Iriọọn̄-inu
7
Ata erieen̄ înwọn igak atalek aran̄ utop olu;usen mkpa înwọn igak usen iman.
2 Înwọn isisi ere mkpa ene igak isisi ere ijọk,
mije, mkpa ore okputut inyi ene geelek;
îgbe ibe ogwu òkup me ògat ugwem itap ikọ chi me ejit.
3 Ufieejit înwọn igak imọm,
mije, ugwuuk òkup ene me isi
ìkekinen̄e ejit ene isun̄ ijaan̄.
4 Ejit ebi ìriọọn̄ inu ìkup me uwu ere ekifieek ejit mkpa,
ire, ejit ebi mbubut ìkup me uwu ere ekibele ejit.
5 Inọnọ ikọ ogwu òriọọn̄ inu oganabe inyi ene
înwọn igak igbagban̄ okwa
ogwu mbubut okọtbe itọn̄ ene.
6 Mije, imọm ogwu mbubut ìbota mgbọ yaage
kubọk ukan̄ ukpak òkirama, mè òniin̄ òtele otin̄.
Eyi si ìre inu ikike.
7 Mfeen̄ ìkirọ ogwu òriọọn̄ inu ikana mbubut,
irerie udun̄ ìkiwuwọlọ ene ejit.
8 Okputut inu, ọmọ onwọn igak ibebene kan̄;
ukarajit, ọmọ onwọn igak ugumulek.
9 Kakigwat lek ìnaan̄ ejit,
mije, unaan̄-ejit ìre orọmijọn̄ ebi mbubut.
10 Kakido ibe, “Keke orọ
mgbọ ukot ikaan̄ onwọnbe igak mgbọ kechi?”
Mije, idodo keya ìkajeen̄ iriọọn̄-inu.
11 Iriọọn̄-inu ìnwọn kire ìrot,
mè ire oruru inyi ebi ìkup me ugwem me irak isi ura.
12 Mije, ogwu òkup me irak okwukwek iriọọn̄-inu,
ìbokup si me irak okwukwek ikpoko;
ire, oruru ògbegbe ibe eriọọn̄
ìre ke iriọọn̄-inu ìkibọọk
ugwem ogwu òkakaan̄ ọmọ.
13 Kpọ-nu ubọk ikwaan̄ Awaji:
Inu Awaji orombe nwununwunu,
ìre ekene obokọt ineen̄?
14 Mgbọ înwọnbe owu, bele ejit,
mgbọ îfieekbe owu, kawuuk ibe
ke Awaji osun̄ ata mgbọ,
mè isun̄ si ijo mgbọ,
inyi ogwu ebilene ikakọt ìriọọn̄
inu òborọ mgbọ òkup me isi.
Iriọọn̄-inu ebilene îkaan̄ okike
15 Me ugwem ikike yi nkiluk, mmun̄ inu iwa:
Mmun̄ ogwu ata irọrọ okwube me emen ata irọrọ kan̄,
mè imun̄ si ogwu ikpak olukbe ujọn̄ọ ugwem
me emen ikpak kan̄.
16 Kare ogwu ata irọrọ ìraka iman̄,
karere si ogwu òriọọn̄ inu ìraka iman̄;
keke orọ obokpan̄ lek kwun̄?
17 Kare ogwu ikpak ìraka iman̄,
karere si ogwu mbubut;
keke orọ obokwu sabum mgbọ kwun̄?
18 Înwọn ibe owu òtet ge,
mè okatele eyi keyilọ;
mije, ogwu òkitet ukpook Awaji môje itibi iba cha.
19 Iriọọn̄-inu ìkirọ ene ge òriọọn̄ inu inye lek
igak akọp ebi mkpulu me emen ama.
20 Kpunu ogwu ata irọrọ geege me linyọn̄
ogwu òkirọ ata inu gaalek, ìkakirọ ijo inu.
21 Kakibọkọ otutuuk ikọ geelek ebi ene etumube ìtap,
inyi owu okanọ gwun̄ uwu kwun̄
okitumu ijo ikọ ibak owu.
22 Mije, owu oriọọn̄ me ejit kwun̄
ibe ke owu si otumu ijo ikọ ibak ofifi ene.
23 Nsa iriọọn̄-inu idọmọ otutuuk inu chi ikpọ, mè initumu ibe ke ǹkiweek ikakaan̄ iriọọn̄-inu. Ire, iriọọn̄-inu okpọkpọ ijọn̄ọ emi ere me lek.
24 Inu geelek òkimọnọ irek
îjọn̄ọ ere me lek ene ikọkọt iriọọn̄,
mè ikup udọk udọk;
ìre ekene obokọt iweek iriọọn̄?
25 Nnenisa ejit n̄a iweek igogobo iriọọn̄-inu
mè ubọk inu osabe ikup itet,
mè m̀wọlọ m̀kpọ, mè m̀week ǹriọọn̄;
mè iweek si irọriọọn̄ ijaan̄ lek ibe
ke irọrọ inu ikpak ìre mbubut,
ke mbubut si ìre ètele.
26 Mmun̄ ibe ke enenwaan̄ barabat îfieek igak mkpa;
ọmọ ìre ufe òkitet ene,
emen ejit kan̄ ìre njin òkigugubọ ene ikam,
ubọk kan̄ ìre mkpọn òkigon ene ibia;
ogwu ònwọnwọn me isi Awaji môlibi inwọnọ ọmọ,
ire, ogwu ijo ene ke ufe kan̄ obokpulu itet.
27 Ogwu ijejeen̄ onenibe,
“Kpọ, m̀wọwọlọ otutuuk inu me ge me ge,
inyi ǹkọt ǹriọọn̄ ubọk inu okupbe;
inu mweekbe imun̄ ìre ikeyi:
28 Mgbọ nkupbe me lek iweweek,
ire, ǹkakọt ìweek ìmun̄,
m̀mun̄ enerieen̄ ge gaalek òrere ata ene
me etete obop ene,
ire, kpunu enenwaan̄ geege me etete otutuuk kiban̄.
29 Kpọ, inu ge keyi gaalek ke mweek imun̄:
Awaji ìrorom ogwu ebilene itat isan̄a,
ire, ebilene gaalek eyaka ikisa ubọk kiban̄
iweek ogbogbo ifiọk linyọn̄.”