Inu yaage okup inyi otutuuk ene
9
Nneniwọlọ otutuuk inu chi ikpọ me ejit n̄a, mè ikana igwook ibe ke ogwu ata irọrọ melek ogwu òriọọn̄ inu mè inu ema erọbe ìkup me ubọk Awaji. Ire, ene geege me lek kiban̄ ìkariọọn̄ mè ìre imumechieen̄ mè ìre ochicha okup inyi ọmọ. 2 Inu yaage okup inyi otutuuk ene, ogwu ata irọrọ mè ogwu ikpak, ogwu ata ene mè ogwu ijo ene, ogwu ìkachaka mbuban mè ogwu òchaka mbuban, ogwu òkigwa ngwugwa inyi Awaji mè ogwu ìkakigwa ngwugwa ìnyi Awaji.Ubọk îkupbe inyi ogwu ata ene,
ikeya si ke îkup inyi ogwu ijo ene;
ubọk îkupbe inyi ogwu ònyan̄a ibot inyi Awaji,
ikeya si ke îkup inyi ogwu
òkifieek owot inyanyan̄a ibot.
3 Inu yaage okup inyi otutuuk ene. Inu ge yi ore ijo inu me lek otutuuk inu geelek òkirọ me irak isi ura. Inu ikpak inu ikpak ojot emen ejit ebilene. Mgbọ ema ekupbe me ògat ugwem, iraak irọrọ ene nnaan̄ okup ema me ejit. Òta kan̄, ema mîra ikwu ifo igọọk ebi ìkwakwaan̄. 4 Ikpọchieen̄ òwa inyi ebi ìkup me ugwem, mije, ibo òkup me ugwem înwọn igak egbe àtat òkwukwu.
5 Mije, ebi ìkup me ògat ugwem
mîriọọn̄ ibe ke ema mêkwaan̄,
ire, ebi ìkwakwaan̄ kperiọọn̄ inu geege;
ema kpeyaka ikaan̄ mkpukpe geege,
mîwuuk inu òfo me lek kiban̄.
6 Imumechieen̄ kiban̄, mè ochicha kiban̄,
mè chieen̄ ile kiban̄ îwuuk lek ichieen̄ ita karake mgbọ;
ema kpebeyaka ikpọk ikaan̄ uche geege mgbọ geege
me lek inu geelek òkirọ me irak isi ura.
7 Eya orọ, owu je si rie inorie kwun̄ bele ejit, mè nwọ miin̄ kwun̄ nwọọn̄ lek, mije, Awaji îwuuk lek ibọkọ ikwaan̄ kwun̄ itap. 8 Sa ekwut okuket kibala lek, mè kakilọ ichọchiọọk aran̄ me ibot. 9 Rie ugwem melek nwa kwun̄, ogwu owu omabe, me otutuuk usen mkpọn̄kpọn̄ ugwem kwun̄, òrere usen ugwem ikike eyi Awaji onyibe owu me irak isi ura. Mije, eya ore uche eyi kwun̄ me ugwem, mè lek ikwaan̄ ukwook okirọ me irak isi ura. 10 Inu geelek otetbe ubọk me lek iborọ, sa otutuuk unye kwun̄ rọ. Mije, emen udọn̄-ufuun̄ ere owu obofo ya, kpunu ikwaan̄, mè ìre idọdọmọ inu, kpukpunu si ifuk-ibot mè ìre iriọọn̄-inu.
11 Nnenikpọk imun̄ si ofifi inu me irak isi ura:
Ekot ìkakinwọn ebi ìfefet ukot,
akọn̄ ìkakinwọn ebi ìnyenye lek;
ikeya si, inorie ìkakikup ìnyi ebi ìriọọn̄ inu,
ubọọn̄ si ìkakikup ìnyi ebi ìkaan̄ ngobo-ntet,
nnwọn-isi ìkakire lek ebi ìkaan̄ ifuk-ibot;
ire, atisi ìkirọrọn̄ inyi ene geelek,
mgbọ isikup me ere òtatat me mgbọ òtatat.
12 Ene geege ìkakiriọọn̄ ibot mgbọ eyi kan̄:
Ike irin̄ okisi ijeen̄ me lek ikpak ikpak njin,
mè ike ofut okisi irọn̄ ufe,
ikeya ke ebilene ekirọn̄ inin̄ me ijo mgbọ,
eyi òkinitoon̄ ema me ekakpọge chieen̄.
Iriọọn̄-inu înwọn igak mbubut
13 Me irak isi ura, mmun̄ si inu keyi òfo me lek iriọọn̄-inu, eyi òtotop emi me lek enenen. 14 Îkaan̄ gwun̄ ama ge ibot ene inen mè inen gaalek elukbe me emen. Ogwu ubọọn̄ ge òkakaan̄ unye ojijibi akọn̄ inu inikpa mbin ikana gwun̄ ama ya, mè inama ikpele otitop akọn̄ ikana. 15 Îkaan̄ ogwu ugbọọn̄ ge òkakaan̄ iriọọn̄-inu me emen ama ya. Ogwu ugbọọn̄ yi onenisa iriọọn̄-inu kan̄ inyan̄a ama ya isibi. Ire, ene geege ìkayaka ìkeek ogwu ugbọọn̄ ya. 16 Eya ke emi mbe ke iriọọn̄-inu înwọn igak unye. Ire, ebi ene mîkpọ iriọọn̄-inu ogwu ugbọọn̄ ya chieen̄ isiki, mè ijit igbagban̄ ikọ kan̄.
17 Ebi ene mîkigban̄ ikọ ogwu òriọọn̄ inu otumube ususuk,
igak ukpo ogwu ibot mkpulu ebi mbubut otaan̄be.
18 Iriọọn̄-inu înwọn igak nroon̄ akọn̄,
ire, ogwu ijo ene ge gaalek
môkọt ijijaka ogbogbo ata inu.