Urọk ogwu ubọọn̄ Lemuwen otobe
31
Urọk ogwu ubọọn̄ Lemuwen, udọk udọk ikọ ogwu uga osabe iteme ọmọ nteme:2 “Jei, gwun̄ n̄a! Jei, gwun̄ òsibi emi me owot!
Jei, gwun̄ inyan̄a-ibot n̄a!
3 Kasa unye kwun̄ ìnyi ebibaan̄,
kasa ugwem kwun̄ ìnyi ife cha
ìkikpukpuku ebi ubọọn̄ igwook.
4 “Jei Lemuwen! Miin̄ ìkakup ìnyi ebi ubọọn̄ ma!
Ebi ubọọn̄ ekakinwọ miin̄!
Ebi mkpulu esan̄a ebek me lek miin̄ òkisa ene ma,
5 inyi ema ekanwọ, mè ìwuuk inu ikan otumube,
mè ìfieek nlilọ oyerebet ìnyi ebi ekitutuku.
6 Sa miin̄ ukan̄ nyi ebi ìbekwakwaan̄,
mè sa miin̄ òkisa ene nyi
ebi ugwem ìkayaka ìtop me lek,
7 inyi ema enwọ, mè ewuuk irek ugbọọri kiban̄,
mè ekayaka ìkeek ukwook kiban̄ ofifi.
8 “Tumu ikọ me ibot ebi kpekaan̄ otu,
mè gbini unen nyi otutuuk ebi ebekpakpan̄.
9 Tumu ikọ, mè sibi oyerebet ònenen,
mè gbini unen ebi ìkup me tukutuku
mè ebi una ubọk.”
Nwa ata eru
10 Nwa ata eru, ekene obokọt iweek imun̄?
Ọmọ onye ewe igak ewuuk unye otu ewe rubi.
11 Ogwu olom ìkitoon̄ ọmọ ejit me lek,
sa me ikeya, ata oruru geege ìkponan ogwu olom.
12 Ìkirọ ogwu olom ata inu, ìkakirọ ijo inu,
otutuuk usen ugwem kan̄.
13 Ọmọ ìkigobo inwọọn̄ anam mè eri,
mè osa ubọk kan̄ gaalek olọk ekwut.
14 Ọmọ ìbet lek uji ile ebi mbit ekisa ikọp ewe,
òkisa inorie kan̄ me ujọn̄ọ ere inu.
15 Ọmọ ìkinan̄a ilaak mgbọ egwe ìkatotoon̄ ìta,
mè orọ inorie onyi ebi uwu kan̄,
mè ònyi nsabọn ibaan̄ uwu kan̄ eyi kiban̄.
16 Ìkikpọ ijọn̄ ònwọnwọn, mè ilep,
mè isa ikpoko ubọk kan̄ iwop uko gerep.
17 Ire me lek ikwaan̄, ìkitotobo ekwut kan̄ inye me ebon,
ubọk kan̄ si ìnyenye kwok kwok isisi ikwaan̄.
18 Ìbomumun̄ ibe ewe kan̄ òkije ijaan̄,
ìkimimin ukan̄ irọn̄ eririeen̄ ikup irọ ikwaan̄ kan̄.
19 Ubọk kan̄ ìkinyenye me lek uti iyaka eri,
otubọk kan̄ si ìkigwagwat me lek ilọlọk ekwut.
20 Ìkinyanyana ubọk kan̄ ire lek ebi ugbọọn̄,
mè òkochili ubọk onyi ebi una.
21 Ìkakifieek owot me lek ofiik mgbọ utọọk,
mije, ìkilọlọk ofọnti utọọk iso otutuuk ebi uwu kan̄.
22 Ọmọ gaalek okichim ekwut mkpilaak kan̄,
mè ikisa atalek ekwut lilin̄
mè ekwut irio irio ibala lek kan̄.
23 Ogwu olom îkaan̄ isi me oyet ama,
mgbọ îkigọọk ebi ugane ama kiban̄ isiki ikweek irek.
24 Ọmọ ìkichachak ekwut lilin̄ inyam,
mè ikinyi ebi mbit fanti ema ekilep isi inyam.
25 Unye mè umin ìsoso ọmọ lek kubọk ekwut ebon,
otu kan̄ ìkikup imọm imọm,
ìkafieek owot me lek mgbọ òkup me isi.
26 Ikọ iriọọn̄-inu okinan̄a me otu kan̄ isibi,
nteme ata ejit okinan̄a me otu alọm kan̄ isibi.
27 Ìkigwugwuun̄ chieen̄ me lek inu geelek òkirọ me uwu kan̄;
ìkisisi sabum ònorie.
28 Nsabọn kan̄ ekinanan̄a ikeke,
mè igwen ọmọ ogwu egbanabe;
nlom kan̄ si ìkitọtọn̄ ọmọ ibe,
29 “Owuwa ebibaan̄ mîkaan̄ ata eru,
ire, me etete kiban̄ otutuuk, owu ochit!”
30 Emen isi ìkekifiaan̄ ene, uja ìkekigwọk ita,
ire, enenwaan̄ òkitet ukpook Okumugwem
ìre ogwu ebekitọtọn̄.
31 Ìnyi ọmọ umin ògbegbe ata ubọk ikwaan̄ kan̄,
ìsa me lek ikwaan̄ îsibe ìtọn̄ ọmọ me oyet ama.