Urọk Aguru otobe
30
Urọk kè Aguru gwun̄ kè Yake.Eyi ìre udọk udọk ikọ
echi gwun̄ enerieen̄ yi otumube inyi Itien.
Ìtumu inyi Itien mè Ukali ibe,
2 “Emi mbubut ichit me lek ebilene,
ǹkakaan̄ ngobo-ntet ebilene ekaan̄be.
3 Ǹkakwekween̄ iriọọn̄-inu,
inyi mâkọtbe ikaan̄ ifuk-ibot ofolek Ogwu Mbuban.
4 “Ekene onene ifo emen inyọn̄, mè isibi inu?
Sà ìre ekene otitiin̄ efet itap me akajit ubọk kan̄ ichit?
Ekene okat mun̄ me emen ekwut ibọp?
Sà ìre ekene osun̄ ntutun̄ ere geelek me linyọn̄
me irek kan̄?
Keke ore erieen̄ kan̄? Sà ìre keke ore erieen̄ gwun̄ kan̄?
Tumu nyi emi nu, mè ire oriọọn̄!
5 “Otutuuk ikọ Awaji, kpunu okpa geege me lek;
Awaji ìre agbọ inyi ebi geelek ìnitap ibot me ubọk kan̄.
6 Katap inu geege ìsọkọ me lek ikọ kan̄,
inyi ikakan̄ inu ìnyi owu, mè owu okakana ogwu ataak.
7 “Okumugwem, inu iba ke mbeek me ubọk kwun̄,
kajit inyinyi emi mege ǹkwu:
8 Ge ìre: Da ofiaan̄ melek ataak jọn̄ọ ere me lek n̄a.
Òso iba: Kanyi emi ugbọọri, kanyinyi si emi ubọọn̄.
Ire, nyi emi inorie òboso emi me egwe usen,
9 inyi nkarie ìjot owot, mè ìjit owu,
mè ìkido owu erieen̄ ibe, ‘Ekene ore Okumugwem?’
Mè ìyaka ire: inyi nkarọn̄ ugbọọri, mè ìsi ìchiin̄ inọ,
mè ìfiat erieen̄ Awaji n̄a.
10 “Kasi ìtumu ogwu usun̄ ìfiat me isi nte uwu kan̄,
inyi ikafieek otu ìnyi owu, mè awọ ikatet owu.
11 “Îkaan̄ ebi ìkifieek otu inyi nte kiban̄,
kpekigbana nga kiban̄.
12 Ema ekitatana me chieen̄ kiban̄,
ire, ifin kiban̄, ema kpekigwọk isan̄a.
13 Ema ekigugumu lek,
mè ekekpọ ene irak irak.
14 Ejeek kiban̄ ìreke kubọk oge akọn̄,
uga kiban̄ ìreke kubọk otu oge,
isasa itaka ebi ugbọọn̄ isan̄a me linyọn̄,
mè itaka ebi una ubọk inọọn̄ me etete ebilene.
15 “Ntitiook ìkaan̄ otu iba ikisa irie ene,
echi òkibe, ‘Nyi emi! Nyi emi!’
“Îkaan̄ inu ita echi owot ìkakijot,
in̄-in̄, inu ini echi kpekitumu ibe, ‘Îkem!’
16 Udọn̄-ufuun̄, mè owot ogwu òra,
mè ijọn̄ òkinwọ mun̄ ìkakijot,
mè ukan̄, eyi ìkakitumu ibe, ‘Îkem!’
17 “Gwun̄ òchak ogwu ute ochak,
mè ijit isisiki ibot inyi nga kan̄, ìbokwu mkpa unọn;
mkpukpo emen iteke môrọkọ ọmọ chieen̄,
edene môtaka anam kan̄.
18 “Îkaan̄ inu ita òkup emi me lek uyeke uyeke,
in̄-in̄, inu ini echi nkakọtge ìgobo itet:
19 Ubọk igo okibaan̄ alọm ikana me akpa isinyọn̄,
mè ubọk ijijinu okifiọọk me inyọn̄ ewuuk,
mè ubọk uji ile okikọp me emen emen ejit okwaan̄ ile,
mè ubọk enerieen̄ okima obaak enenwaan̄.
20 “Ubọk nwa òsi ugan okirọ ìre ikeyi:
isirie isan̄a, îra ituku otu,
mè ibe, ‘Ǹkarọ inu geege òlọlọ.’
21 “Îkaan̄ inu ita òkisisik linyọn̄,
in̄-in̄, inu ini echi linyọn̄ ìkakikọt ìme:
22 Ogwu usun̄ ònenikeke ubọọn̄,
mè ogwu ndide inorie ojotbe owot igak,
23 mè enenwaan̄ ekichacha ònenikaan̄ olom,
mè enenwaan̄ usun̄ ònenibọkọ nga uwu kan̄ irek.
24 “Îkaan̄ inu ini òsisiik ichit me linyọn̄,
ire, ema eriọọn̄ inu isaba iraka otutuuk ebi ìriọọn̄ inu:
25 Ebi kè atat, kpekaan̄ unye geege,
ire, ekisa mgbọ ura ititen̄e inorie kiban̄ isun̄.
26 Ebi kè ikpi emen ewuuk, kpekakaan̄ efuuk geege,
ire, ekitaka udọn̄ kiban̄ me lek nga ewuuk ile.
27 Ebi kè akaka ituuk, kpekaan̄ ubọọn̄,
ire, ema otutuuk ekinan̄a isibi ije me urum me urum.
28 Ebi kè oban-uwu, mêkọt itet ema ubọk ubọk,
ire, ekekimun̄ ema me uwu ebi ubọọn̄.
29 “Îkaan̄ inu ita òkije ukaan̄-lek ukaan̄-lek,
in̄-in̄, inu ini òkije òrirọ òrirọ:
30 Egbe àtat, ogwu unye me lek otutuuk anam geelek,
ìkakichichini melek inu geege, mè oje okpebe.
31 Orie unọn òkije òkoon̄ òkoon̄, mè orie ebot,
mè ogwu ubọọn̄
ogwu ebi akọn̄ kan̄ echieekbe me lek.
32 “Ire obubut mè ikibene lek,
mè ìre òtọt ijo otitọt,
sa ubọk kana chit isi kwun̄, mije esip.
33 Mije, isichimi mun̄ ebe, ìkisibi abak,
isichimi inwọm ene, ìkisibi eje,
ikeya si, isichimi unaan̄-ejit, ìkisibi ibaak.”