Ogwu Etip
Inu geelek ìre inu ikike
1
Echi ìre ikọ Ogwu Etip, òre gwun̄ kè Debit, mè ire ubọọn̄ me Jeruselem.2 “Inu ikike ògak inu ikike!”
Ogwu Etip ìtumu ibe,
“Inu ikike ògak inu ikike!
Otutuuk ìre inu ikike!”
3 Ìre keke ore oruru ene okaan̄be
me lek kwulukwulu kan̄ geelek
echi îkikwukwulu me irak isi ura?
4 Ukot iraka, ukot ònu,
ire, linyọn̄ me ere linyọn̄ okupbe ire mgbọ geelek.
5 Ura ibum, ura òchep,
mè ògwat lek ògwu okom
ofo ere îboyaka isi ikpọk ibum.
6 Efet iwut inin̄ agan̄ osiki,
ògwu okom owut ònin̄ agan̄ inyọn̄;
efet ìkigba iyak ikana okokop,
mè òyaka okana ònonin̄ me akpat ukot kan̄.
7 Otutuuk mun̄ okolo geelek ìkita isi igwook me emen awaji,
ire, emen awaji jojot, ìkajot.
Emen okolo cha mun̄ onan̄abe ita isibi,
ere yaage si ke îkibaak iyaka isi inin̄.
8 Inu geelek ìkekita ene efuuk me owot,
iraka ubọk ebilene ebekọt itumu.
Chieen̄ ìkakimun̄ inu ìjot,
utọn̄ ìkakinọ ikọ ìjot.
9 Kpunu inu geege òrere ayaya me irak ura;
inu òwuwuuk lek ikup, ọmọ obokup,
inu ewuukbe lek irọ, ọmọ ke eberọ.
10 Ìre îkaan̄ inu eyi ene môtumube ibe,
“Ìkpọ, eyiyi ìre ayaya inu”?
Inu ya îwuwuuk lek ikup akarake akat,
ìkukup sabum ukot kiji.
11 Ebi ene kpekikeek inu òrọrọ me mgbọ òraraka.
Ikeya si, inu echi òborọ me mgbọ òkup me isi,
ebi mênube me udun̄ kpebekeek.
Iriọọn̄-inu ìre inu ikike
12 Emi, Ogwu Etip, mwuuk lek ire ubọọn̄ ebi Ijeren me Jeruselem. 13 Emi ntap lek n̄a me lek ikwekween̄ inu, mè isa me iriọọn̄-inu iwọlọ inu geelek ekirọ me irak isinyọn̄ ikpọ, mè imun̄ ibe ke îre ikpele ukwook ke Awaji osa inyi bọn ebilene, ibe ekekwukwulu me lek! 14 Emi mmọọn̄ otutuuk inu geelek ekirọ me irak isi ura. Otutuuk cha ìre inu ikike, ìkup kubọk ekiweek itetet efet.
15 Inu ònwunwunwunu, kpebekọt inen̄e itat;
inu kpunube, kpebekọt ifuk itap me ifuk.
16 Nnenikikeek me lek n̄a ibe, “Kpọ, emi mmin ene, mè iriọọn̄ inu enenen igak ene geelek òkpukpulu Jeruselem sabum emi. Me emen ejit n̄a, emi nriọọn̄ inu iriọọn̄-inu orebe ijaan̄, mè iriọọn̄ si inu ifuk-ibot orebe ijaan̄.” 17 Ntap lek ikween̄ ike mâgobobe iriọọn̄-inu itet, mè igobo si ètele melek mbubut itet. Ire, mweek imun̄ ibe ke eyiyi si ìre iweweek itetet efet.
18 Mije, owuwa iriọọn̄-inu ìre owuwa ufieejit,
owuwa ifuk-ibot ìre si owuwa saasaak-ejit.