Urọk
Oruru urọk
1
Urọk kè Solomọn gwun̄ kè Debit, ogwu ubọọn̄ Ijeren:2 Isasa ikaan̄ iriọọn̄-inu melek ikween̄-inu;
isasa igobo ikọ iriọọn̄-inu itet;
3 isasa ibọkọ ikween̄-inu eyi iriọọn̄-lek,
mè ata irọrọ, mè inu ònenen, mè inu òtatat;
4 isasa irọ ogwu una ekiket ikaan̄ ekiket,
mè ogwu nsabọn irieen̄ ikaan̄ ifuk-ibot mè ata nkeek.
5 Ogwu òriọọn̄ inu mônọ, mè isa ikween̄ inu isọkọ,
ogwu òkigobo inu itet môkaan̄ nteme.
6 Isasa igobo urọk mè ikọ òkup nlelet itet,
mè igobo ikọ ebi ìriọọn̄ inu mè udọk udọk urọk kiban̄ itet.
7 Itetet ukpook me lek Okumugwem,
ọmọ ore ibebene ifuk-ibot.
Ire, ogwu mbubut ìkikpọkpọ iriọọn̄-inu mè ikween̄-inu
chieen̄ isiki.
8 Gwun̄ n̄a, gban̄ utọn̄ me lek ikan̄-inu nte kwun̄,
mè kakpọ chieen̄ ìlọ me lek ijejeen̄ nga kwun̄.
9 Mije echa mêrọ owu òkaan̄ ulibi kubọk òkwaan̄ ọgbọn me ibot,
mè inyi owu umin kubọk ke òjeen̄ akalari isa ijaan̄ ebek.
10 Ire ebi ijo irọrọ inileke owu,
kachieek ìnyi ema.
11 Ire ema ibe, “Na gọọk eji je,
eji ekup ekekpọ ebi eji mêfiatbe eje kiban̄;
eji ekpọkpọ elet ekekpọ ebi kpelọ inu geege.
12 Eji emeen̄ ema me ògat ugwem,
kubọk ama ekwukwu okimeen̄ ene;
eji emeen̄ ema ototuuk,
kubọk ebi ìkifon emen udọn̄ mkpa.
13 Eji mêtiten̄e inu unye otu ewe,
mè itap inu eji mêfumbe ijot uwu kiji gbak.
14 Na, na gọọk eji gbaan̄ je,
mè eji egbaan̄ ekaan̄ akpa itap-ikpoko ge.”
15 Gwun̄ n̄a, kalululuk ìgọọk ema ìje me oniin̄ kiban̄;
katatap ukot me oniin̄ ema ekije.
16 Mije ukot kiban̄ mikigwat ililibi inin̄ emen ijo inu,
ikeya si ke ifafiat eje ene okifet ema me lek.
17 Itoto njin ikana ebi kè ofut,
mgbọ ema ekupbe isi me isi,
ìre inu ikike.
18 Ebi ìkup ikikpọ eje ene, ekikpọ eje kiban̄ gaalek;
ugwem kiban̄ gaalek ke ema enween̄ lek ilileek ikikpọ.
19 Ikeya ke îkup inyi ogwu òkaan̄
ulọk ebek me lek ijo oruru;
ijo oruru ìkisan̄a ebek ugwem ogwukaan̄ kan̄.
Kajit iriọọn̄-inu
20 Iriọọn̄-inu ìkup me lek oniin̄ ikitaan̄ ukpo igwen ene;
ida kan̄ ìkitaan̄ me oyet ile ama.
21 Ìkitaan̄ ukpo me ere ogbogbo ene ekupbe;
ìkup me otunchit ama ikitumu ikọ kan̄ ibe,
22 “Enyi ebi una ekiket,
kpa mgbọ ke enyi ebema una ekiket ire?
Kpa mgbọ ke ebi ìkichak ene
ebenwọọn̄ ichachak ene ire?
Kpa mgbọ ke ebi mbubut ebecha ifuk-ibot ire?
23 Ìgwu ìkom ìna me lek ikan̄-inu nkikan̄ inyi enyi;
mâtumu nkeek n̄a inyi enyi;
mâkpa inu òkup emi me ejit iwele inyi enyi.
24 “Ire, eyi emi ngwenbe enyi, enyi ejijit,
nnyana ubọk inyi enyi, kpunu ogwu òkpọkpọ chieen̄,
25 eyi enyi ejitbe otutuuk nteme n̄a,
kpebọkọ ikan̄-inu n̄a geege itap,
26 emi si mâchak enyi me imọm mgbọ mfufiat isinu inyi enyi,
mè ichak enyi ochak mgbọ ùrioon̄ isitoon̄ enyi;
27 mgbọ ùrioon̄ isi initoon̄ enyi kubọk egwijo,
mè mfufiat isi inu inyi enyi kubọk unye efet;
mgbọ uga ufieejit mè ujaralek isirọn̄ ikeme enyi.
28 “Mgbọ ya, ema mêgwen emi igak, m̀kpabọkọ otu;
ema mêweek emi igak me chieen̄ mun̄ ito,
ire, kpebeweek emi imun̄.
29 Mije, ema mîcha ifuk-ibot,
mè ijit ikakaan̄ ukpook Okumugwem;
30 kpebọkọ nteme n̄a geege itap,
ekpọkpọ ikan̄-inu n̄a isiki chieen̄.
31 Eya orọ, ema mêrie mfut ònan̄a me oniin̄ ema ejebe,
ijo ifiọk kiban̄ cha mônenijot ema owot.
32 Mije, ugwem jom-jòm ebi una ekiket obokpan̄ ema;
ugwem eyi-n̄a-îso-emi ya,
eyi ebi mbubut ekikaan̄, ọmọ obojijaka ema.
33 Ire, ogwu geelek ogbagban̄ emi utọn̄ me lek,
môluk me utelelek,
ukot kan̄ mônye me ijọn̄,
ìkabofieek owot ibe ùrioon̄ môre ọmọ lek.”