ọmọ òwa me ubọk kwun̄ okupbe.
29 Kakeek ogwu ebilene ogbo kwun̄ ijo,
mije, ìtotoon̄ ejit me lek kwun̄ ke iluk igba owu.
30 Katoon̄ ene uraamọn me ikike,
mgbọ ene ya ìkarọ owu inu geege ìlọ.
31 Kamin ejit me lek ogwu afa,
kagogobo orọmijọn̄ kan̄ geege ìnyi lek kwun̄,
32 mije, ogwu ofiaan̄ ìre mbuban inu me lek Okumugwem,
ire, ogwu òtatat melek kan̄ ìre mbuuruk.
33 Ufieek-otu Okumugwem òwa me uwu ogwu ikpak,
ire, ugbana kan̄ òwa me uwu ogwu ata irọrọ.
34 Ọmọ ìkichak ogwu òkichak ene imọm,
mè ikirọ nnwọn inyi ebi ìkisiki lek.
35 Ìrot ebi ìriọọn̄ inu ìre umin;
ire, esip okup inyi ebi mbubut.