10
Ike nkwukwu ananjin okifiat olu aran̄ utop olu,ikeya si ke sọntiik mbubut okifiat iriọọn̄-inu mè umin.
2 Ejit ogwu òriọọn̄ inu
ìkisa ogwukaan̄ ije itat inin̄ agan̄ ulom,
ire, ejit ogwu mbubut
ìkisa ogwukaan̄ ije ilọ ifo agan̄ ujit.
3 Ogwu mbubut ìkakaan̄ nden̄;
isikije me lek oniin̄,
ìkijejeen̄ otutuuk ene ibe ọmọ ìre mbubut.
4 Ire ogwu ibot mkpulu ibene unaan̄-ejit me lek kwun̄,
katele irek kwun̄;
ilọlọkọ lek ìkekisuuk owuwa ikpele nrọ-nlọ.
5 Îkaan̄ ijo inu ge mmun̄be me irak isi ura,
òkup kubọk nlilọ inu ebi ibot mkpulu ekirọ:
6 Mîkito ebi mbubut me irek ilile,
mè èto ebi ìbọbọọn̄ ubọọn̄ me ere òsisiki.
7 Mmun̄ ebi usun̄ ekikọp me inyọn̄ inyinya,
mgbọ ebi ilile ekije ukot ukot kubọk ebi usun̄.
8 Ogwu òrọkọ udọn̄, môrọn̄ inin̄ emen udọn̄ kan̄;
ogwu ògbugbọ mgban, ulu môtọk.
9 Ogwu ògọ ewuuk, môben unan inan̄a me lek ewuuk;
ogwu òbak uti, mfat ònan̄a me lek uti môfat.
10 Ire otuban ikput,
ìkido ibe etap unye esọkọ;
ire, ire iriọọn̄ inu, mè iwat otu otuban ireke,
oruru iriọọn̄-inu ìre ke ikwaan̄ môje ijaan̄.
11 Ire ulu itọk ene sabum ugwun̄ ònotet,
kpasi oruru ke ogwu ifit ulu okaan̄?
12 Ikọ otu ogwu òriọọn̄ inu ìkitotop,
ire, otu alọm ogwu mbubut obosa ogwukaan̄ ije.
13 Ibebene ikọ ogwu mbubut ìkikup mbubut mbubut,
itata ikọ kan̄ ìkikup ètele ètele,
14 ogwu mbubut ìkilọlọk ikọ iwa.
Kpunu ene geege òkiriọọn̄ inu òbonunu;
ekene obokọt itumu inyi ene inu òbonunu
mgbọ chieen̄ ene ya isinan̄a?
15 Ikwaan̄ ìkitata ebi mbubut efuuk me owot,
ire lek, ema kpeyaka ikiriọọn̄ oniin̄ ebeje inin̄ ama.
16 Môfieek inyi ama
eyi ogwu ubọọn̄ kan̄ orebe sọntiik gwun̄,
eyi ebi ibot mkpulu kan̄ ekirie ijọk ewelegwe ewelegwe.
17 Uga ubelejit okup inyi ama ogwu
ubọọn̄ kan̄ osibibe me owot ebi ilile,
eyi ebi ibot mkpulu kan̄ ekirie inorie mgbọ îgbebe,
inyi ema esa ekaan̄ efuuk, ìkare mè ema enwọ esa.
18 Irere ugbek,
ìkirọ otoon̄-uwu ene ikwala;
ikpukpulu ubọk inwaan̄ me agbagba ukot,
ìkirọ uwu ene ilut.
19 Inorie ìkitap ene imọm me otu,
miin̄ ìkirọ ene ibele ejit me ugwem,
ire, ikpoko ore inu geelek.
20 Katumu ijo ikọ ìbak ogwu ubọọn̄,
ìrere me emen ejit kwun̄;
kagbo ogwu òbọbọọn̄ ubọọn̄,
ìrere me emen agwut kwun̄;
mije, ofut òwulu me inyọn̄ môben ida kwun̄ ije,
unọn òkaan̄ uwop môsa ikọ kwun̄ iwulu isi ikpa.