Oruru òkup me lek iriọọn̄-inu
2
Gwun̄ n̄a, ire obọkọ ikọ n̄a itap,mè isun̄ ikan n̄a me emen kwun̄,
2 mè isa utọn̄ kwun̄ inyi iriọọn̄-inu,
mè isa ejit kwun̄ inyi ngobo-ntet;
3 ire otaan̄ ukpo iweek ikakaan̄ ngobo-ntet,
mè ibene ida ikibọn̄ọ ngobo-ntet;
4 ire oweek ọmọ kubọk ekiweek alata okuket,
mè iweek ọmọ kubọk inu ubọọn̄ òlelet;
5 mgbọ ya ke obogobo itet
inu ikakaan̄ ukpook Okumugwem orebe,
mè iweek si irọriọọn̄ Awaji imun̄.
6 Mije, Okumugwem okinyi ene iriọọn̄-inu.
Otu kan̄ ke ifuk-ibot mè ngobo-ntet okinan̄a isibi.
7 Ọmọ ìsusun̄ ntim-mkpan̄ iban ebi ìkirọ inu òtatat,
mè ire agbọ òkikput lek ebi kpekirọ nlilọ inu.
8 Ọmọ okibem oniin̄ ebi ìkirọ unen,
mè ikikpọ chieen̄ me lek oniin̄ ebi ìkigọọk ọmọ me udun̄.
9 Mgbọ ya ke owu môgobo inu òtatat, mè eyi ònenen,
mè eyi ònwọnwọn, mè oniin̄ geelek òjajaan̄ itet.
10 Iriọọn̄-inu mônin̄ me ejit kwun̄,
ngobo-ntet mônenitop owu me lek.
11 Ata nkeek môre ikput-lek inyi owu,
ngobo-ntet môre inu môkibem owu,
12 mè inyan̄a owu isibi me ijo otu oniin̄,
mè ubọk ebi ìkigen ibak itumu ikọ ofiaan̄;
13 ebi ìkitele ijeje me oniin̄ ònenen,
mè isi ikije me oniin̄ òdudun;
14 ebi irọrọ ijo inu okitop me lek,
ìkinwọọn̄ igegen ibak itumu ijo ikọ ofiaan̄;
15 ebi oniin̄ kiban̄ ìkatat,
ebi kpebekọt itoon̄ ejit me lek me oniin̄ kiban̄ geelek.
16 Ata nkeek mè ngobo-ntet
mônyan̄a owu isibi me ubọk enenwaan̄ barabat,
mè irọ inyi owu ònwọnọ unin̄i otu ikọ
ogwu enenwaan̄ ikarege nwa kwun̄;
17 ogwu òtetele olom òfefieek ọmọ asi me ebon,
mè iwuuk ibot înyan̄abe inyi Awaji kan̄.
18 Mije uwu kan̄ ìbosa ene ijet mkpa,
oniin̄ kan̄ ìbosa ene isi ama ekwukwu.
19 Kpunu ogwu òsisi lek kan̄, mè igwu ikom ika,
mè ìyaka ire, ikọt ije inire oniin̄ eyi ugwem.
20 Sa me ikeyi, owu môkije me oniin̄ ebi ata ife,
mè ikigọọk oniin̄ ebi ata irọrọ.
21 Mije, ebi ìkirọ inu òtatat ebeluk me linyọn̄,
ebi kperọ inu geege ilọ ebekup me emen kan̄.
22 Ire, ebi ikpak mêkwaan̄ ita me linyọn̄,
mêjim ebi ofiaan̄ isan̄a me emen kan̄.