Ibọbọọn̄ ubọọn̄ ìkare unwọọn̄
6
Îkaan̄ ijo inu ge mmun̄be me irak isi ura eyi òkitet ebilene lek: 2 Ene ogwu Awaji orọbe inyi ibọọn̄ ubọọn̄, mè ikaan̄ inu melek umin, kpunu inu geege eyi ejit kan̄ odobe ònanan ọmọ. Ire, Awaji ìkachieek ibe ọmọ irie inu cha, ogwu ichen oyaka inirie. Eyi ìre inu ikike, mè ire si atalek ijo orukan̄. 3 Ire ene ikaan̄ efit bọn ebirieen̄, mè iluk ugwem owuwa acha, mè ikan, ire, ìkarie utop me lek inu îkaan̄be, kpefuun̄ si ọmọ ijaan̄ mgbọ îkwube, emi m̀be ke gwun̄ emanbe nkwukwu înwọn igak ene ya. 4 Mije, gwun̄ ya ìje ikike inu, mè ije me ndudun ifo, erieen̄ kan̄ si ìkup me ndudun, mije, kpenyinyi-nu ọmọ erieen̄. 5 Gwun̄ ya ìkariọọn̄ ura, ìkarerieen̄ si chieen̄ me lek ura, ire, îkaan̄ isiki-efuuk igak ene ya. 6 Ikerere ene ya ìluk obop acha mgbọ iba, mè ìkarie utop me lek inu îkaan̄be, me atikọ, ere yaage ke ọmọ mè gwun̄ ya ebesi.7 Kwulukwulu geelek ene okikwukwulu, ìkifo otu;
ire, owot jojot, ìkajot.
8 Ire ikeya, ìre keke ke ogwu òriọọn̄ inu
osa igak ogwu mbubut?
Sà ìre keke ore oruru ogwu ugbọọn̄
ogwu òrọriọọn̄ ubọk ekiluk ugwem me etete ebi ene?
9 Irerie inu esabe chieen̄ imun̄
înwọn igak ikakaan̄ ulọk ebek me lek inu kpesa chieen̄ imun̄.
Eyi si ìre inu ikike,
mè ire si itetet efet.
10 Inu geelek òkukup, îwuuk lek ikaan̄ erieen̄,
inu geelek ogwu ebilene orebe, mîwuuk lek iriọọn̄ isan̄a;
kpunu ogwu òbokọt igbini ikọ
melek Awaji ogwu òmimin igak ọmọ.
11 Ikọ etumube ijot ijọn̄,
ìkakikaan̄ ibot me lek.
Me atikọ, itutumu ikọ iwa
ìkakikaan̄ oruru.
12 Ekene oriọọn̄ inu ònwọnwọn inyi ogwu ebilene me ugwem kan̄, me otu ifuk usen ugwem ikike kan̄, echi òboraka isan̄a kubọk ogugo? Ekene obokọt itumu inyi ọmọ inu òborọrọ me irak isi ura mgbọ ọmọ isikwu iraka?