Utop ìre inu ikike
2
Emi nkeek me lek n̄a ibe, “Mgbọ yi, mâtọ-nu ubelejit ikpọ, mè ikpọ-nu utop òkup me lek irerie ugwem.” Ire, mmumun̄ ibe ke eya si ìre inu ikike. 2 Nnenibe, “Ichachak imọm ìre burubut. Ìre kpasi nnwọn okup me lek irerie ugwem?” 3 Eya ke ntumu ifieek ibe ke mâsa miin̄ ibele lek n̄a ejit, mè inin̄ mbubut, ire, m̀kpasan̄a ejit n̄a me lek iriọọn̄-inu. M̀be mârọ ikeyi, inyi ǹkọt m̀mun̄ inu ònwọnwọn ibe bọn ebilene ekerọ me usen inen mè inen ema ekaan̄be iluluk ugwem kiban̄ me irak isinyọn̄.4 Nrọ owuwa ikpele ikpele ikwaan̄. Nnama owuwa uwu inyi lek n̄a, mè iwop uko gerep owuwa owuwa. 5 Mwop owuwa uko ajakajak, mè irọ owuwa oyet ifit inyi lek n̄a, mè iwop owuwa esese uti òkito mfut me emen kiban̄. 6 Nrọkọ owuwa udọn̄ mun̄ inyi lek n̄a. Emen kiban̄ ke ekichibi mun̄ igwook me lek uti òkitibi me emen uko uti n̄a cha. 7 Nlep usun̄ ebirieen̄ mè ebibaan̄, mè ikaan̄ si usun̄ ebi emaan̄be me uwu n̄a. Nkaan̄ si urum eriembuuk mè urum arọọn̄ mè ebot iwa igak ene geelek òdadasi n̄a ikup me Jeruselem. 8 Ntitiin̄ alata araran̄ mè alata okuket, mè inu ubọọn̄ echi ebi ubọọn̄ mè echi ebi ibot mkpulu ido isun̄ inyi lek n̄a. Nkaan̄ si ebi okwa ebirieen̄ mè ebibaan̄, mè ikaan̄ si ugan ogbogbo,a mè ikaan̄ si otutuuk inu geelek òkilọk bọn ebilene. 9 Emi mmin igak ene geelek òdadasi n̄a ikup me Jeruselem. Me emen otutuuk inu cha, iriọọn̄-inu n̄a si ìbabia emi me lek.
10 Inu geelek chieen̄ n̄a odobe, ǹkajit lek n̄a inu ya;
inu geelek òbonyi emi unwọọn̄ me ejit, ǹkatele irọrọ.
Ejit n̄a ìbebele me lek otutuuk ikwaan̄ nrọbe,
ubelejit ya ore mkpukpe eyi akpalek n̄a
me otutuuk ikwaan̄ n̄a geelek.
11 Ire, mgbọ nsikibe lek ikpọ
otutuuk ikwaan̄ cha ubọk n̄a orọbe,
mè ikpọ kwulukwulu nkwukwulube me lek,
mmumun̄ ibe ke otutuuk cha ìre inu ikike,
ìbet lek itetet efet.
Kpunu oruru geege me irak isi ura.
Iriọọn̄-inu mè mbubut ìre inu ikike
12 Nnenigwu ikom ikikeek inu ofolek iriọọn̄-inu,
mè ètele, melek mbubut.
Keke ke ayaya ogwu ubọọn̄ obokọt irọ
igak inu ebi ìdadasi ire ubọọn̄ ewuukbe lek irọ?
13 Mmun̄ ibe ke iriọọn̄-inu înwọn igak mbubut,
kubọk utoon̄ onwọnbe igak udun.
14 Ogwu òriọọn̄ inu îkaan̄ chieen̄ îkisa imọọn̄ inu,
ogwu mbubut ìkije me emen udun;
ire, mmun̄ ibe ke inu yaage okup inyi ema ene iba.
15 Nnenikeek me ejit n̄a ibe,
“Inu òkup inyi ogwu mbubut okup si inyi emi.
Ire ikeya, kpasi oruru ke nkaan̄ kubọk ogwu òriọọn̄ inu?”
Nnenitumu me ejit n̄a ibe,
“Eyi si ìre inu ikike.”
16 Mije, kpebekeek ogwu òriọọn̄ inu mè ogwu mbubut
ijọn̄ọ mgbọ;
mêwuuk ema, isi me udun̄, mgbọ òkinu me isi.
Ogwu mbubut ìbokwukwu,
ikeya si, ogwu òriọọn̄ inu ìbokwukwu si.
Ukwook linyọn̄ keyi ìre inu ikike
17 Eya orọ, emi ncha ugwem, mije, ikwaan̄ ekirọ me irak ura îtap emi ufialek me lek. Otutuuk inu cha ìre ikike, ìbet lek itetet efet. 18 Emi ncha otutuuk inu geelek nkwukwulube me lek me irak isi ura, mije, m̀batetele otutuuk cha inyi ogwu môrakabe irek n̄a ikup. 19 Ekene oriọọn̄, mè ìre ene ya môre ogwu òriọọn̄ inu mè ìre ogwu mbubut. Ire, ọmọ obokaan̄ unye me lek otutuuk ikwaan̄ nkwukwulube me lek, mè isa iriọọn̄-inu igbaalek irọ me irak isi ura. Eyi si ìre inu ikike. 20 Eya ke emi mfieek ejit òfo me lek otutuuk ikwaan̄ nrọbe me irak ura. 21 Mije, ene môsa iriọọn̄-inu mè ifuk-ibot mè efuuk irọ otutuuk ikwaan̄ kan̄ isan̄a, mè inan̄a itele isa inyi ofifi ene ogwu ìkasisi ikwaan̄ geege me lek. Eyi si ìre inu ikike, mè ire si uga mfeen̄. 22 Keke ore oruru ogwu ebilene okaan̄be me lek otutuuk kwulukwulu îkwukwulube, mè ukwook geelek îkwookbe me irak isi ura? 23 Otutuuk usen kan̄ ìre unaan̄ mè ufieejit ikwaan̄; ikerere eririeen̄, ejit kan̄ ìkasiki efuuk. Eyi si ìre inu ikike.
24 Kpunu inu ònwọnwọn inyi ogwu ebilene igak irerie mè inwọnwọ, mè imumun̄ utop ònan̄a me lek ikwaan̄ kan̄. Mmun̄ ibe ke eyiyi si ìnan̄a me ubọk Awaji. 25 Mije, ilọ me lek Awaji, ekene obokọt imun̄ inorie irie, sà ìre ekene obokọt irie ugwem? 26 Ogwu òkirọ inu òneme Awaji, ogwugwa ke Awaji okinyi iriọọn̄-inu mè ifuk-ibot mè ubelejit. Ire, ogwu ijo ene, ogwugwa ke îkinyi ukwook itititiin̄ inu ubọọn̄ isun̄, inyi môyakabe inyi ogwu òrere ata ene me isi Awaji. Eyi si ìre inu ikike, mè ire si itetet efet.