28
Ogwu ikpak ìkilibi ekot mgbọ kpegọọk ọmọ,ire, ogwu ata irọrọ ìkinyenye ejit ikeke kubọk egbe àtat.
2 Ido ijo irọrọ ominbe me emen ìkikaan̄ owuwa mkpulu,
ge me udun̄ ge;
ire, ogwu òkaan̄ ngobo-ntet mè ifuk-ibot isikup,
mkpulu ido îra ikeke ijọn̄ọ mgbọ.
3 Ogwu ugbọọn̄ òkifeen̄ ogwu ugbọọn̄ ogbo kan̄,
ìbet lek unye otu ibot òkigwọk ijọn̄ ifiat uko,
mè orọ ibe inorie inan.
4 Ebi ìtetele isusun̄ ikan ekitọn̄ ebi ikpak,
ire, ebi ìkisun̄ ikan ekije ikeme ebi ikpak.
5 Ebi ijo ife kpekigobo unen oyerebet itet,
ire, ebi ìkiweek Okumugwem ekigobo otutuuk itet.
6 Ogwu ugbọọn̄ òkiluk ugwem ikakaan̄ge nrọ-nlọ,
înwọn igak ogwu òbọọn̄ ubọọn̄ òkiluk ugwem mfufiọk.
7 Gwun̄ òkisun̄ Ikan ìre gwun̄ òriọọn̄ inu,
ire, ogwu òkigọọk ebi ebek ile igbaan̄ ije,
ìkisa esip itet ogwu ute.
8 Ogwu òkisa uga urot inyọn̄ ikpoko ufọọk inin̄ ubọọn̄,
ìkititiin̄ inu ubọọn̄ iban ofifi ene
ogwu òbokaan̄ ejit nsan me lek ebi ugbọọn̄.
9 Ogwu ida utọn̄ isan̄a me lek Ikan Awaji,
uriaak kan̄ si ìbore mbuban inu me isi Awaji.
10 Ogwu òsa ogwu òtatat ije inin̄ ijo oniin̄,
ìborọn̄ inin̄ emen udọn̄ ọmọ orọkọbe;
ire, ogwu ìkalọ ìbokaan̄ ata inu me ìrot.
11 Ogwu ubọọn̄ ìkimun̄ lek kan̄ kubọk ogwu òriọọn̄ inu,
ire, ogwu ugbọọn̄ òkakaan̄ ngobo-ntet
okimun̄ mbum kan̄.
12 Inu isije ijaan̄ me lek ebi ata irọrọ, ubelejit ìkisoso ere,
ire, ebi ikpak isinan̄a ikeke ikup me irek,
ebi ene mîra ikilileek.
13 Ogwu òlet ijo inu îrọbe, inu ìkpoje ijaan̄ me lek,
ire, ogwu òtutumu ijo kan̄ isibi, mè itele, mêrọ ọmọ nsan.
14 Uga ubelejit okup inyi ogwu
òkitet ukpook mgbọ geelek
me irọrọ ijo inu,
ire, ogwu òkitet ejit kan̄ inye, uyọrọlek okup inyi.
15 Ogwu ikpak òkikpulu ebi kpekaan̄ unye,
ìbet lek egbe àtat òkigọgọt,
mè ìre ibo nriọk òkinin̄ etim.
16 Ogwu mkpulu ogwu una ngobo-ntet
ìkitutuku ebi kan̄ enenen,
ire, ogwu òchacha oruru ngan môluk ugwem ijọn̄ọ mgbọ.
17 Ogwu eje ene okisisaak
mômun̄ ukwook mege isi inin̄ me udọn̄,
ene geege ikatap ubọk ìnyi ọmọ.
18 Ogwu ìkarọ ìlọ, mênyan̄a isibi,
ire, ogwu mfufiọk ugwem
ìbonan̄a irọn̄ me uwuuk-lek.
19 Ogwu òsi ikwaan̄ me uko kan̄
môkaan̄ inorie irie ijot owot,
ire, ogwu òkinyinya ikana môrie ugbọọri ijot owot.
20 Ogwu ògbegbe utoon̄-ejit môbọkọ ugbana enenen,
ire, ogwu òkison lek iweek ibọbọọn̄ ubọọn̄
ìkponwọnọ osusut.
21 Oyerebet ulibi-chieen̄ ìkanwọn,
ire, ene ìkekibak me lek okpọkọ fituru ge irọ ijo inu.
22 Ogwu ìbuk ìkiweek ibe ọmọ igwat lek inin̄ ubọọn̄,
ire, ìkariọọn̄ ibe ke ugbọọri ìkikukup iban ọmọ.
23 Ogwu òkakan̄ inu inyi ene
mômun̄ nnwọn me mgburudun̄,
igak ogwu òkifiaan̄ isa otu alọm itọn̄ ene.
24 Ogwu òkichiin̄ inu ogwu ute mè ìre inu ogwu uga,
mè ibe, “Eya ìkare inu òlọlọ ma,”
ene ya melek ogwu iwot ìre unene.
25 Ogwu ejit ile ìkitap yalayala,
ire, ogwu òtotoon̄ ejit me lek Okumugwem,
inu ìbojeje ijaan̄ me lek.
26 Ogwu òtoon̄ ejit me lek kan̄ ìre mbubut,
ire, ogwu òkije me iriọọn̄-inu ìkponin̄ me ichep.
27 Ogwu òkichili ubọk inyi ebi ugbọọn̄ inu,
ìkpokup me una,
ire, ogwu òkimun̄ ebi ugbọọn̄, mè ifiik chieen̄,
ogbogbo ufieek-otu okup inyi.
28 Ebi ikpak isikup me irek, ebi ene mîra ikilileek,
ire, ema isikwaan̄, ebi ata irọrọ mîra ikiwa.