29
Ogwu ekan̄be inu inyi owuwa mgbọ òjijit inwenwene,ene ya ìbonin̄ me ichep mgbọ ikakpọge chieen̄,
kpebekọt igwa itet.
2 Unye isikup me ubọk ebi ata irọrọ,
ebi ene mîra ikaan̄ unwọọn̄,
ire, mkpulu isinin̄ ubọk ebi ikpak,
ebi ene mîra ikito mfi.
3 Ogwu òmama iriọọn̄-inu ìkirọ ejit ogwu ute ibele,
ire, ogwu òkinin̄ ogbo me lek ebi òje oyet
ìkijijaka inu ubọọn̄ îkaan̄be.
4 Ogwu ubọọn̄ òkisibi unen oyerebet
okirọ ido ikeke inye,
ire, ogwu òkimin chieen̄ me lek ngan okichep ido.
5 Ogwu òkitumu ikọ unin̄i otu ibak ene,
ìkitip ufe isun̄ iban lek kan̄.
6 Ijo inu ogwu ikpak ìre ufe inyi ọmọ,
ire, ogwu ata irọrọ môkikọt okwa, mè ikibele ejit.
7 Ogwu ata irọrọ ìkiweek unen inyi ebi ijo irek,
ire, ogwu ikpak ìkakaan̄ ngobo-ntet
me lek ojelek ifuk-ibot keya.
8 Ebi ochak ekitap wọlọwọlọ igak ama,
ire, ebi ìriọọn̄ inu ekirọ mè unaan̄-ejit ifo.
9 Ogwu òriọọn̄ inu isigọọk ogwu mbubut irọ ikọ,
ogwu mbubut mônaan̄ ejit, mè irọ ọmọ ochak,
ire, esuuk ìkpokup.
10 Ebi eje ene onin̄be chieen̄ ekichacha ogwu ìkalọ,
ire, ebi ìkirọ inu òtatat ekiweek nnwọn inyi ọmọ.
11 Ogwu mbubut ìkinaan̄ ejit akọn̄ akọn̄,
ire, ogwu òriọọn̄ inu
ìkikekeme unaan̄-ejit kan̄ ikaan̄.
12 Ogwu mkpulu isikima ikọ ataak,
otutuuk ebi ikwaan̄ kan̄ ebekana ebi ikpak.
13 Inu ge ogwu una mè ogwu òtutuku ene
egbaan̄be ikaan̄ ìre ikeyi:
îre Okumugwem obochili ema ene iba chieen̄,
inyi emọọn̄ inu.
14 Ogwu ubọọn̄ òkisibi oyerebet atikọ inyi ebi ugbọọn̄,
ogboon̄ ubọọn̄ kan̄ ìbokekeke ikam mgbọ geelek.
15 Njijan̄ mè ikan̄-inu ìkirọ ibe ene iriọọn̄ inu,
ire, gwun̄ etelebe ibe ikup me lek kan̄,
ìkisa esip itet ogwu uga.
16 Mgbọ ebi ikpak isikiwa, nlilọ inu îra ikimumana,
ire, ebi ata irọrọ mêkup imun̄ ema ekirurọn̄ọ igwook.
17 Kisulu gwun̄ kwun̄, ke môrọ ibe owu òsiki efuuk,
mè inyi owu ubelejit.
18 Ere Awaji ikachilige inu ìbook, ebi ene echechieen̄ ita,
ire, uga ubelejit òwa inyi ogwu òkisun̄ Ikan Awaji.
19 Kpekikọt isa otu otu ikan̄-inu inyi ogwu usun̄,
mije, môgobo inu ekitumu itet, ire, ìkpochieek irọrọ.
20 Ogwu òkitumu ikọ kpuak, ìkakiteten̄ ibot ikọ kan̄,
ònu-me-isi ogwu mbubut înwọn igak eyi ene ya.
21 Ogwu òririreek ogwu usun̄ kan̄
bene me mgbọ îrebe nsabọn,
me òta kan̄, ogwu usun̄ ya
obonikana ogwukaan̄ uwu ene ya.
22 Ogwu unaan̄-ejit ìkitap yalayala,
ogwu uyok-ejit ìkirọ nlilọ inu owuwa mgbọ.
23 Ugumulek ìkisiki ene,
ire, isiki-lek okinyi ene umin.
24 Ogwu ògọgọọk ogwu inọ ikeke, ìsọk ukan̄ iwọp lek kan̄;
ubọk geelek mêtan̄abe awọ itoon̄ ọmọ me ibot,
ìkpokọt ikama otu ikpa inu òrọrọ.
25 Ukpook ebilene ìkitap ene me ufe,
ire, ogwu òtoon̄ Okumugwem ejit me lek,
unan ìkpore lek.
26 Owuwa ene ekiweek nnwọn-isi me ubọk ogwu mkpulu,
ire, unen oyerebet ìkinan̄a me ubọk Okumugwem.
27 Ogwu mfeen̄ ìre mbuban inu me lek ebi ata irọrọ;
ebi ìkirọ inu òtatat ìre mbuban inu me lek ogwu ikpak.